Read Хуыцауы Дзырд иронау Псаломттӕ 104 Bible Online

Псаломттӕ 104 - Хуыцауы Дзырд иронау bible

Псаломттӕ 104

¹Сыстаут Дунедарӕджы, арут Ын Йӕ ном, адӕмты ’хсӕн Ын хъусын кӕнут Йӕ хъуыддӕгтӕ.

²Зарут Ын, зарджыты Йӕ сыстаут, хъусын Ын кӕнут Йӕ диссӕгтӕ.

³Раппӕлут Ын Йӕ уаз номӕй, Дунедарӕджы чи агуры, уыдон цинӕй райӕнт!

⁴Агурут Дунедарӕджы, агурут Ын Йӕ хъомыс, кӕддӕриддӕр тырнут Йӕ размӕ.

⁵Ма рох кӕнут Йӕ диссӕгтӕ, Йе ’вдисӕйнӕгтӕ, Йӕ тӕрхӕттӕ.

⁶Сымах — Йӕ цагъар Авраамы байзӕддӕгтӕ, Йаковы фӕдонтӕ, Йе ’взӕрстытӕ.

⁷Уый махӕн у нӕ Дунедарӕг Хуыцау, ӕгас зӕххы тӕрхонгӕнӕг.

⁸Мыггагмӕ дӕр нӕ рох кӕны Йӕ фидыд, мин фӕлтӕрӕн кӕй бафӕдзӕхста,

⁹Авраамӕн ныстуанӕн кӕй ныууагъта, Исаакӕн сомы кӕмӕй ракодта.

¹⁰Йӕ сомы уагӕвӕрдау радта Йаковӕн, ӕнусон фидыдау — Израилӕн.

¹¹Уый загъта: «Ханааны зӕхх уын фыдӕй-фыртмӕйы исбонӕн ратдзынӕн».

¹²Сӕ нымӕц чысыл куы уыд нырма, ӕрцӕуӕггӕтӕ куы уыдысты уыцы ран,

¹³уӕд хӕтӕнхуагӕй иу бӕстӕйӕ иннӕмӕ, иу паддзахадӕй иннӕмӕ цыдысты.

¹⁴Фӕлӕ сӕ Уый никӕмӕн уагъта ӕфхӕрын, паддзӕхтӕн-иу бардзырд радта:

¹⁵«Ма хъыгдарут Мӕ байсӕрстыты, мӕ пехуымпартӕн ӕвзӕрӕй мацы ракӕнут».

¹⁶Стонг заман ӕруагъта зӕххыл, иу ӕфсир нӕ ныууагъта бӕстыл.

¹⁷Уӕд сын сӕ разӕй Йе ’взӕрст лӕджы арвыста: цагъары номыл уӕй ӕрцыд Йосеф.

¹⁸Йӕ къӕхтыл ын хъадамантӕ скодтой, йӕ хъуыр ын ӕфсӕйнагӕй ӕрбалвӕстой,

¹⁹цалынмӕ Хуыцауы ныхас сӕххӕст ис, уӕдмӕ. Дунедарӕг ӕй бафӕлвӕрдта Йӕ ныхасӕй.

²⁰Паддзах радта суӕгъд кӕныны бардзырд, адӕмты хицау ын радта сӕрибар.

²¹Сӕвӕрдта йӕ хицауӕй йӕ хӕдзары, йе ’ппӕт исбон бакодта йӕ бар,

²²йӕ барджынтӕн сси сӕ хицау, йӕ хистӕртӕн ын зонд амонын райдыдта.

²³Ӕмӕ Мысырмӕ ’рбацыдис Израил, ӕрбынат кодта Хамы зӕххыл Йаков.

²⁴Ӕмӕ Хуыцау сбирӕ кодта Йӕ адӕмы, ӕмӕ йӕ скодта йе знӕгтӕй тыхджындӕр.

²⁵Ӕнӕуынон сын фестын кодта Йӕ адӕмы, Йӕ цагъарты ныхмӕ Йын сарӕзтой фыдвӕнд.

²⁶Уый арвыста Йӕ цагъар Моисейы, стӕй Йе ’взӕрст Аароны.

²⁷Хамы зӕххыл сын равдыстой Йе ’вдисӕйнӕгтӕ, Йӕ диссӕгтӕ,

²⁸Уый радта бардзырд талынг ӕмӕ тарӕн, ӕмӕ йын байхъуыстой Йӕ ныхасмӕ.

²⁹Сӕ дон сын фестын кодта туг, сӕ кӕсӕгтӕ сын амардта.

³⁰Галхӕфсытӕй нал зынди сӕ зӕхх, байдзаг сӕ ис паддзахӕн йӕ уат.

³¹Уый загъта, ӕмӕ сасчытӕ фӕзындысты, сӕ зӕхх ӕгасӕй байдзаг ис дзынгатӕй.

³²Ныууарыд сыл къӕвдайы бӕсты их, пиллон арт сӕ зӕххыл ацыди.

³³Ныссаста их сӕ сӕнӕфсиртӕ, легъуи бӕлӕстӕ, ӕгас зӕххыл дӕр бӕлӕстӕ ныццагъта.

³⁴Уый загъта, ӕмӕ фӕзындысты мӕтыхтӕ, ӕнӕнымӕцӕй апырх ис къуыдыргалм;

³⁵кӕрдӕджы мур дӕр нал ныууагътой зӕххыл, сӕ быдырты дӕр нал баззади халсар.

³⁶Сӕ фыццаггуырдты иууылдӕр ныццагъта, ӕмӕ сын басаста сӕ хъару.

³⁷Сыгъзӕрин ӕмӕ ’взистимӕ ракодта Израилы, сӕ мыггӕгты ’хсӕн алчидӕр — сӕрӕгас.

³⁸Ныццин кодта Мысыры зӕхх сӕ рацыдыл: стыр тас бауагътой мысырӕгты.

³⁹Уый мигъӕй бамбӕрзта Йӕ адӕмы, ӕхсӕв сын рухсӕн арты цӕджындз дардта.

⁴⁰Лӕгъстӕ Йын кодтой — рарвыста уӕрццытӕ, уӕларвон хойрагӕй сӕ ӕфсӕста,

⁴¹Уый акъӕртт кодта айнӕг — ракалд дон, ӕнӕдон зӕххыл анхъӕвзта цӕугӕдон:

⁴²нӕ Дзы ферох Йӕ уаз дзырд, Йӕ зӕрдӕвӕрд Йӕ цагъар Авраамӕн.

⁴³Райгондӕй ракодта Йӕ адӕмы, Йе ’взӕрст адӕмы рацӕуын кодта хъӕлдзӕгӕй.

⁴⁴Ӕмӕ сын радта адӕмты зӕххытӕ, ӕндӕр адӕмты фӕллӕйтӕ сӕ исбон баисты,

⁴⁵цӕмӕй Йын ӕххӕст кӕной Йӕ уагӕвӕрдтӕ, Йе ’гъдӕуттӕ Йын хъахъхъӕной. Алелуйа!