Read Хуыцауы Дзырд иронау Псаломттӕ 33 Bible Online

Псаломттӕ 33 - Хуыцауы Дзырд иронау bible

Псаломттӕ 33

¹Давиды псалом, Авимелехы цур йӕхи ӕррайы хуызӕн куы скодта ӕмӕ йӕ уый йӕ цурӕй куы фӕсырдта, уӕд.

²Кӕддӕриддӕр кад кӕндзынӕн Дунедарӕгӕн, Йӕ кады кой ӕдзухдӕр уыдзӕни мӕ былалгъыл.

³Мӕ уд ӕппӕлдзӕни Дунедарӕгӕй — уый сӕрныллӕгтӕ фехъусдзысты ӕмӕ ныццин кӕндзысты!

⁴Мемӕ стаут Дунедарӕджы, иумӕ Йын скад кӕнӕм Йӕ номӕн!

⁵Ӕз агуырдтон Дунедарӕджы, ӕмӕ мын Уый дзуапп радта, бахызта мӕ, тас мын цӕмӕй уыд, ӕппӕт уыдӕттӕй.

⁶Йе ’ргом Ӕм чи раздӕхта, уыдонӕн сӕ цӕсгӕмттӕ ныррухс сты, ӕмӕ никуы фегад уыдзысты.

⁷Мӕгуыр лӕг ӕм сдзынӕзта, ӕмӕ йӕ Уый фехъуыста, ӕппӕт фыдбылызтӕй йӕ фервӕзын кодта.

⁸Хуыцауӕй чи тӕрсы, уыдоны алыварс Хуыцауы зӕд зилы ӕмӕ сӕ хъахъхъӕны.

⁹Бафӕлварут ӕмӕ фендзыстут, Хуыцау куыд хорз у, уый! Тӕхудиаг у, Ууыл йӕ зӕрдӕ чи дары!

¹⁰Дунедарӕгӕн кад кӕнут, Йӕ сыгъдӕджытӕ: Хуыцауы тас кӕй ис, уыдон хъуаг ницӕмӕй ӕййафынц.

¹¹Домбӕйттӕ дӕр ӕрлӕмӕгъ вӕййынц ӕмӕ сыдӕй фӕмӕлынц, фӕлӕ, Дунедарӕджы чи агуры, уый иу хорзӕхӕй дӕр ӕнӕхай нӕ вӕййы.

¹²Ӕрбалӕуут, сабитӕ, ӕмӕ мӕм ӕрбайхъусут, ӕз уӕ сахуыр кӕнон Хуыцауы тасыл.

¹³Тӕхудиаг цардӕй цӕрын ӕмӕ амондджын бонтӕ ӕрвитын кӕй фӕнды?

¹⁴Де ’взаджы кӕроныл дӕр хӕрам ныхас макуы абадӕд, мӕнгард ныхас макуы схауӕд дӕ дзыхӕй!

¹⁵Дӕхи хиз фыд ракӕнынӕй ӕмӕ хорз хъуыддӕгтӕ араз. Фидыды фӕндаг агур ӕмӕ йыл цу.

¹⁶Дунедарӕг раст лӕгмӕ ӕркӕсы ӕмӕ йын фехъусы йӕ дзыназын,

¹⁷фыдгӕнӕгӕн та Дунедарӕг йӕ ныхмӕ у, зӕххыл ын фесафы йӕ кой дӕр.

¹⁸Дунедарӕгмӕ чи сдзыназы, уыдоны Уый фехъусы ӕмӕ сӕ алы фыдбылызӕй дӕр бахизы.

¹⁹Састзӕрдӕты фарсмӕ ’рбалӕууы Дунедарӕг, фервӕзын кӕны ныфссасты.

²⁰Раст адӕймаг бирӕ зындзинӕдтӕ бавзары, фӕлӕ йӕ Дунедарӕг се ’ппӕтӕй дӕр фервӕзын кӕны.

²¹Хуыцау ын йе стджытӕ дӕр хъахъхъӕны, ӕмӕ дзы иу дӕр саст не ’рцӕудзӕн.

²²Фыдгӕнӕг амӕлдзӕни фыдмардӕй; раст лӕджы чи нӕ уарзы, уый ӕфхӕрд баййафдзӕн.

²³Дунедарӕг Йӕ цагъарты бахиздзӕни фыдбылызӕй, йӕхи Йыл чи фӕдзӕхсы, уыдонӕй иунӕг дӕр нӕ фесӕфдзӕн.