Read Хуыцауы Дзырд иронау Иов 38 Bible Online

Иов 38 - Хуыцауы Дзырд иронау bible

Иов 38

¹Уӕд Иовмӕ уадтымыгъӕй радзырдта Хуыцау, загъта йын:

²«Ды чи дӕ, цӕмӕй Мӕ фӕнды ныхмӕ ӕнӕзонд ныхӕстӕ кӕнай?

³Дӕ астӕу ӕрбабӕтт лӕгау, дзуапп дӕттынмӕ ӕрцӕттӕ кӕн дӕхи, Ӕз дӕ фӕрсдзынӕн, ӕмӕ Мын ды зӕгъ:

⁴Ӕз зӕхх куы арӕзтон, уӕд ды кӕм уыдтӕ? Кӕд ӕй зоныс, уӕд дзуапп ратт.

⁵Йӕ ас ын чи снысан кодта, йӕ сӕрмӕ йын барӕн синаг чи айвӕзта, уый зоныс?

⁶Йӕ бындуртӕ цӕуыл ӕнцайынц, сӕрӕвӕрӕн дур ын чи сӕвӕрдта,

⁷сӕумӕйӕ стъалытӕ куы радысты, Хуыцауы фырттӕ цины хъӕр куы кодтой, уӕд?

⁸Денджызы дуӕрттӕ чи сӕхгӕдта, зӕххы арфӕй йӕхи куы срӕмыгъта, уӕд;

⁹мигъты йӕ куы батыхтон ӕмӕ йӕ тарӕй куы бамбӕрзтон;

¹⁰йӕ арӕнтӕ йын куы сбарстон ӕмӕ йын кулдуар куы сӕвӕрдтон ӕвдузӕнтимӕ;

¹¹загътон ын: „Ардӕмты дын бар ис, дарддӕр та нӕ, дӕ сӕрыстыр уылӕнтӕн ацы ран у сӕ арӕн“.

¹²Дӕ цӕрӕнбонты искуы Хурыскастӕн бардзырд радтай, Сӕуӕхсидӕн йӕ бынат бацамыдтай,

¹³цӕмӕй зӕххы кӕрӕттыл аххӕсса ӕмӕ ӕнӕхуыцӕутты зӕххӕй акала;

¹⁴цӕмӕй джиппӕйфыст ӕлыгау, зӕхх йӕ хуыз аива, хъуымацау сырх адара,

¹⁵ӕмӕ ӕнаккӕгтӕн сӕ рухс ахуысса, сӕ къух цӕвынӕввонгӕй саст ӕрцӕуа?

¹⁶Денджызы гуырӕнмӕ искуы бафтыдтӕ, йӕ тарф ын искуы басгӕрстай?

¹⁷Мӕлӕты дуӕрттӕ дын искуы байгом сты, мӕрдон тары дуар искуы федтай?

¹⁸Зӕххы фӕтӕн искуы сбарстай? Кӕд ӕппӕт уыдӕттӕ зоныс, уӕд-ма сӕ радзур.

¹⁹Рухсы цӕрӕнмӕ фӕндаг кӕуылты у, тары цӕрӕнуат кӕм ис?

²⁰Ды йӕ фӕстӕмӕ йӕ бынатмӕ акӕндзынӕ, фӕндаг ын бацамондзынӕ?

²¹Ды алцыдӕр зоныс, исты, мыййаг, се ’мгар нӕ дӕ, дӕ царды бонтӕ уӕдӕй нӕ нымайыс — уый бӕрц нӕ рацардтӕ!

²²Миты ӕфтауцдоны искуы уыдтӕ, ихы хӕзнадон искуы федтай,

²³бӕллӕхы заманмӕ кӕй ӕвӕрын, хӕст ӕмӕ тохы бонмӕ?

²⁴Арвӕрттывды фӕндӕгтӕ кӕм сты, скӕсӕйнаг дымгӕ зӕхмӕ кӕуылты тӕхы?

²⁵Чи сарӕзта сахкъӕвдатӕн донгӕлӕнтӕ, нӕргӕ уадтымыгъӕн — фӕндӕгтӕ,

²⁶цӕмӕй, ӕдзӕрӕг, адӕймаг кӕм нӕй, уыцы зӕххытӕ донхорыг кӕной,

²⁷ӕвӕд ӕрнӕджытӕ донӕй ӕфсадой, ӕмӕ зайӕгхӕлттӕ сырӕзой зӕххыл.

²⁸Къӕвдайӕн фыд ис? Чи у йӕ ныййарӕг ӕртӕхӕн?

²⁹Кӕй хуылфӕй рантысы их, ӕрвон халас кӕмӕй райгуыры,

³⁰дӕттӕ дурау куы ныхъхъӕбӕр вӕййынц, хуыдымы уӕлцъар куы ныссӕлы, уӕд?

³¹Дӕ бон у Ӕрфӕны сахсӕнтӕ тынгдӕр балвасын, Орионы сахсӕнтӕ суӕгъд кӕнын?

³²Дӕ бон у стъалыгуппартӕ сӕ афоныл рахонын ӕмӕ Авд хойӕн фӕндаг амонын?

³³Арвы фӕтк дын зындгонд у, зӕххӕн уагӕвӕрд сфидар кӕнис?

³⁴Дӕ хъӕлӕс ӕврӕгъты онг сӕххӕсдзӕн, знӕт дӕттӕ дын дзуапп ратдзысты?

³⁵Арвӕрттывд, кӕдӕм ын зӕгъай, уырдӕм ныййарц уыдзӕн, зӕгъдзӕн дын, цӕттӕ дӕн, зӕгъгӕ?

³⁶Уӕлзонд чи бавӕрдта зӕрдӕйы, чи скодта ӕмбаргӕ зонд?

³⁷Уый бӕрц куырыхон чи у, цӕмӕй мигътӕ банымайа кӕнӕ уӕларвон мигӕнӕнтӕ фӕкъул кӕна,

³⁸ӕмӕ зӕххы уӕлцъар ныхъхъӕбӕр уа, цъыфы къуыбӕрттӕ бандӕдзой кӕрӕдзиуыл?

³⁹Исты мадӕл домбайӕн йӕ амӕттаджы ды ’рцахсыс ӕмӕ йын йӕ лӕппынты ды бафсадыс,

⁴⁰сӕ хуыккомы куы ’рныгъуылынц, кӕнӕ къутӕрты сӕ амӕттӕгты куы фӕхъахъхъӕнынц, уӕд?

⁴¹Сынтӕн чи ’рцӕттӕ кӕны холлаг, стонгӕй йӕ лӕппынтӕ сӕхи раппар-баппар куы фӕкӕнынц ӕмӕ сӕ фыр тыхстӕй Хуыцаумӕ куы фӕхъӕр кӕнынц, уӕд?