Read Хуыцауы Дзырд иронау Иов 4 Bible Online

Иов 4 - Хуыцауы Дзырд иронау bible

Иов 4

¹Ӕмӕ дзуапп радта Елифаз, теманаг:

²«Куы дын бафӕнда исты зӕгъын искӕй, уӕд дын йӕ дзырд куы фӕхъыг уа, мыййаг? Фӕлӕ ӕнӕзӕгъгӕ дӕр куыд ис?

³Бирӕтӕн-иу дӕхӕдӕг зонд амыдтай, цы къухтӕ-иу ӕрлӕмӕгъ сты, уыдон-иу фӕфидар кодтай,

⁴фӕцудӕгӕн ныфсы хос уыд дӕ ныхас, лӕмӕгъ къӕхтӕ-иу нал кодтой дыдӕгътӕ.

⁵Дӕхи рад у ныр та, ӕмӕ нӕ быхсыс; фыдбылыз дӕхиуыл ӕрцыд, ӕмӕ катайы бацыдтӕ.

⁶Хуыцауы тас дын ӕнцой хъуамӕ ма дӕттид, дӕ фӕндӕгты ӕнаипдзинад — фидар ныфс?

⁷Ахъуыды-ма кӕн: кӕд чи бабын ис ӕнӕ аххосӕй, раст адӕймаг кӕд фесӕфти?

⁸Ӕрӕййӕфтон афтӕ: тӕригъӕды хуым-иу чи бакодта ӕмӕ-иу дзы фыддзинад чи байтыдта, уыдонӕн-иу сӕхи кӕрдинаг фӕци,

⁹уыдон Хуыцауы комытӕфӕй бабын вӕййынц, Йӕ масты раулӕфтӕй ӕрбайсӕфынц.

¹⁰Ӕрбацыдӕр вӕййынц домбайы рыхын, знӕт домбайы хъӕлӕс, ӕвзонг домбӕйтты ссыртӕ.

¹¹Тыхджын домбай ӕнӕ амӕттагӕй амӕлы, мадӕл домбайӕн йӕ лӕппынтӕ алырдӕмты ныххӕлиу вӕййынц.

¹²Раргом ис сусӕг дзырд мӕ удӕн, мӕ хъустӕ мынӕг ныхас ӕрцахстой.

¹³Адӕм тарф фынӕй куы кодтой, уӕд мыл ӕхсӕвы ӕнӕнцой цӕстылуайӕнтӕй

¹⁴фыр тӕссӕй ризӕг бахӕцыд, ме уӕнгтӕ ӕрызгъӕлдысты:

¹⁵мӕ цӕсгомы рӕзты атахти цыдӕр мон, ӕмӕ мӕ сӕры хъуын арц сбадти.

¹⁶Мӕ тӕккӕ раз куы ’рлӕууыди, уӕд дӕр ӕй дзӕбӕх не ’взӕрстон, ӕрмӕстдӕр ын йе ’ндӕрг уыдтон. Ӕдзӕм уыд алцы, стӕй райхъуысти хъӕлӕс:

¹⁷„Куыд уыдзӕн адӕймаг Хуыцауӕй растдӕр? Куыд уыдзӕни лӕг йе Скӕнӕгӕй сыгъдӕгдӕр?

¹⁸Уый Йӕ дӕлдӕртыл ӕххӕстӕй Йӕ зӕрдӕ нӕ дары, Йӕ зӕдты дӕр нӕ хоны ӕнӕлаз.

¹⁹Цы загъдӕуа уӕд, сӕ бындур зӕххы рыг кӕмӕн у, ӕлыгӕй конд хӕдзӕртты[1] чи цӕры, рӕмпӕгӕй ӕнцондӕр ӕртъӕпп кӕй ис!

²⁰Сӕумӕрайсомӕй изӕрмӕ — сӕ цард, ӕнустӕм куыд ӕрбатар уыдзысты — зонгӕ дӕр ӕй нӕ бакӕндзынӕ.

²¹Сӕ уды таг ӕрбаскъуыйы, уӕлзондмӕ нӕма сӕххӕссынц, афтӕмӕй“.