Read Хуыцауы Дзырд иронау Псаломттӕ 106 Bible Online

Псаломттӕ 106 - Хуыцауы Дзырд иронау bible

Псаломттӕ 106

¹Кад кӕнут Дунедарӕгӕн, стаут Ӕй, уымӕн ӕмӕ ныл ауды, мыггагмӕ нӕ буц кӕны Йӕ хорзӕхтӕй!

²Афтӕ зӕгъӕнт, Дунедарӕг кӕй ссӕрибар кодта, се ’фхӕрджыты къухӕй кӕй байста,

³алы бӕстӕтӕй — скӕсӕнӕй, ныгуылӕнӕй, цӕгатӕй ӕмӕ хуссарӕй — кӕй ӕрӕмбырд кодта, уыцы адӕм.

⁴Уыдонӕй иутӕ фӕдзӕгъӕл сты сыгъд быдыры, ӕмӕ ма искуы исты сахар, исты хъӕу ссардзысты, уый сӕ нал уырныдта.

⁵Фыр стонг ӕмӕ фыр дойныйӕ арвмӕ асинтӕ амадтой, сӕ уд удыл нал хӕцыди.

⁶Фыр адӕргӕй Дунедарӕгмӕ сдзынӕзтой, ӕмӕ сӕ Уый фыд азарӕй бахызта:

⁷фӕндаг сын бацамыдта, цы сахары ӕрцӕрӕн ис, уырдӕм.

⁸Уӕдӕ стауӕнт Дунедарӕджы Йӕ хорзӕхы тыххӕй, адӕмӕн цы диссаджы хъуыддӕгтӕ сарӕзта, уыдоны тыххӕй!

⁹Уымӕн ӕмӕ Уый дойныгӕнӕг удтӕн суагъта сӕ дойны, хӕрзтӕй бафсӕста ӕххормӕгты зӕрдӕтӕ.

¹⁰Иннӕтӕ та саудалынджы, мӕрдон тары бадтысты ӕмӕ се ’фсӕн хъадаманты бын удхарӕй мардысты,

¹¹уымӕн ӕмӕ сӕхи атигъ кодтой Хуыцауы ныхӕстыл, Иууылбӕрзонды уынаффӕтӕ ницӕмӕ ’рдардтой.

¹²Ӕмӕ сын Уый дӕр уӕззау куыстӕй бадомдта сӕ зӕрдӕтӕ; фӕцудыдтой — фӕхӕцӕг сыл нӕ уыди.

¹³Фӕлӕ сӕ тыхсты заман Дунедарӕгмӕ сдзынӕзтой, ӕмӕ сӕ Уый фыдбылызӕй фервӕзын кодта.

¹⁴Саудалынгӕй, мӕрдон тарӕй сӕ рухсмӕ ракодта, сӕ хъадамантӕ сын ныссаста.

¹⁵Уӕдӕ стауӕнт Дунедарӕджы Йӕ хорзӕхы тыххӕй, адӕмӕн цы диссаджы хъуыддӕгтӕ сарӕзта, уыдоны тыххӕй!

¹⁶Уымӕн ӕмӕ Дунедарӕг ӕрхуы дуӕрттӕ ныппырх кодта, ӕфсӕн ӕвдузӕнтӕ ныссаста.

¹⁷Ӕнӕзӕндтӕ сӕ азымты тыххӕй, сӕ алы фыдракӕнды аххосӕй хъизӕмарӕй мардысты.

¹⁸Къӕбӕр сын ад нал кодта, мӕлӕты къахыл ныллӕууыдысты.

¹⁹Фӕлӕ сӕ тыхсты Дунедарӕгмӕ сдзынӕзтой, ӕмӕ сӕ Уый фыдбылызӕй фервӕзын кодта.

²⁰Йӕ ныхас рарвыста, ӕмӕ сдзӕбӕх сты, фервӕзтысты мӕлӕтӕй.

²¹Уӕдӕ стауӕнт Дунедарӕджы Йӕ хорзӕхы тыххӕй, адӕмӕн цы диссаджы хъуыддӕгтӕ сарӕзта, уыдоны тыххӕй!

²²Ӕрхӕссӕнт Ын арфӕйы нывӕндтӕ, цинӕй райгӕйӕ Йын ӕппӕлӕнт Йӕ хъуыддӕгтӕй!

²³Денджызы наутыл балцы чи ацыд, ӕгӕрон фурды уылӕнтыл йӕ куыст чи кодта,

²⁴уыдон уыдтой Дунедарӕджы хъуыддӕгтӕ, Йӕ диссӕгтӕ доны арфы.

²⁵Йӕ ныхасӕй-иу уад сыстади, хӕрдмӕ-иу фӕцыдысты денджызы уылӕнтӕ.

²⁶Наутӕ-иу арвы хъӕбысмӕ фехстой сӕхи, стӕй та-иу фурды ӕнӕбын арфы фестадысты; наудзогтӕн-иу сӕ уд атади фыр тӕссӕй.

²⁷Зилдух кодтой, расгуытау цудыдтой, фыр тӕссӕй сӕ зонд дзӕгъӕлтӕ кӕнын байдыдта.

²⁸Фӕлӕ сӕ тыхсты Дунедарӕгмӕ сдзынӕзтой, ӕмӕ сӕ Уый фыдбылызӕй фервӕзын кодта.

²⁹Уый ӕрсабыр кодта уад, ӕмӕ уылӕнтӕ банцадысты.

³⁰Адӕм фыр цинӕй радысты, уылӕнтӕ кӕй ӕрсабыр сты, ууыл. Дунедарӕг та адӕмы бахӕццӕ кодта сӕ бӕллиццаг наулӕууӕнмӕ.

³¹Уӕдӕ стауӕнт Дунедарӕджы Йӕ хорзӕхы тыххӕй, адӕмӕн цы диссаджы хъуыддӕгтӕ сарӕзта, уыдоны тыххӕй!

³²адӕмон ӕмбырды Йӕ стауӕнт, кад ын кӕнӕнт хистӕрты астӕу.

³³Уый цӕугӕдӕттӕ фестын кӕны ӕдзӕрӕг быдыртӕ, суадӕттӕ — хуыскъ зӕхх,

³⁴йӕ цӕрджыты ӕнӕраст миты тыххӕй цӕхбын фесты бӕзнаг мӕр.

³⁵Уый ӕдзӕрӕг быдыр фестын кӕны цад, хуыскъ зӕххыл сабузын кӕны суадӕттӕ.

³⁶Ӕмӕ уыцы ран Хуыцау ӕрцӕрын кӕны, уымӕй размӕ сыдӕй чи марди, уыцы адӕмы. Ӕмӕ дзы уыдон сӕхицӕн саразынц сахартӕ,

³⁷байтауынц сӕ хуымтӕ, скӕнынц сӕндӕттӕ ӕмӕ хъӕздыг тыллӕг сисынц.

³⁸Хуыцау сын арфӕ ракӕны, ӕмӕ фылдӕрӕй-фылдӕр кӕнынц, сӕ фосӕн дӕр бакӕнӕнтӕ нал вӕййы.

³⁹Фӕлӕ чысыл куы вӕййы сӕ нымӕц, ӕфхӕрд, фыдбӕллӕх ӕмӕ тухиты бын хъизӕмар куы февзарынц,

⁴⁰уӕд сын Хуыцау сӕгад кӕны сӕ фӕтӕгты, ӕдзӕрӕг ранмӕ сӕ акӕны, ӕмӕ уым фӕдзӕгъӕл вӕййынц.

⁴¹Мӕгуырты та скадджын кӕны, сӕ мӕгуыр царды ахӕстӕй сӕ ракӕны, сӕ мыггаг сын сбирӕ кӕны фосы дзугау.

⁴²Рӕстгӕнджытӕ цинӕй райынц, уыдӕттӕ уынгӕйӕ, ӕнаккӕгтӕн та сӕ бон зӕгъын дӕр ницыуал вӕййы.

⁴³Уӕлзонд кӕмӕ ис, уый лӕмбынӕг ӕркӕсӕд ӕмӕ Хуыцау хорзӕх бамбарӕд.