Read Хуыцауы Дзырд иронау Псаломттӕ 135 Bible Online

Псаломттӕ 135 - Хуыцауы Дзырд иронау bible

Псаломттӕ 135

¹Стаут Дунедарӕджы, уымӕн ӕмӕ ныл Уый ауды, Йӕ хорзӕх мыггагмӕ у.

²Стаут хуыцӕутты Хуыцауы — Йӕ хорзӕх мыггагмӕ у.

³Стаут барджынты Барджыны — Йӕ хорзӕх мыггагмӕ у.

⁴Ӕвӕджиауы диссӕгтӕ ӕрмӕстдӕр Уый аразы — Йӕ хорзӕх мыггагмӕ у.

⁵Уый Йӕ уӕлзонды фӕрцы сфӕлдыста уӕлӕрвтӕ — Йӕ хорзӕх мыггагмӕ у;

⁶дӕтты сӕрмӕ айтыгъта зӕхх — Йӕ хорзӕх мыггагмӕ у;

⁷стыр рухсгӕнӕнтӕ сфӕлдыста — Йӕ хорзӕх мыггагмӕ у.

⁸Уый сфӕлдыста хур — бонӕн уаг ӕвӕрынӕн — Йӕ хорзӕх мыггагмӕ у;

⁹мӕй ӕмӕ стъалытӕ — ӕхсӕвӕн уаг ӕвӕрынӕн — Йӕ хорзӕх мыггагмӕ у.

¹⁰Уый Мысыры зӕххыл бабын кодта фыццаггуырдты — Йӕ хорзӕх мыггагмӕ у;

¹¹ракодта уырдыгӕй Израилы адӕмы — Йӕ хорзӕх мыггагмӕ у.

¹²Уый Йӕ къухӕй, Йӕ хъомысджын къухӕй стыр хъуыддӕгтӕ сарӕзта — Йӕ хорзӕх мыггагмӕ у;

¹³Сырх денджызы дон фӕцӕуын кодта фӕйнӕрдӕм — Йӕ хорзӕх мыггагмӕ у;

¹⁴ӕмдзӕхгӕр сис-уылӕнты ’хсӕнты Израилы адӕмы ракодта — Йӕ хорзӕх мыггагмӕ у;

¹⁵фараоны ӕд ӕфсад Сырх денджызы фӕдӕлдон кодта — Йӕ хорзӕх мыггагмӕ у;

¹⁶Йӕ адӕмы ахизын кодта ӕдзӕрӕг быдырыл — Йӕ хорзӕх мыггагмӕ у;

¹⁷стыр паддзӕхты бабын кодта — Йӕ хорзӕх мыггагмӕ у.

¹⁸Уый амардта хъомысджын паддзӕхты — Йӕ хорзӕх мыггагмӕ у;

¹⁹аморӕгты паддзах Сигоны — Йӕ хорзӕх мыггагмӕ у;

²⁰Башаны паддзах Огы — Йӕ хорзӕх мыггагмӕ у;

²¹сӕ зӕххытӕ сын радта исбонӕн — Йӕ хорзӕх мыггагмӕ у;

²²Йӕ лӕггадгӕнӕгӕн, Израилӕн сӕ исбонӕн радта — Йӕ хорзӕх мыггагмӕ у.

²³Не ’фхӕрды заман нӕ Дунедарӕг ӕрымысыд — Йӕ хорзӕх мыггагмӕ у;

²⁴не знӕгтӕй нӕ фервӕзын кодта — Йӕ хорзӕх мыггамӕ у.

²⁵Уый алы цӕрӕг удӕн хойраг дӕтты — Йӕ хорзӕх мыггамӕ у.

²⁶Стаут уӕларвы Хуыцауы — Йӕ хорзӕх мыггамӕ у.