Read Хуыцауы Дзырд иронау Псаломттӕ 36 Bible Online

Псаломттӕ 36 - Хуыцауы Дзырд иронау bible

Псаломттӕ 36

¹Давиды псалом. Фыдгӕнджытӕм ма бабӕлл, ӕнаккӕгтӕм ма хӕлӕг кӕн, —

²уыдон рӕхджы бахус уыдзысты кӕрдӕгау, баруайдзысты зайӕгхалау.

³Дунедарӕгыл дӕ зӕрдӕ дар ӕмӕ хорз хъуыддӕгтӕ араз; цӕр зӕххыл иузӕрдионӕй.

⁴Дунедарӕгмӕ удӕнцой агур, ӕмӕ дын Уый сӕххӕст кӕндзӕн дӕ зӕрдӕйы бӕллицтӕ.

⁵Дӕ царды фӕндаг Дунедарӕджы бар бакӕн, дӕ зӕрдӕ Йыл дар, ӕмӕ дын Уый дӕ алы хъуыддаг дӕр сараздзӕн:

⁶сӕуӕхсидау сӕрттивдзӕни дӕ рӕстад, бонрӕфты хурау тӕмӕнтӕ скалдзӕни дӕ рӕстдзинад.

⁷Ӕдзӕмӕй ӕрлӕуу Дунедарӕджы раз, дӕ зӕрдӕ Йыл дар. Йӕ царды бирӕ кӕмӕн ӕнтысы, уыцы фӕлитойтӕм ма хӕлӕг кӕн!

⁸Мауал мӕсты кӕн, дӕ масты цӕхӕртӕ мауал кал! Ма хӕлӕг кӕн — фыддӕр истӕмӕ дын ма расайа!

⁹Фыдгӕнджытӕ бабын уыдзысты, Дунедарӕгыл йӕ зӕрдӕ чи дары, уыдонӕн та зӕхх бауыдзӕни сӕ исбон.

¹⁰Чысыл ма хъӕуы, ӕмӕ ӕнӕхуыцӕуттӕн сӕ хъӕр, сӕ кой дӕр нал баззайдзӕн, сӕ фӕд дӕр сын нал ауындзынӕ.

¹¹Сӕрныллӕгтӕн та зӕхх бауыдзӕни сӕ исбон, бафсӕддзысты фарнӕй.

¹²Ӕнӕхуыцау рӕстгӕнӕджы ныхмӕ аразы фыдвӕндтӕ, йӕ дӕндӕгты къӕс-къӕс ӕм цӕуы,

¹³фӕлӕ йыл Дунедарӕг худы, уымӕн ӕмӕ уыны: йӕ царды фӕстаг бон ӕрӕввахс.

¹⁴Ӕнӕхуыцӕуттӕ сласынц сӕ кӕрдтӕ, айвазынц се ’рдынтӕ, цӕмӕй сӕ фыдӕх ныххуырсой мӕгуыр ӕмӕ гӕвзыккыл, раст фӕндагыл чи цӕуы, уыдоны амарой.

¹⁵Фӕлӕ сын сӕ кард сӕхи зӕрдӕтӕ барӕхойдзӕн, се ’рдынтӕ та ныссӕтдзысты.

¹⁶Раст лӕджы чысыл мулк бирӕ ’нӕхуыцӕутты хъӕздыгдзинӕдтӕй — хуыздӕр.

¹⁷Дунедарӕг ӕнӕхуыцӕутты хъомыс басӕтдзӕн, рӕстудтӕн та хъару ратдзӕни.

¹⁸Дунедарӕг сыгъдӕгзӕрдӕты цард уыны, ӕмӕ сӕ исбон нӕ фесӕфдзӕни мыггагмӕ.

¹⁹Фыд рӕстӕджы нӕ фегад уыдзысты, ӕххормаг заманы уыдзысты ӕфсӕст.

²⁰Ӕнӕхуыцӕуттӕ та фесӕфдзысты, Дунедарӕджы знӕгтӕ ӕрбайсӕфдзысты уыгӕрдӕны кӕрдӕгау, фӕцыдӕр уыдзысты фӕздӕгау.

²¹Ӕнӕхуыцау ӕфстау райсы, фӕлӕ йӕ нал ратты фӕстӕмӕ, рӕстгӕнӕг та ӕфстау дӕтты рӕдауӕй.

²²Зӕхх бауыдзӕн, Хуыцау арфӕ кӕмӕн ракодта, уыдоны исбон, кӕй ралгъыста, уыдон та бабын уыдзысты.

²³Рӕстуды къахдзӕфтӕ Дунедарӕг скӕны ӕнӕфӕцудгӕ, йӕ фӕндагыл ын ауды.

²⁴Куы фӕкӕла, уӕд дӕр не ’рхаудзӕн: Дунедарӕг ын йӕ къухыл хӕцы.

²⁵Уыдтӕн ӕвзонг, зӕронд дӕр бадӕн, фӕлӕ никуыма федтон, ӕмӕ Хуыцау рӕстгӕнӕджы ныууадза, кӕнӕ йӕ байзӕддӕгтӕ къӕбӕргур зилой.

²⁶Рӕстгӕнӕг ӕрвылбон ӕфстау дӕтты рӕдауӕй, йӕ байзӕддӕгтӕ арфӕгонд уыдзысты.

²⁷Фыддзинадӕй дӕхи хиз, хорз хъуыддӕгтӕ араз ӕмӕ цӕрдзынӕ мыггагмӕ.

²⁸Дунедарӕг раст тӕрхон уарзы ӕмӕ дзӕгъӕлӕй нӕ ныууадздзӕни Йӕ иузӕрдионты, ӕнусмӕ сыл ауддзӕн, ӕнӕхуыцӕуттӕн та фесӕфдзӕни сӕ мыггаг.

²⁹Зӕхх бауыдзӕн рӕстгӕнджыты исбон, ӕмӕ йыл цӕрдзысты мыггагмӕ.

³⁰Рӕстгӕнӕджы дзыхӕй куырыхон ныхас рацӕуы, йе ’взаг дзуры рӕстдзинад.

³¹Хуыцауы ’Гъдау йӕ зӕрдӕйы фыст ис, ӕмӕ нӕ фӕцуддзӕн.

³²Ӕнӕхуыцау зилы рӕстгӕнӕджы фӕдыл, йӕ амарыныл архайы,

³³фӕлӕ йын ӕй Дунедарӕг йӕ къухтӕм нӕ ратдзӕн, тӕрхоны раз ӕй фӕзылынджын кӕнын нӕ бауадздзӕн.

³⁴Дунедарӕгыл дӕ зӕрдӕ дар, Йӕ фӕндагыл цу, ӕмӕ дӕ Уый сбӕрзонд кӕндзӕн, зӕхх бауыдзӕни дӕ исбон. Ӕмӕ уӕд фендзынӕ, ӕнӕхуыцӕуттӕн се сӕфт куыд ралӕудзӕн, уый.

³⁵Ӕз федтон ӕнӕхуыцау фыдгӕнӕджы бирӕкъабузджын бӕласау йӕхи айтындзгӕ,

³⁶фӕлӕ аивгъуыдта ӕмӕ нал ис, агуырдтон ма йӕ, фӕлӕ йӕ нал ссардтон.

³⁷Бакӕс-ма сыгъдӕгзӕрдӕмӕ, рӕстудмӕ: сабырӕй чи цӕры, уымӕн ис фидӕн,

³⁸фыдгӕнджытӕ та иууылдӕр бабын уыдзысты, ӕнӕхуыцӕуттӕн фидӕн нӕй.

³⁹Дунедарӕг фервӕзын кӕндзӕн рӕстудты, бӕллӕхы заман сӕ Йӕ базыры бын бакӕндзӕн.

⁴⁰Дунедарӕг сын баххуыс кӕндзӕн ӕмӕ сӕ бахиздзӕн, ӕнӕхуыцӕуттӕй сӕ фервӕзын кӕндзӕн, уымӕн ӕмӕ Ууыл дарынц сӕ зӕрдӕ.