Read Хуыцауы Дзырд иронау Иов 8 Bible Online

Иов 8 - Хуыцауы Дзырд иронау bible

Иов 8

¹Уӕд ын дзуапп радта Билдад, шуахаг:

²«Ахӕм ныхӕстӕ кӕдмӕ кӕндзынӕ? Дӕ дзыхы дзырд — уаддымгӕйау.

³Ау, Хуыцау тӕрхон сзыгъуыммӕ кӕны? Ау, Ӕппӕтхъомыс рӕстдзинад сзыгъуыммӕ кӕны?

⁴Кӕд дӕ цот Хуыцауы раз тӕригъӕд ракодтой, уӕд сын сӕ тӕригъӕды аккаг фӕци.

⁵Дӕ Хуыцауы зӕрдиагӕй куы агурай, Ӕппӕтхъомысӕй хатыр куы курай,

⁶уӕд дӕм Уый ӕркӕсдзӕн ӕмӕ, кӕд сыгъдӕг ӕмӕ раст дӕ, уӕд дӕ фарс рахӕцдзӕн ӕмӕ дын дӕ цард аккаг бынаты сбадын кӕндзӕн.

⁷Цы суыдзынӕ, уый раз дӕм, раздӕр цы уыдтӕ, уый ницыуал кӕсдзӕн.

⁸Бафӕрс-ма хистӕрты, сӕ фыдӕлтӕн цы раргом ис, уый базон.

⁹Мах та зноныккон стӕм ӕмӕ ницы зонӕм, уымӕн ӕмӕ ӕрбайсӕфынц, ӕндӕргтау, нӕ царды бонтӕ зӕххыл.

¹⁰Уыдон дын бацамонӕнт, уыдон дын радзурӕнт, уыдон дын зӕрдӕбынӕй зӕгъӕнт:

¹¹цъыфдзаст кӕм нӕй, уым цъӕнут ӕрзайы, хъӕз ӕнӕ донӕй йӕхиуыл схӕцы?

¹²Дидинӕг фӕкалы, фӕлӕ ӕнӕ донӕй, ӕнӕ ’ртонгӕйӕ дӕр, иннӕ зайӕгойтӕй тагъддӕр бахус вӕййы.

¹³Афтӕ у, Хуыцауы чи ферох кӕны, уыдоны хъуыддаг дӕр, ӕнӕхуыцау адӕймагӕн йӕ зӕрдӕ амӕлы.

¹⁴Йӕ ныфс гӕбазгай ныввӕййы: йӕ зӕрдӕ цӕуыл дары, уый тӕссонд у, хӕлуарӕджы тынӕй уӕлдай нӕу.

¹⁵Йӕ хӕдзарыл куы банцой кӕна, уӕд ӕй уый нӕ бауромдзӕн, йӕ тых йӕ бонӕй йыл куы ныххӕца, уӕддӕр йӕ къахыл не слӕудзӕн.

¹⁶Цъӕх-цъӕхидӕй хурмӕ бӕргӕ ӕрттивы, йӕ къабӕзтӕ дыргъдоны фӕйнӕрдӕм фӕцыдысты.

¹⁷Йӕ уидӕгтӕ хуыртӕ гӕрдынц, дурты цӕндыл хӕрдмӕ хилынц,

¹⁸фӕлӕ йӕ сыскъуын йӕ бынатӕй, уӕд ыл йӕ бынат дӕр йӕ къух ауигъдзӕн, ам дӕ уынгӕ дӕр никуы фӕкодтон, зӕгъгӕ.

¹⁹Уый дын йӕ цардамонд! Йӕ бынаты та ӕндӕртӕ сзайы.

²⁰Хуыцау нӕ аппардзӕни рӕстаджы ӕмӕ фыдгӕнӕджы фарс нӕ фӕлӕудзӕн.

²¹Уый дын фӕстӕмӕ дӕ цӕсгоммӕ мидбылхудт раздахдзӕни, дӕ ком дын цины хъӕртӕй байдзаг кӕндзӕни.

²²Де знӕгтӕ худинаджы бын фӕуыдзысты, ӕнаккӕгтӕ хӕдзархӕлдӕй баззайдзысты».