Read Хуыцауы Дзырд иронау Псаломттӕ 108 Bible Online

Псаломттӕ 108 - Хуыцауы Дзырд иронау bible

Псаломттӕ 108

¹Зарӕггӕнджыты разамонӕгӕн. Давиды псалом. О мӕ Хуыцау, ӕз Дӕу стауын! Ма у ӕнӕдзуапп!

²Уымӕн ӕмӕ ӕнаккӕгтӕ ӕмӕ мӕнгӕрдтӕ сӕ дзыхтӕ схӕлиу кодтой мӕ ныхмӕ, сӕ мӕнгард ӕвзӕгтӕ суагътой.

³Ӕртыхстысты мыл се ’фхӕрӕн ныхӕстӕ, лӕбурынц мӕм ӕнӕ ’фсонӕй.

⁴Мӕ уарзты тыххӕй сын ӕнӕуынон сдӕн, ӕз та кувын.

⁵Мӕ хорз мын фидынц ӕвзӕрӕй, мӕ уарзт — ӕнӕуынондзинадӕй.

⁶Ӕнӕхуыцауы амӕттаг фӕуӕд фыдгул, зылынгӕнӕг йӕ рахизфарс ӕрлӕууӕд,

⁷тӕрхоны рӕстӕг азымджын разынӕд, тӕригъӕдыл нымад ӕрцӕуӕд йӕ куывд;

⁸йӕ царды бонтӕ фӕцыбыр уӕнт, йӕ бынат та йын бацахсӕд ӕндӕр;

⁹йӕ сабитӕ сидзӕрӕй баззайӕнт, йӕ ус та — идӕдзӕй;

¹⁰йӕ хъӕбултӕ суӕнт мӕгуыргуртӕ, сӕ быууаты дӕр сын ӕрлӕууӕн ма уӕд;

¹¹йӕ исбон йӕ хӕсты ныхмӕ фиддонӕн бахъӕуӕд, йӕ фӕллой хӕлӕттаг фӕуӕд;

¹²мачи йын баххуыс кӕнӕд, йӕ сидзӕртӕн рӕвдауӕг ма разынӕд;

¹³йӕ хъӕстӕ ӕлгъыстаг фӕуӕд, дыккаг фӕлтӕры йӕ кой мауал фӕзынӕд;

¹⁴йӕ фыдӕлты тӕригъӕдтӕ йын Дунедарӕг ӕрымысӕд, йӕ мады тӕригъӕдтӕ йын ма ферох кӕнӕд.

¹⁵Дунедарӕг сын макуы ныббарӕд, сӕ кой дӕр сын фесафӕд зӕххыл!

¹⁶Уымӕн ӕмӕ хорздзинад никуы ракодта, мӕгуыр ӕмӕ гӕвзыччы фӕдыл зылди, ӕфхӕрд адӕймаджы фесафынмӕ бӕллыд.

¹⁷Искӕй ӕлгъитынӕй ӕфсис нӕ зыдта, ӕмӕ йе ’лгъыстытӕ йӕхи сӕрыл ӕрцӕуӕнт; арфӕ кӕнын нӕ уарзта, ӕмӕ арфӕ макуы фенӕд!

¹⁸Ӕлгъыст йӕ дарӕс суӕд, донау йӕ хуылфы ацӕуӕд, сойау йе стджыты ахъарӕд,

¹⁹йе ’рвылбоны дарӕс фестӕд ӕмӕ, йӕ астӕуыл цы рон ӕрбабӕтты, уый йын басгуыхӕд.

²⁰Ахӕм арфӕ ракӕнӕд Дунедарӕг мӕ фыдгултӕн, мӕ ныхмӕ фыдвӕндтӕ чи кӕны, уыдонӕн!

²¹Мӕнӕн та, Дунедарӕг, баххуыс кӕн Дӕ номы сӕраппонд; Дӕ хорзӕхы фӕрцы мӕ фервӕзын кӕн!

²²Мӕгуыр ӕмӕ гӕвзыкк дӕн ӕз, риссы мӕ зӕрдӕ мӕ риуы.

²³Тайын изӕры ӕндӕргтау, сурынц мӕ мӕтыхтау.

²⁴Ком дарынӕй мӕ уӕрджытӕ мӕ быны фӕдыдагъ вӕййынц, мӕ царм ме стджытыл бандӕгъди.

²⁵Хъазӕнхъул фестадтӕн адӕмӕн, мӕн фенгӕйӕ, сӕ сӕртӕ банкъусынц.

²⁶Баххуыс мын кӕн, Дунедарӕг, ме Скӕнӕг, Дӕ хорзӕх у фарн хӕссӕг — фервӕзын мӕ кӕн.

²⁷Уадз базоной: уый мӕ Ды фервӕзын кодтай, уый мын Дӕ хорзӕх уыди, Дунедарӕг.

²⁸Уыдон мӕ ӕлгъитынц — Ды арфӕ ракӕн, уыдон мӕм лӕбурынц — Ды сӕ худинаджы бын фӕкӕн, ӕмӕ ныццин кӕндзӕни Дӕ цагъар.

²⁹Мӕ хахуыргӕнджытӕн худинаг суӕд сӕ дарӕс, ӕгады гакк — сӕ уӕлӕфтау.

³⁰Ӕз та хъӕрӕй арфӕ кӕндзынӕн Дунедарӕгӕн ӕмӕ Йӕ стаудзынӕн дзыллӕты ӕхсӕн.

³¹Уымӕн ӕмӕ Уый мӕгуыр лӕджы рахизфарс ӕрлӕууыд, цӕмӕй йӕ фервӕзын кӕна, азымджын ӕй чи кӕны, уыдонӕй.