Read Хуыцауы Дзырд иронау Псаломттӕ 38 Bible Online

Псаломттӕ 38 - Хуыцауы Дзырд иронау bible

Псаломттӕ 38

¹Зарӕггӕнджыты къорды разамонӕг Йедутунӕн. Давиды псалом.

²Ӕз сфӕнд кодтон: мӕ цӕст дардзынӕн мӕ фӕндӕгтӕм, цӕмӕй ме ’взагӕй тӕригъӕд ма ракӕнон; мӕ дзыхыл цъутта сӕвӕрдзынӕн, цалынмӕ ӕнӕхуыцау мӕ разы уа, уӕдмӕ.

³Ӕнӕсымӕй, ӕгомыгӕй лӕууыдтӕн, суанг, хорз цы у, ууыл дӕр нӕ дзырдтон, ӕмӕ мӕ рыстыл бафтыди.

⁴Мӕ зӕрдӕ сыгъди мӕ риуы, мӕ хъуыдытӕ зынджы стъӕлфӕнтӕ фестадысты, ӕмӕ уӕд райдыдтон дзурын:

⁵«Раргом мын кӕн, Дунедарӕг, кӕд уыдзӕни мӕ царды кӕрон, цас ма мын ис цӕрӕнбон, цас ахӕсдзӕн мӕ цард.

⁶Нымад бонтӕ мын ӕрбарстай, мӕ цардӕмгъуыд ницы у Дӕ разы. Ӕцӕг, адӕймагӕн йӕ цард фӕздӕгӕй уӕлдай нӕу.

⁷Адӕймаг аууонау хилы, дзӕгъӕлы у йӕ тухӕн, ӕмбырд кӕны, фӕлӕ кӕмӕн, уый нӕ зоны.

⁸Ӕмӕ ма ныр цӕмӕ у мӕ каст, Дунедарӕг? Мӕ ныфс ӕрмӕстдӕр Ды дӕ.

⁹Мӕ тӕригъӕдтӕй мӕ фервӕзын кӕн, ӕдылытӕн мын мӕ сӕр хъазинаг ма фӕкӕн!

¹⁰Ӕз багомыг дӕн, мӕ дзыхӕй ныхас нӕ хауы, — цыдӕриддӕр ӕвзарын, уый — Дӕ фӕндонӕй.

¹¹Дӕ азарӕй мӕ бахиз, Дӕ къухы цӕфтӕй сӕфын ӕз.

¹²Йӕ азымы тыххӕй Ды адӕймаджы бафхӕрыс, зынаргъ ын цы у, уый рӕмпӕг фестын кӕныс. Адӕймаг фӕздӕгӕй уӕлдай нӕу.

¹³Дунедарӕг, айс мын мӕ куывд, фехъус мын мӕ дзыназын, мӕ цӕссыгтӕ мын ма ныууадз ӕнӕ дзуаппӕй. Мӕ фыдӕлтау ӕз дӕр ӕбар фӕндаггон, ӕрцӕуӕггаг дӕн Дӕ разы.

¹⁴Дӕ тызмӕг цӕстӕнгас мӕ аздах ӕмӕ мын иу чысыл циндзинад ратт, цалынмӕ нӕ аивгъуыдтон ӕмӕ мӕ фӕд нӕ фесӕфти, уӕдмӕ».