Read Хуыцауы Дзырд иронау Псаломттӕ 16 Bible Online

Псаломттӕ 16 - Хуыцауы Дзырд иронау bible

Псаломттӕ 16

¹Давиды куывд. Дунедарӕг, мӕ раст уд Де уазӕг, фехъус мын мӕ дзыназын! Мӕ куывд мын айс — сайгӕ куынӕ кӕны ме ’взаг!

²Тӕрхонгӕнӕг мын фӕу, Дӕ цӕстытӕ рӕстдзинадмӕ ӕркӕсӕнт.

³Басгӕрстай мын мӕ зӕрдӕ, ӕхсӕвыгон мӕ бафӕлвӕрдтай ӕмӕ мӕм ницы ссардтай хӕрамӕй: мӕ хъуыдытӕ нӕ хицӕн кӕнынц мӕ ныхӕстӕй.

⁴Адӕмӕн сӕ бар сӕхи у, фӕлӕ ӕз Дӕ дзырды сӕрты никуы ахызтӕн, мӕхи хъахъхъӕдтон фыдгӕнӕджы фӕндӕгтӕй.

⁵Фидар къахдзӕфтӕй цӕуын Дӕ фӕндӕгтыл, Дӕ фӕдыл цӕуын ӕмӕ нӕ цудын.

⁶Дӕумӕ сидын, Хуыцау, уымӕн ӕмӕ мын Ды дзуапп ратдзынӕ. Дӕ хъус мӕм ӕрдар, фехъус мын мӕ куывд!

⁷Де стыр хорзӕх ма бахӕлӕг кӕн, йӕхи Дыл чи бафӕдзӕхста, уыдонӕн, Дӕ рахиз къухӕй сӕ бахиз фыдгулӕй.

⁸Цӕсты гагуыйау мӕ хъахъхъӕн, Дӕ базыры бын мӕ бааууон кӕн

⁹ӕнӕхуыцау лӕбурджытӕй, чи мыл ӕрхъула кодта, уыцы знӕгтӕй.

¹⁰Уыдон фырнӕрдӕй фӕйнӕрдӕм тонынц, схъӕл ныхас кӕнынц.

¹¹Мӕ фӕдыл зылдысты, ӕмӕ сӕ къӕппӕджы бахаудтӕн, сӕ цӕстытӕ мӕм ныззынг кодтой — хъуамӕ мӕ афӕлдахой зӕххыл.

¹²Тугмондаг домбайау гӕппӕввонгӕй лӕууынц, мадӕл домбайау мӕ се ’мбӕхсӕнӕй хъахъхъӕнынц.

¹³Рахӕц мӕ сӕрыл, Дунедарӕг! Сӕ ныхмӕ рацу, Дӕ кардӕй сӕ афӕлдах, ӕнӕхуыцӕуттӕй мӕ бахиз.

¹⁴Дӕхи къухӕй мӕ фервӕзын кӕн ацы адӕмӕй, Дунедарӕг, Де ’вӕрӕнты бӕркадӕй йедзаг кӕмӕн сты сӕ гуыбынтӕ, ӕмӕ ма дзы сӕ цот ӕмӕ уыдоны цоты фаг дӕр кӕмӕн баззайдзӕн.

¹⁵Ӕз та ӕназым — фендзынӕн Дӕ цӕсгом, куы-иу райхъал уон, уӕд ӕфсӕддзынӕн Дӕ фӕлгонцӕй.