Read Хуыцауы Дзырд иронау Псаломттӕ 18 Bible Online

Псаломттӕ 18 - Хуыцауы Дзырд иронау bible

Псаломттӕ 18

¹Зарӕггӕнджыты къорды разамонӕгӕн. Давиды псалом.

²Уӕлӕрвтӕ Хуыцауы кадыл дзурынц, арвы къӕй ӕвдисӕн у Йӕ хъуыддӕгтӕн!

³Бон бонӕн ныхас ӕрвиты, ӕхсӕв ӕхсӕвӕн раргом кӕны зонындзинад.

⁴Иу дзырд, иу ныхас, иунӕг мыр нӕ хъуысы,

⁵афтӕмӕй ӕппӕт зӕххыл азӕлы сӕ хъӕлӕс, дунейы иу кӕронӕй иннӕмӕ айхъуысти сӕ ныхас. Уый хурӕн цатыр сӕвӕрдта уӕлӕрвты,

⁶ӕмӕ рахизы уырдыгӕй, райгӕйӕ, раст цыма ногусджын — йӕ уатӕй; дугъы ауайы ӕхсызгонӕй.

⁷Арвы иу кӕронӕй райдайы йӕ фӕндаг, абалц кӕны иу кӕронӕй иннӕмӕ, ӕмӕ нӕй бамбӕхсӕн йӕ тӕвдӕй.

⁸Дунедарӕджы Ӕгъдау алцӕмӕй дӕр ӕххӕст ӕмӕ царддӕттӕг у. Йӕ уагӕвӕрдтӕ раст сты, ӕнӕхинӕн уӕлзонд дӕттынц.

⁹Дунедарӕджы амындтытӕ рӕстаг сты, зӕрдӕ сӕ райы. Йӕ фӕдзӕхстытӕ рухс сты — байгом кӕнынц цӕстытӕ.

¹⁰Хуыцауы тас — сыгъдӕг, нӕ фесӕфдзӕни мыггагмӕ. Дунедарӕгӕн йӕ тӕрхӕттӕ — ӕцӕг, иууылдӕр рӕстаг сты.

¹¹Зӕрдӕйӕн ӕхцондӕр сты сыгъзӕринӕй, суанг ӕнӕнымӕц сыгъдӕг сыгъзӕринӕй, адджындӕр сты мыдӕй ӕмӕ мыды фӕзгъӕртӕй.

¹²Мӕн, Дӕ цагъары, хъахъхъӕнынц уыдон, се ’ххӕст кӕнын — ме стырдӕр хӕрзиуӕг.

¹³Чи уыны йӕ рӕдыдтытӕ? Ӕнӕзонгӕйӕ цы тӕригъӕдтӕ ракодтон, уыдонӕй мӕ ссыгъдӕг кӕн!

¹⁴Барвӕндӕй кӕй ракӕнӕн ис, уыдонӕй дӕр бахиз Дӕ цагъары, цӕмӕй мыл ма фӕуӕлахиз уой. Уӕд ӕз баззайдзынӕн сыгъдӕгӕй, стыр тӕригъӕд мӕхимӕ нӕ райсдзынӕн.

¹⁵Мӕ дзыхӕй рацӕугӕ ныхӕстӕ, мӕ зӕрдӕйы сагъӕстӕ, ӕхсызгон уӕнт Дӕуӕн, Дунедарӕг! Ды — мӕ къӕдзӕх, мӕ ирвӕзынгӕнӕг.