Read Хуыцауы Дзырд иронау Псаломттӕ 144 Bible Online

Псаломттӕ 144 - Хуыцауы Дзырд иронау bible

Псаломттӕ 144

¹Давиды кады зарӕг. Кад Дын кӕндзынӕн, мӕ Хуыцау ӕмӕ мӕ Паддзах, Дӕ ном Дын стаудзынӕн мыггагмӕ.

²Ӕрвылбон Дын кад кӕндзынӕн, мыггагмӕ Дын ӕппӕлдзынӕн дӕ номӕй.

³Стыр у Дунедарӕг ӕмӕ у ӕппӕлыны аккаг, зонд не ’ххӕссы йе стырадыл.

⁴Иу фӕлтӕр иннӕмӕн ӕппӕлдзӕни Дӕ хъуыддӕгтӕй, Дӕ хъомысы кой кӕндзӕни.

⁵Мӕ хъуыдытӕ уыдзысты Дӕ рухс ӕмӕ Дӕ кадыл, Де стырадыл, Дӕ диссӕгтыл.

⁶Дӕ карз хъуыддӕгтӕн адӕм сӕ хъомысы кой кӕндзысты, ӕмӕ ӕз Де стырадыл дзурдзынӕн.

⁷Де стыр хорзӕхты кой дын ракӕндзысты, Дӕ рӕстдзинад Дын стаудзысты.

⁸Рӕдау ӕмӕ фӕлмӕнзӕрдӕ у Дунедарӕг, бирӕбыхсаг у, ӕнӕкӕрон Йӕ уарзт.

⁹Дунедарӕг дзӕбӕх цӕстӕй кӕсы алкӕмӕ дӕр, Йӕ хорзӕх ӕруадзы Йе ’ппӕт скондыл.

¹⁰Дӕ алы фӕлдисонд дӕр, Дунедарӕг, кад кӕны Дӕуӕн, Дӕ сыгъдӕджытӕ Дын арфӕ кӕнӕнт.

¹¹Уыдон дзурдзысты Дӕ паддзахады кадыл, Дӕ хъомысы кой кӕндзысты,

¹²цӕмӕй адӕмӕн раргом уа Дӕ хъомыс, Дӕ паддзахады кад ӕмӕ стырад.

¹³Дӕ паддзахдзинад у ӕнусон, Ды паддзахиуӕг кӕндзынӕ фӕлтӕрӕй фӕлтӕрмӕ.

¹⁴Чи фӕкӕлы, уыдонӕн Дунедарӕг у фӕхӕцӕг, чи афӕлдӕхт, уый фӕстӕмӕ слӕууын кӕны йӕ къӕхтыл.

¹⁵Алкӕмӕн дӕр йӕ каст Дӕумӕ у, алкӕмӕн дӕр йӕ афоныл хойраг раттыс.

¹⁶Байгом кӕныс Дӕ арм ӕмӕ алы цардуды дӕр бафсадыс йӕ зӕрдӕйы фӕндиаг.

¹⁷Дунедарӕг Йӕ алы фӕндаджы дӕр рӕстаг у, Йӕ алы хъуыддаджы дӕр — хӕрзаудӕг.

¹⁸Дунедарӕг хӕстӕг у, чи Йӕ агуры, уыдонмӕ, рӕстзӕрдӕйӕ Йӕм чи кувы, уыдонмӕ се ’ппӕтмӕ дӕр.

¹⁹Чи Дзы тӕрсы, уыдонӕн ӕххӕст кӕны сӕ фӕндтӕ, сӕ дзыназын сын хъусы ӕмӕ сӕ фервӕзын кӕны.

²⁰Дунедарӕг, чи Йӕ уарзы, уыдоны се ’ппӕты дӕр хъахъхъӕны, ӕнаккӕгты та фесафдзӕн.

²¹Дунедарӕгӕн кады ныхӕстӕ уыдзысты мӕ былалгъыл. Алы цӕрӕг уд дӕр кад кӕнӕд мыггагмӕ Дунедарӕджы уаз номӕн.