Read Хуыцауы Дзырд иронау Псаломттӕ 17 Bible Online

Псаломттӕ 17 - Хуыцауы Дзырд иронау bible

Псаломттӕ 17

¹Зарӕггӕнджыты къорды разамонӕгӕн. Дунедарӕджы цагъар Давиды зарӕг Дунедарӕгыл. Скодта йӕ, Дунедарӕг ӕй йе ’ппӕт фыдгултӕ ӕмӕ Саулӕй куы фервӕзын кодта, уӕд.

²Уарзын Дӕ, Дунедарӕг, Ды мӕ хъару дӕ!

³Дунедарӕг — мӕ къӕдзӕх, мӕ фидар, мӕ ирвӕзынгӕнӕг! Мӕ Хуыцау — мӕ айнӕг къӕдзӕх, мӕ уарт, мӕ ирвӕзӕн хох, мӕ фидар гӕнах!

⁴Ӕз кадджын Дунедарӕгмӕ фӕсиддзынӕн ӕмӕ фервӕздзынӕн ме знӕгтӕй.

⁵Ӕрбалвӕстой мӕ мӕлӕты рӕхыстӕ, ныккалдысты мыл фыдӕхы гуылфӕнтӕ,

⁶мӕрдтыбӕсты рӕхыстӕ мӕ ӕрбалхъывтой, мӕлӕты къӕппӕг мын мӕ развӕндаг ӕхгӕны.

⁷Мӕ тыхстӕй ӕз Дунедарӕгмӕ скуывтон, мӕ Хуыцаумӕ сдзынӕзтон. Йӕ Кувӕндонӕй фехъуыста мӕ хъӕлӕс, сыхъуысти Йӕм мӕ дзыназын.

⁸Ныррызт ӕмӕ нынкъуысти зӕхх, хӕхтӕ фенкъуыстысты сӕ бындурӕй, ризӕг сыл бахӕцыд Йӕ азарӕй.

⁹Фӕздӕг калди Йӕ фындзы хуынчъытӕй, Йӕ комӕй арт бырста, зынджы стъӕлфӕнтӕ калдысты Йӕ алыварс.

¹⁰Арвы къӕй ӕртасын кодта ӕмӕ ӕрхызти дӕлӕмӕ, Йӕ къӕхты бын — саудалынг.

¹¹Сбадти херувимтыл ӕмӕ атахт, Йӕхи систа дымгӕйы базыртыл.

¹²Талынгӕй Йӕ алыварс скодта ӕмбӕрзӕн, саувадыг мигътӕ ӕртыхстысты Йӕ алыварс.

¹³Йе ’рттывдӕй мигътӕ тахтысты Йӕ разӕй — ихуард ӕмӕ зынджы стъӕлфӕнтӕ.

¹⁴Дунедарӕг ныннӕрыди уӕлӕрвты, Иууылбӕрзонды хъӕлӕс ныййазӕлыд — ихуард ӕмӕ зынджы стъӕлфӕнтӕ.

¹⁵Суагъта Йӕ фӕттӕ ӕмӕ ныххӕлиу кодта фыдгулты, арвӕрттывдӕй сӕ лидзӕг фӕкодта.

¹⁶Дӕ масты раулӕфтӕй, Дунедарӕг, Дӕ карз ӕртхъирӕнӕй, байгом сты донгуырӕнтӕ, зӕххы бындуртӕ разындысты.

¹⁷Дунедарӕг бӕрзондӕй ӕруагъта Йӕ къух ӕмӕ мӕ фелвӕста хуыдымӕй;

¹⁸фервӕзын мӕ кодта цыфыддӕр знагӕй, ӕнӕуынон кӕмӕн уыдтӕн ӕмӕ мӕхицӕй тыхджындӕр чи уыди, уыцы фыдгултӕй.

¹⁹Мӕ фыдбылызы бон мыл сӕхи куы ныццавтой, уӕд ме ’нцой фӕлӕууыди Дунедарӕг.

²⁰Ракодта мӕ ӕдас ранмӕ, Йӕ хорзӕх мӕ ис, ӕмӕ мӕ фервӕзын кодта.

²¹Хӕрзиуӕг мын радта Дунедарӕг мӕ рӕстадмӕ гӕсгӕ, мӕ къухты сыгъдӕгдзинадмӕ гӕсгӕ.

²²Уымӕн ӕмӕ ӕз цыдтӕн Йӕ фӕндӕгтыл, мӕ Хуыцауыл никуы сивтон мӕ зӕрдӕ.

²³Йӕ фӕдзӕхстытӕ иууылдӕр мӕ разы сты, Йӕ уагӕвӕрдты сӕрты никуы ахызтӕн.

²⁴Йӕ разы уыдтӕн ӕнӕкъӕм, мӕхи хызтон тӕригъӕд ракӕнынӕй.

²⁵Хӕрзиуӕг мын радта Дунедарӕг мӕ рӕстадмӕ гӕсгӕ, Йӕ разы сыгъдӕг кӕй дӕн, уымӕ гӕсгӕ!

²⁶Иузӕрдионыл Ды дӕр иузӕрдион дӕ, ӕнӕкъӕм чи у, уыимӕ — зӕрдӕхӕлар;

²⁷ӕнӕхин адӕймагӕн бафидыс йӕ сыгъдӕгдзинадмӕ гӕсгӕ, мӕнгардӕн та — йӕ мӕнгарддзинадмӕ гӕсгӕ.

²⁸Ды ӕфхӕрд адӕмы фервӕзын кӕныс, сӕрбӕрзонды ӕгады бынатмӕ ’руадзыс.

²⁹Ды мӕнӕн ссудзыс мӕ цырагъ; Дунедарӕг мын рухсӕй раивдзӕни мӕ талынг.

³⁰Ӕз Де ’ххуысы фӕрцы басӕттын ме знӕгты, мӕ Хуыцауимӕ схизын ӕнӕбасӕтгӕ сисмӕ.

³¹Хуыцауы фӕндаг ӕнӕфау ӕмӕ раст у, Йӕ ныхас — сыгъдӕг; йӕ зӕрдӕ йыл чидӕриддӕр дары, уыдонӕн Уый уарт у.

³²Уымӕн ӕмӕ Дунедарӕджы йеддӕмӕ кӕм ис ӕндӕр Хуыцау? Ӕмӕ нӕ Хуыцауы йеддӕмӕ ныфсы къӕдзӕх чи у?

³³Хуыцау мын ратты хъару, сраст мын кӕны мӕ фӕндаг;

³⁴саджы цӕрдӕгдзинад ратты мӕ къӕхтӕн, бӕрзӕндтыл мӕ ӕрлӕууын кӕны фидарӕй.

³⁵Мӕ къухтӕ мын сфӕлтӕрдта тохы, ӕрхуы ӕрдын тасы мӕ армы.

³⁶Ды радтай мӕнӕн Дӕ ирвӕзындзинады уарт, Дӕ хорзӕх мӕ сисы бӕрзонд.

³⁷Фидар у мӕ къахайст Дӕ фӕрцы, нӕ цуды мӕ къах.

³⁸Ӕз мӕ фыдгулты айсын мӕ разӕй, цалынмӕ сӕ нӕ ныццӕгъдын, уӕдмӕ фӕстӕмӕ нӕ раздӕхын.

³⁹Ныддӕрӕн сӕ кӕнын, ӕмӕ сӕ бон сыстын дӕр нал вӕййы, мӕ къӕхты бынмӕ ӕрхауынц.

⁴⁰Ды мӕнӕн тох кӕнынӕн хъару раттыс, ме знӕгты мын мӕ къӕхты бынмӕ ӕрӕппарыс.

⁴¹Лидзӕг сӕ фӕкодтай мӕ разӕй ӕмӕ ӕз ныццагътон ме сӕфтмӕ бӕлджыты.

⁴²Уыдон ӕххуысагур дзыназынц, фӕлӕ сын ирвӕзынгӕнӕг нӕй; Дунедарӕгмӕ хъӕрахст кӕнынц, фӕлӕ сын Уый дзуапп нӕ дӕтты.

⁴³Зӕххы рыгау сӕ дымгӕмӕ ныддардтон, уынгты цъыфау сӕ мӕ къӕхты бын бассӕстон.

⁴⁴Ды мӕ бахызтай дзыллӕйы змӕстытӕй, адӕмты сӕргъы мӕ сӕвӕрдтай ӕмӕ, зонгӕ дӕр кӕй нӕ кодтон, уыдон дӕр мын лӕггад кӕнынц ныр.

⁴⁵Ӕндӕрбӕстӕгтӕ козбау митӕ кӕнынц мӕ разы, ӕрмӕст мӕ койӕ дӕр басӕттынц,

⁴⁶зыр-зыргӕнгӕ се ’мбӕхсӕнтӕй рахилынц.

⁴⁷Цардӕгас у Дунедарӕг, арфӕгонд у мӕ ныфсы къӕдзӕх! Кадджын уӕд Хуыцау — мӕ ирвӕзынгӕнӕг!

⁴⁸Хуыцау — мӕ мастисӕг, адӕмты мын бакодта мӕ дӕлбар.

⁴⁹Ды мӕ фервӕзын кодтай ме знӕгтӕй, Дӕ фӕндонӕй фӕуӕлахиз дӕн фыдгултыл, фыдлӕгтӕй фервӕзтӕн Дӕ фӕрцы.

⁵⁰Адӕмты ’хсӕн Дӕ стаудзынӕн, Дунедарӕг, скадджын кӕндзынӕн Дӕ ном!

⁵¹Ды паддзахӕн стыр уӕлахизтӕ дӕттыс ӕмӕ мыггагмӕ аудыс Де ’взӕрст Давидыл ӕмӕ йӕ байзӕддӕгтыл.