Read Хуыцауы Дзырд иронау Псаломттӕ 13 Bible Online

Псаломттӕ 13 - Хуыцауы Дзырд иронау bible

Псаломттӕ 13

¹Зарӕггӕнджыты къорды разамонӕгӕн. Давиды псалом. Ӕнӕзонд йӕ мидзӕрдӕйы загъта: «Хуыцау нӕй!» Фехӕлдысты адӕм, ӕлгъаг митӕ кӕнынц, хорз хъуыддаг аразӕг нал ис.

²Дунедарӕг уӕларвӕй фӕлгӕсы адӕммӕ, кӕсы: цымӕ се ’хсӕн, Хуыцауы чи агуры, иу ахӕм ӕмбаргӕ адӕймаг ис?

³Се ’ппӕт дӕр адзӕгъӕл сты, се ’ппӕт дӕр фехӕлдысты, хорздзинад ничи кӕны, иунӕг адӕймаг дӕр.

⁴Ау, не ’рӕмбардзысты фыдгӕнджытӕ, мӕ адӕмы мын дзулы хӕрд чи кӕны ӕмӕ Дунедарӕджы чи нӕ агуры, уыдон?

⁵Фыр тӕссӕй риздзысты, уымӕн ӕмӕ Хуыцау рӕстгӕнджытимӕ ис.

⁶Сымах худтыстут мӕгуырыл, фӕлӕ йӕ Дунедарӕг хъахъхъӕны.

⁷Тӕхуды ӕмӕ Израилӕн ирвӕзындзинад лӕвӕрд куы ’рцӕуид Сионӕй! Дунедарӕг Йӕ адӕмы уацарӕй куы раздаха, уӕд ныццин кӕндзӕни Йаков, уӕд Израил фыр цинӕй райдзӕн!