Read Хуыцауы Дзырд иронау Псаломттӕ 118 Bible Online

Псаломттӕ 118 - Хуыцауы Дзырд иронау bible

Псаломттӕ 118

¹Тӕхудиаг сты уыдон, сӕ фӕндаг ӕнӕкъӕм кӕмӕн у, Дунедарӕджы Ӕгъдаумӕ гӕсгӕ чи цӕры.

²Тӕхудиаг сты, Йӕ фӕдзӕхстытӕ Йын чи ӕххӕст кӕны, зӕрдиагӕй Йӕ чи агуры,

³фыддзинад чи нӕ кӕны ӕмӕ Йӕ фӕндӕгтыл чи цӕуы.

⁴Ды бафӕдзӕхстай, Дӕ амындтытӕ арф ӕвӕрд куыд уой зӕрдӕйы.

⁵Тӕхуды, ӕз ахӕм фӕндӕгтыл куы цӕуин, цӕмӕй Дын ӕххӕст кӕнон Дӕ уагӕвӕрдтӕ!

⁶Уӕд ӕз къӕмдзӕстыг нӕ уаин, Де ’ппӕт фӕдзӕхстытӕм кӕсгӕйӕ.

⁷Сыгъдӕг зӕрдӕйӕ Дӕ стауин, Дӕ раст уынаффӕтыл ахуыр кӕнин.

⁸Ӕз ӕххӕст кӕндзынӕн дӕ уагӕвӕрдтӕ; бынтон мӕ ма ныууадз.

⁹Ӕрыгон лӕппу куыд бахъахъхъӕна сыгъдӕгӕй йӕ фӕндаг? Дӕ ныхасмӕ гӕсгӕ цӕрӕд.

¹⁰Агурын дӕ ӕппӕт зӕрдӕйӕ, ма мӕ бауадз Дӕ фӕдзӕхстытӕй аздӕхын.

¹¹Ӕз мӕ зӕрдӕйы рӕбын бавӕрдтон Дӕ ныхас, цӕмӕй Дӕ разы тӕригъӕд ма ракӕнон.

¹²Арфӕгонд дӕ Ды, Дунедарӕг! Бацамон мын Дӕ уагӕвӕрдтӕ.

¹³Ӕз хъусын кӕнын Дӕуӕй рацӕугӕ ӕппӕт уынаффӕтӕ.

¹⁴Цыфӕнды мулкӕй стырдӕр цин мӕнӕн — Дӕ уынаффӕты фӕндагыл цӕуын.

¹⁵Мӕ хъуыдытӕ сты Дӕ фӕдзӕхстытыл, Дӕ амынд фӕндӕгтӕм кӕсын.

¹⁶Ӕхцон мын сты уагӕвӕрдтӕ, Дӕ ныхас нӕ рох кӕнын.

¹⁷Дунедарӕг, Дӕ хорзӕх мӕ уӕд, ӕмӕ цӕргӕбонты ӕххӕст кӕндзынӕн Дӕ ныхас.

¹⁸Байгом мын кӕн мӕ цӕстытӕ, ӕмӕ фенон Де ’Гъдауы диссӕгтӕ.

¹⁹Уазӕг дӕн ӕз ацы зӕххыл, ма мӕ ’мбӕхс Дӕ фӕдзӕхстытӕ.

²⁰Бастади мӕ уд, ӕдзух Дӕ раст тӕрхонмӕ бӕлгӕйӕ.

²¹Ды ӕрцахуыр кодтай сӕрыстырты. Ды ралгъыстай, Дӕ фӕдзӕхстытыл йӕ къух чи ауыгъта, уыдоны.

²²Хынджылӕггаг ӕмӕ мын аллайаг ма фӕкӕн мӕ сӕр, уымӕн ӕмӕ ӕз Дӕ фӕдзӕхстытӕм гӕсгӕ цӕрын.

²³Уӕздӕттӕ мӕ ныхмӕ фыдвӕндтӕ кӕнынц, ӕз та, Дӕ цагъар, хъуыды кӕнын Де ’Гъдауыл.

²⁴Дӕ уагӕвӕрдтӕ цин хӕссынц мӕнӕн, уынаффӕгӕнӕг мын сты уыдон.

²⁵Бартхутӕг ис мӕ уд, райгас мӕ кӕн Дӕ ныхасӕй.

²⁶Мӕ фӕндӕгтӕ Дын раргом кодтон ӕз, ӕмӕ мӕ Ды фехъуыстай; сахуыр мӕ кӕн Дӕ уагӕвӕрдтыл.

²⁷Дӕ уынаффӕты фӕндаг мын бамбарын кӕн, ӕмӕ ӕз хъуыды кӕндзынӕн Дӕ диссӕгтыл.

²⁸Мӕты бацыд мӕ уд, сфидар мӕ кӕн Дӕ ныхасмӕ гӕсгӕ.

²⁹Мӕнгдзинады фӕндагӕй мӕ бахиз, Де ’Гъдау мын балӕвар кӕн.

³⁰Ӕцӕгады фӕндаг равзӕрстон мӕхицӕн, мӕ цӕстӕнгас Дӕ раст тӕрхонмӕ сарӕзтон.

³¹Дӕ ныстуантыл лӕууы мӕ уд, ма мӕ фегад кӕн, Дунедарӕг.

³²Дӕ амынд фӕндагыл згъордзынӕн ӕз; мӕ зӕрдӕйӕн фӕндагамонӕг Ды дӕ.

³³Сараз мӕ, Дунедарӕг, Дӕ фӕндагыл, ӕмӕ дзы ӕз ничердӕм фӕзилдзынӕн.

³⁴Ӕмбарынад мын ратт, ӕмӕ ӕз ӕххӕст кӕндзынӕн Де ’Гъдау, мӕ зӕрдӕйы рӕбын ӕй дардзынӕн.

³⁵Дӕ фӕдзӕхстыты фӕндагыл мӕ ахон, уымӕн ӕмӕ уый бӕллиццаг у мӕнӕн.

³⁶Мӕ зӕрдӕ мын пайдамондагӕй бахиз ӕмӕ йӕ Дӕ фӕдзӕхстытӕм аздах.

³⁷Мӕнг цы у, уыдӕттӕй мын мӕ цӕстӕнгас аздах ӕмӕ мӕ цард балӕвар кӕн Дӕ фӕндагыл.

³⁸Дӕ цагъарӕн, цы дзырд радтай, уый сӕххӕст кӕн, цӕмӕй иннӕтӕ дӕр аргъуыц кӕной Дӕ разы.

³⁹Дӕ уынаффӕты фарн ис, ӕмӕ мӕ бахиз, цы худинагӕй тӕрсын, уымӕй.

⁴⁰Дӕ уынаффӕтӕм Дын бӕллын, Дӕ рӕстадмӕ гӕсгӕ мын цард балӕвар кӕн.

⁴¹О Дунедарӕг, Дӕ хӕрзтӕй мӕ схайджын кӕн, Дӕ ныхасмӕ гӕсгӕ мӕ фервӕзын кӕн,

⁴²ӕмӕ ӕз дзуапп ратдзынӕн мӕ фыдгойгӕнджытӕн, уымӕн ӕмӕ Дӕ ныхасыл дарын мӕ зӕрдӕ.

⁴³Ма мын фӕмӕнг кӕн мӕ ныхас — Дӕ раст тӕрхонӕй ныфс ӕвӕрын мӕхицӕн

⁴⁴ӕмӕ Де ’Гъдау ӕххӕст кӕндзынӕн кӕддӕриддӕр, мыггагӕй-мыггагмӕ.

⁴⁵Сӕрибарӕй цӕудзынӕн ӕз, уымӕн ӕмӕ Дӕ уынаффӕтӕ бацагуырдтон.

⁴⁶Дзурдзынӕн паддзӕхтӕн Дӕ ныстуантӕ ӕмӕ нӕ фегад уыдзынӕн.

⁴⁷Ӕхцон мыст сты Дӕ фӕдзӕхстытӕ, уымӕн ӕмӕ мын уарзон сты.

⁴⁸Дӕ фӕдзӕхстытӕм иваздзынӕн мӕ цӕнгтӕ, уымӕн ӕмӕ сӕ бауарзтон, хъуыды кӕндзынӕн Дӕ уагӕвӕрдтыл.

⁴⁹Дӕ зӕрдыл ӕрлӕууын кӕн, мӕнӕн, Дӕ цагъарӕн, цы ныхас загътай, уый, цӕмӕй мын уыцы дзырд ныфсӕвӕрӕн суа.

⁵⁰Мӕ сау бон мӕ уыцы ныхас барӕвдаудзӕн, Дӕ ныхас мӕ раздахдзӕни цардмӕ.

⁵¹Сӕхи мыл худӕгӕй хӕссынц хъалтӕ, фӕлӕ ӕз Де ’Гъдауыл никуы атигъ кодтон мӕхи.

⁵²О Дунедарӕг, мӕ зӕрдыл дарын Дӕ рагон ӕгъдӕуттӕ ӕмӕ мын ныфсы хос сты уыдон.

⁵³Де ’Гъдауыл йӕ къух чи ауыгъта, уыцы ӕнаккӕгтӕм кӕсгӕйӕ, мӕ сӕры хъуын арц слӕууы.

⁵⁴Кӕйдӕр зӕххыл мын фыдыбӕсты зарӕг басгуыхтысты Дӕ уагӕвӕрдтӕ.

⁵⁵Ӕхсӕвыгӕтты ӕрымысын Дӕ ном, Дунедарӕг, ӕз Де ’Гъдауыл хӕцын.

⁵⁶Уый мын сси царды фӕтк — Дӕ уагӕвӕрдтӕм гӕсгӕ цӕрын.

⁵⁷Дӕ ныхас Дын ӕххӕст кӕнын ӕмӕ дзурын: «Дунедарӕг — мӕ исбон».

⁵⁸Ӕппӕт зӕрдӕйӕ Дӕ курын, батӕригъӕд мын кӕн Дӕ ныхасмӕ гӕсгӕ.

⁵⁹Мӕ фӕндӕгтыл ныссагъӕс кодтон, мӕ къахдзӕфтӕ Дӕ амындтытӕм сарӕзтон.

⁶⁰Ӕз тагъд кодтон Дӕ фӕдзӕхстытӕ ӕвӕстиатӕй ӕххӕст кӕнынмӕ.

⁶¹Ӕнӕхуыцӕутты ахӕсты фӕдӕн, фӕлӕ Де ’Гъдау рохуаты нӕ ныууагътон.

⁶²Ӕмбисӕхсӕв рабадын, цӕмӕй Дын скад кӕнон Дӕ раст тӕрхӕтты тыххӕй.

⁶³Дӕуӕй чи тӕрсы ӕмӕ Дын Дӕ уынаффӕтӕ чи ӕххӕст кӕны — хӕлар дӕн ӕз ӕппӕт уыдонӕн.

⁶⁴Дунедарӕг, йемыдзаг у зӕхх Дӕ уарзтӕй, бацамон мын Дӕ уагӕвӕрдтӕ.

⁶⁵Мӕнӕн, Дӕ цагъарӕн, Ды саккаг кодтай Дӕ хӕрзтӕ — Дӕ дзырдмӕ гӕсгӕ, Дунедарӕг.

⁶⁶Хорз зонд мы бацамон ӕмӕ мӕ скӕн ӕмбаргӕ, срухс мын кӕн мӕ зонд, мӕ зӕрдӕ мын байгом кӕн зондӕн, уымӕн ӕмӕ ӕз дӕ фӕдзӕхстытыл ӕууӕндын.

⁶⁷Мӕ хъизӕмӕртты агъоммӕ ӕз адзӕгъӕл дӕн рӕдыд фӕндагыл, ныр та ӕххӕст кӕнын Дӕ дзырд.

⁶⁸Хӕрзаудӕг ӕмӕ хӕрзгӕнӕг дӕ Ды, Дӕ уагӕвӕрдтӕ мын бацамон.

⁶⁹Хъалтӕ мыл тауыстӕ кӕнынц, ӕз та зӕрдиагӕй ӕххӕст кӕндзынӕн Дӕ уагӕвӕрдтӕ.

⁷⁰Уыдонӕн сӕ зӕрдӕтӕ фыр нӕрдӕй фиу сӕвӕрдтой, мӕнӕн та мӕ зӕрдӕ Де ’Гъдауыл лӕууы.

⁷¹Хуыздӕрӕн мын уыдысты мӕ хъизӕмӕрттӕ, цӕмӕй Дӕ уагӕвӕрдтыл сахуыр уон.

⁷²Дӕ дзыхӕй рацӕугӕ Ӕгъдау мын ӕвзист ӕмӕ сыгъзӕрины мингай къӕрттытӕй зынаргъдӕр у.

⁷³Дӕ къухтӕ мӕ сфӕлдыстой ӕмӕ рантыстын кодтой; зонд мын бацамон, ӕмӕ ӕз бамбарон Дӕ фӕдзӕхстытӕ.

⁷⁴Дӕ тас кӕй ис, уыдонӕн ӕхсызгон уыдзӕн мӕ уынд, уымӕн ӕмӕ мӕ зӕрдӕ дарын Дӕ ныхӕстыл.

⁷⁵Зонын, Дунедарӕг, Дӕ тӕрхӕттӕ рӕстаг сты — афтӕ мын хъуыд, ӕмӕ мӕ уымӕн бафхӕрдтай.

⁷⁶Дӕ хорзӕх мӕ уӕд ныр, Ды мӕнӕн, дӕ цагъарӕн, зӕрдӕ куыд бавӕрдтай, афтӕ.

⁷⁷Дӕ хорзӕх мӕ уӕд, ӕмӕ цӕрдзынӕн, Де ’Гъдауыл лӕууы мӕ уд.

⁷⁸Ӕнаххосӕй мӕ чи ӕфхӕрдта — сӕгад уыдзысты уыцы ӕнӕввӕрсонтӕ, ӕз та хъуыды кӕндзынӕн Дӕ уагӕвӕрдтыл.

⁷⁹Ӕрбалӕудзысты мӕ фарсмӕ, Дӕ тас кӕй ис ӕмӕ Дӕ уынаффӕтӕ чи зоны, уыдон.

⁸⁰Дӕ уагӕвӕрдтӕм гӕсгӕ ӕнаипп уӕд мӕ зӕрдӕ, ӕмӕ уӕд нӕ фегад уыдзынӕн.

⁸¹Утӕхсӕн кӕны мӕ уд, Дӕ ирвӕзындзинадмӕ ӕнхъӕлмӕ кӕсгӕйӕ; мӕ зӕрдӕ дарын Дӕ ныхасыл.

⁸²Мӕ цӕстытӕ ныуурс сты Дӕ дзуапмӕ, фӕзӕгъын ӕз: «Мӕ зӕрдӕ мын кӕд фӕлӕууын кӕндзынӕ?»

⁸³Фӕздӕгдзыд лалымӕй уӕлдай нал дӕн, фӕлӕ нӕ ферох кодтон Дӕ уагӕвӕрдтӕ.

⁸⁴Дӕ цагъарӕн ма цас баззади йӕ царды бонтӕй? Мӕ сурджытӕн кӕд стӕрхон кӕндзынӕ?

⁸⁵Сӕрыстыртӕ мын ингӕн скъахтой, Де ’Гъдау сӕм нымады дӕр нӕу.

⁸⁶Дӕ фӕдзӕхстытӕ иууылдӕр ӕцӕг сты; ӕнаххосӕй мӕ сурынц, баххуыс мын кӕн!

⁸⁷Чысыл ма хъӕуа, фесафой мӕ зӕххы цъарӕй, фӕлӕ ӕз Дӕ уагӕвӕрдтӕ нӕ ныууагътон.

⁸⁸Дӕ хорзӕх мӕ уӕд, ӕмӕ мын цард балӕвар кӕн, цӕмӕй дӕ уагӕвӕрдтӕ ӕххӕст кӕнон мӕ царды.

⁸⁹Дӕ ныхас, о Дунедарӕг, мыггамӕ фидаргонд у уӕлӕрвты.

⁹⁰Дӕ иузӕрдиондзинад — фӕлтӕрӕй фӕлтӕрмӕ. Де сфидар кодтай зӕхх ӕмӕ лӕууы.

⁹¹Дӕ дзырдӕй лӕууы алцы нырмӕ, алцы Дӕуӕн лӕггад кӕны.

⁹²Де ’Гъдауыл куынӕ лӕууид мӕ зӕрдӕ, уӕд ӕз мӕ фыдбылызты бабын уыдаин.

⁹³Мыггагмӕ мӕ зӕрдыл дардзынӕн Дӕ уагӕвӕрдтӕ — цард мын уыдоны фӕрцы дӕттыс.

⁹⁴Дӕу дӕн ӕз, фервӕзын мӕ кӕн — Дӕ уагӕвӕрдтӕм у ме скаст.

⁹⁵Ӕнаккӕгтӕ бабадтысты мӕ размӕ, цӕмӕй мӕ фесафой, ӕз та арфдӕр хъуыды кӕнын Дӕ уагӕвӕрдтыл.

⁹⁶Ӕххӕст цыдӕриддӕр у — алцӕмӕн дӕр ис кӕрон, ӕнӕкӕрон сты ӕрмӕст Дӕ фӕдзӕхстытӕ.

⁹⁷Куыд Дын уарзын Де ’Гъдау! Бон-сауизӕрмӕ йыл хъуыды кӕнын.

⁹⁸Ӕдзухдӕр мемӕ ис Дӕ фӕдзӕхст — уый фӕрцы мыл зондӕй нӕ фӕтых сты ме знӕгтӕ.

⁹⁹Ӕз мӕ ахуыргӕнджыты се ’ппӕты дӕр амбылдтон зондӕй, уымӕн ӕмӕ Дӕ дзырд никуы схицӕн мӕ хъуыдыйӕ.

¹⁰⁰Ӕз ӕмбаргӕдӕр дӕн кардзыдтӕй, уымӕн ӕмӕ ӕххӕст кӕнын Дӕ уагӕвӕрдтӕ.

¹⁰¹Мӕхи хизын алы фыдвӕндагӕй, цӕмӕй коммӕгӕс уон Дӕ ныхасӕн.

¹⁰²Дӕ уынаффӕтӕй иуварс не здӕхын, уымӕн ӕмӕ Ды ахуыр кӕныс мӕн.

¹⁰³Куыд ӕхцон сты ме ’взагӕн Дӕ ныхӕстӕ, уыдон мӕ комы адджындӕр сты мыдӕй!

¹⁰⁴Дӕ амындтытӕ мӕ скӕнынц ӕмбаргӕ, уымӕ гӕсгӕ мын ӕнӕуынон у мӕнгдзинады алы фӕндаг дӕр.

¹⁰⁵Дӕ ныхас мӕ развӕдӕн — цырагъау, рухс мын кӕны мӕ фӕндаг.

¹⁰⁶Ӕз сомы бакодтон Дӕ рӕстаг ӕгъдӕуттӕ мӕ зӕрдӕйы хӕссынӕй, ӕмӕ мӕ сомы сӕххӕст кӕндзынӕн.

¹⁰⁷Уӕззау ӕфхӕрд баййӕфтон; цард мын балӕвар кӕн Дӕ ныхасмӕ гӕсгӕ, Дунедарӕг.

¹⁰⁸Мӕ комӕй мын мӕ бархийы нывонд айс, сахуыр мӕ кӕн Дӕ уагӕвӕрдтыл, Дунедарӕг.

¹⁰⁹Ӕрдуйӕ нарӕгдӕр сси мӕ уд, фӕлӕ нӕ ферох кодтон Де ’Гъдау.

¹¹⁰Ӕнаккӕгтӕ мын ахсӕн хыз сӕвӕрдтой мӕ размӕ, фӕлӕ ӕз нӕ ахызтӕн Дӕ амындтыты сӕрты.

¹¹¹Дӕ фӕдзӕхстытӕ мӕ исбон сты мыггагмӕ, уыдон сты мӕ зӕрдӕйы цин.

¹¹²Ӕз сфӕнд кодтон мыггагмӕ Дӕ уагӕвӕрдтӕм гӕсгӕ цӕрын.

¹¹³Дыдзӕсгӕмттӕ ӕнӕуынон сты мӕнӕн, Де ’Гъдау та Дын уарзын.

¹¹⁴Ды мӕнӕн — ме ’мбӕхсӕн мӕсыг, Дӕ ныхасыл мӕ зӕрдӕ дарын.

¹¹⁵Фыдгӕнджытӕ, ацӕут мӕ разӕй, мӕ Хуыцауы фӕдзӕхстытӕм гӕсгӕ цӕрдзынӕн.

¹¹⁶Фӕфидар мӕ кӕн Дӕ ныхасмӕ гӕсгӕ, ӕмӕ цӕрдзынӕн; мӕхицӕн ныфс цӕмӕй ӕвӕрын, уымӕй мӕ фыдӕнхъӕл ма фӕкӕн.

¹¹⁷Ме ’нцой фӕлӕуу, цӕмӕй фервӕзон, ӕмӕ ӕдзух ахуыр кӕндзынӕн Дӕ уагӕвӕрдтӕ.

¹¹⁸Дӕ уагӕвӕрдты сӕрты чи ахызти, уыдоныл Ды атигъ кодтай Дӕхи, уымӕн ӕмӕ сӕ хинвӕндтӕ мӕнгард сты.

¹¹⁹Ды цъӕмӕлтау аиуварс кодтай ӕгас зӕххы фыдлӕгты, мӕнӕн та уарзон сты Дӕ уагӕвӕрдтӕ.

¹²⁰Ризы мӕ буар фыр тӕссӕй Дӕ разы, тӕрсын Дӕ тӕрхонӕй.

¹²¹Ӕз цардтӕн Ӕгъдау ӕмӕ рӕстдзинадмӕ гӕсгӕ, ме знӕгты къухтӕм мӕ ма ратт.

¹²²Дӕ цагъарӕн фӕрныгадӕй ныфс бавӕр, хъалтӕ мӕ куыннӕ ӕфхӕрой, афтӕ.

¹²³Ныуурс сты мӕ цӕстытӕ Де ’ххуысмӕ, Дӕ раст тӕрхоны уынаффӕмӕ.

¹²⁴Дӕ хорзӕхӕй схайджын кӕн Дӕ цагъары, Дӕ уагӕвӕрдтыл мӕ сахуыр кӕн.

¹²⁵Дӕ цагъар дӕн ӕз, скӕн мӕ ӕмбаргӕ ӕмӕ Дын ӕз Дӕ амындтытӕ базонон.

¹²⁶Ралӕууыд Дунедарӕгӕн Йӕ хъомыс равдисыны афон — Де ’Гъдауыл дын балӕгӕрстой къахӕй.

¹²⁷Мӕнӕн та Дӕ фӕдзӕхстытӕ ӕхцондӕр сты сыгъзӕринӕй, сыгъдӕг сыгъзӕринӕй.

¹²⁸Ӕз Де ’ппӕт уынаффӕтӕ растыл нымайын — цӕвӕрфӕнды мӕнгдзинады фӕндаг дӕр ӕнӕуынон у мӕнӕн.

¹²⁹Дӕ уагӕвӕрдтӕ диссаг сты, уымӕн сӕ дарын мӕ зӕрдӕйы.

¹³⁰Дӕ дзырды раргом тауы рухс, хуымӕтӕг адӕмы скӕны ӕмбаргӕ.

¹³¹Адӕргӕй мын улӕфт нал фаг кӕны, афтӕ бӕллын Дӕ фӕдзӕхстытӕм.

¹³²Ӕркӕс мӕм ӕмӕ мын батӕригъӕд кӕн, Дӕ ном чи уарзы, ӕппӕт уыдонау.

¹³³Дӕ ныхасӕй мын сфидар кӕн мӕ къахдзӕфтӕ, фыддзинады амӕттаг мӕ ма фӕкӕн.

¹³⁴Адӕмы ӕфхӕрдӕй мӕ бахиз, ӕмӕ ӕххӕст кӕндзынӕн Дӕ уагӕвӕрдтӕ.

¹³⁵Срухс кӕн Дӕ цагъары Дӕ цӕсгомы рухсӕй, Дӕ уагӕвӕрдтӕ мын раргом кӕн.

¹³⁶Адӕм не ’ххӕст кӕнынц Де ’Гъдау, ӕмӕ уый тыххӕй мӕ цӕстытӕй кӕлынц цӕссыджы суадӕттӕ.

¹³⁷Рӕстаг дӕ Ды, Дунедарӕг, ӕмӕ раст сты Дӕ уынаффӕтӕ.

¹³⁸Дӕ фӕдзӕхстытӕ раст сты, сӕ бындуры — ӕххӕст ӕцӕгад.

¹³⁹Мастӕй мӕ зӕрдӕ йедзаг у, уымӕн ӕмӕ мӕ фыдгултӕй ферох сты Дӕ ныхӕстӕ.

¹⁴⁰Сыгъдӕг згъӕрау у Дӕ дзырд ӕмӕ йӕ уарзын ӕз, Дӕ цагъар.

¹⁴¹Ӕз ницӕйаг ӕмӕ ӕлгъаг дӕн, фӕлӕ нӕ ферох кодтон Дӕ уагӕвӕрдтӕ.

¹⁴²Дӕ рӕстдзинад — ӕнусон рӕстдзинад, Де ’Гъдау — ӕцӕгдзинад.

¹⁴³Маст ӕмӕ бӕллӕхы бын фӕдӕн, фӕлӕ мын Дӕ фӕдзӕхстытӕ цин хӕссынц.

¹⁴⁴Дӕ уынаффӕтӕ раст сты мыггагмӕ, ӕмбарынад мын ратт, ӕмӕ цӕрон.

¹⁴⁵Ӕппӕт зӕрдӕйӕ Дӕм дзыназын: фехъус мӕ, о Дунедарӕг, ӕмӕ уыдзынӕн коммӕгӕс Дӕ уагӕвӕрдтӕн.

¹⁴⁶Кувын Дӕм: фервӕзын мӕ кӕн, ӕмӕ Дын ӕз ӕххӕст кӕндзынӕн Дӕ уагӕвӕрдтӕ.

¹⁴⁷Боныцъӕхтӕй раздӕр Дӕм ӕххуысагур дзыназын ӕз, Дӕ ныхасыл мӕ зӕрдӕ дарын.

¹⁴⁸Хурыскастмӕ дӕр нал фӕлӕууын, ӕхсӕвдарӕй хъуыды кӕнын Дӕ ныхасыл.

¹⁴⁹Дунедарӕг, фехъус мын мӕ хъӕлӕс Де стыр хорзӕхы фӕрцы, ӕмӕ мын цард балӕвар кӕн Дӕ раст тӕрхонмӕ гӕсгӕ.

¹⁵⁰Ӕрбаввахс сты фыдгӕнджытӕ; куыд дард сты уыдон Де ’Гъдауӕй!

¹⁵¹Хӕстӕг дӕ Ды, Дунедарӕг, ӕцӕгдзинад ис Де ’ппӕт фӕдзӕхстыты.

¹⁵²Рагӕй мын зындгонд сты Дӕ уагӕвӕрдтӕ, Ды сӕ сфидар кодтай мыггагмӕ.

¹⁵³Ӕркӕс мын мӕ дудгӕбонмӕ ӕмӕ мӕ фервӕзын кӕн, уымӕн ӕмӕ Дын ӕз Де ’Гъдау нӕ ферох кодтон.

¹⁵⁴Мӕ хъуыддаг мын равзар, бахъахъхъӕн мӕ ӕмӕ мын царды бонтӕ балӕвар кӕн.

¹⁵⁵Ӕнӕхуыцӕуттӕй ирвӕзындзинад дард у — уыдон Дӕ уагӕвӕрдтӕ ницӕмӕ дарынц.

¹⁵⁶О Дунедарӕг, нӕй кӕрон дӕ хӕрзтӕн; царды бонтӕ мын балӕвар кӕн Дӕ раст тӕрхонмӕ гӕсгӕ.

¹⁵⁷Мӕ сурджытӕ ӕмӕ мӕ фыдгултӕ бирӕ сты, фӕлӕ иуварс не здӕхын Дӕ уагӕвӕрдтӕй.

¹⁵⁸Ӕлгъаг мын сты, Дӕу чи ныууагъта, Дӕ ныхасӕн Дын коммӕгӕс чи нӕу, уыдон.

¹⁵⁹Ӕркӕс, куыд уарзон сты мӕнӕн Дӕ фӕдзӕхстытӕ, Дунедарӕг! Царды бонтӕ мын балӕвар кӕн Дӕ хорзӕхмӕ гӕсгӕ.

¹⁶⁰Дӕ ныхасы бындур — ӕцӕгад, ӕнусон ӕмӕ раст сты Дӕ тӕрхӕттӕ.

¹⁶¹Ӕнаххосӕй мӕ фӕдыл зилынц ӕлдӕрттӕ, фӕлӕ мӕ зӕрдӕ аргъуыц кӕны Дӕ дзырды раз.

¹⁶²Ӕз цин кӕнын Дӕ ныхасыл раст цыма стыр ӕфтиаг райстон, уыйау.

¹⁶³Мӕнгдзинад мын ӕнӕуынон, ӕлгъаг у, Де ’Гъдау та Дын уарзын.

¹⁶⁴Бон авд хатты кад кӕнын Дӕуӕн Дӕ раст тӕрхӕтты тыххӕй.

¹⁶⁵Фарн ис, Де ’Гъдау чи уарзы, уыдонимӕ, ӕмӕ сын фӕцудынӕй тас нӕу.

¹⁶⁶Дӕ ирвӕзындзинадыл дарын мӕ зӕрдӕ, Дунедарӕг, ӕххӕст кӕнын Дӕ фӕдзӕхстытӕ.

¹⁶⁷Мӕ уды рӕбын хъахъхъӕнын Дӕ фӕдзӕхстытӕ, ӕмӕ сӕ уарзын ӕппӕт зӕрдӕйӕ.

¹⁶⁸Ӕххӕст кӕнын Дӕ уагӕвӕрдтӕ ӕмӕ Дӕ фӕдзӕхстытӕ, мӕ алы фӕндаг — Дӕ цӕстыты раз.

¹⁶⁹О Дунедарӕг, мӕ дзыназын мын фехъус Дӕ ныхасмӕ гӕсгӕ мын ӕмбарынад ратт.

¹⁷⁰Айс мын мӕ куывд, Дӕ ныхасмӕ гӕсгӕ мӕ фервӕзын кӕн.

¹⁷¹Мӕ комӕй стауӕн ныхас рацӕудзӕн, Де ’гъдӕуттӕ мын куы бацамонай, уӕд.

¹⁷²Ме ’взагӕй райхъуысдзӕни Дӕ дзырд, уымӕн ӕмӕ Дӕ фӕдзӕхстытӕ иууылдӕр раст сты.

¹⁷³Дӕ цонг мын ӕххуысгӕнӕг уӕд, Дӕ уагӕвӕрдтӕм гӕсгӕ цӕрын.

¹⁷⁴Дунедарӕг, Дӕ ирвӕзындзинадмӕ бӕллын, Де ’Гъдауӕй ныфс ӕвӕрын мӕхицӕн.

¹⁷⁵Цӕрӕд мӕ уд ӕмӕ Дӕ стауӕд, ӕххуысгӕнӕг мын уӕд Дӕ уынаффӕтӕ.

¹⁷⁶Ӕз фӕндаг нал арын дзӕгъӕл фысау. Дӕ цагъары ӕрцагур, уымӕн ӕмӕ ӕз Дӕ фӕдзӕхстытӕ нӕ ферох кодтон ӕз.