Read Хуыцауы Дзырд иронау Псаломттӕ 39 Bible Online

Псаломттӕ 39 - Хуыцауы Дзырд иронау bible

Псаломттӕ 39

¹Зарӕггӕнджыты къорды разамонӕгӕн. Давиды псалом.

²Фидарӕй мӕ зӕрдӕ дардтон Дунедарӕгыл, ӕмӕ мӕм Уый ӕркасти, фехъуыста мын мӕ дзыназын.

³Мӕлӕты хъоргъӕй мӕ фервӕзын кодта, цъымарайы астӕуӕй мӕ сласта; сӕргъӕвта мӕ айнӕджы фахсмӕ, мӕ къӕхтыл мӕ фидар слӕууын кодта.

⁴Мӕ комы мын бавӕрдта ног зарӕг — кады зарӕг нӕ Хуыцауӕн. Уый фенгӕйӕ, бирӕты тас бацӕудзӕн, ӕмӕ Дунедарӕгӕй ныфс ӕвӕрдзысты.

⁵Тӕхудиаг у уыцы адӕймаг, йӕ зӕрдӕ Дунедарӕгыл чи дары, сӕрыстыртӕй ӕмӕ фӕлитойтӕй йӕхи чи хизы!

⁶Дунедарӕг, мӕ Хуыцау! Кӕуылты сты дӕ диссӕгтӕ, нӕ сӕраппонд цы фӕндтӕ нывӕндыс, уыдон! Дӕуӕн ӕмбал кӕм ис? Дӕ диссӕгты кой Дын ракӕнин, фӕлӕ сӕ ӕз кӕд фӕуыдзынӕн нымад?

⁷Дӕуӕн нывӕндтӕ ӕмӕ хуынтӕ фӕндон нӕ уыдысты, иууылсудзинӕгтӕ ӕмӕ тӕригъӕды нывӕндтӕ нӕ бацагуырдтай — мӕ хъустӕ мын байгом кодтай хъусынӕн.

⁸Уӕд ӕз загътон: «Мӕнӕ дӕн, ӕрбацыдтӕн. Мӕн тыххӕй фыст ис Уаз Чиныджы.

⁹Мӕ Хуыцау! Мӕн фӕнды сӕххӕст кӕнын Дӕ фӕндон, Де ’Гъдау мӕ зӕрдӕйы ис».

¹⁰Ӕз Дын раргом кодтон Дӕ рӕстад, мӕ дзыхыл нӕ ныххӕцыдтӕн Стыр ӕмбырды — о Дунедарӕг, зоныс ӕй Дӕхӕдӕг!

¹¹Дӕ рӕстдзинад нӕ бамбӕхстон мӕ зӕрдӕйы арфы; иузӕрдион ирвӕзынгӕнӕг кӕй дӕ, уый фехъусын кодтон. Нӕ басусӕг кодтон Стыр ӕмбырды Дӕ хорзӕх ӕмӕ Де ’цӕгад.

¹²Дунедарӕг, Дӕ хорзӕхӕй мӕ ӕнӕ хай ма фӕкӕн! Дӕ хорзӕх ӕмӕ Де ’цӕгад иудадзыг хъахъхъӕнӕнт мӕн!

¹³Фыдбылызтӕ мыл ӕнӕнымӕцӕй ӕртыхстысты, мӕ тӕригъӕдтӕ мӕ баййӕфтой ӕмӕ мын сӕхгӕдтой мӕ цӕсты рухс: мӕ сӕрыхъуынтӕй фӕфылдӕр сты, мӕ ныфс фесӕфти.

¹⁴Дунедарӕг, Дӕ хорзӕхы аккаг мӕ скӕн, сӕфын мӕ ма бауадз! О Дунедарӕг, ратындз мӕм ӕххуысмӕ!

¹⁵Фегад ӕмӕ фӕхудинаг уӕнт, мӕн амарынмӕ чи хъавы, уыдон! Ӕгадӕй лидзӕг фӕуӕнт ме сӕфтмӕ бӕлджытӕ!

¹⁶Уӕртӕ ис, уӕртӕ, зӕгъгӕ, мӕныл йӕхи худӕгӕй чи хаста, уыдон фӕхудинаг уӕнт!

¹⁷Дӕумӕ чи тырны, уыдон та райӕнт ӕмӕ цин кӕнӕнт! Дӕ ирвӕзындзинадӕн аргъ чи кӕны, уыдон ӕдзухдӕр дзурӕнт: «Кадджын у Дунедарӕг!»

¹⁸Мӕгуыр ӕмӕ гӕвзыкк дӕн ӕз, фӕлӕ мӕ Дунедарӕг нӕ рох кӕны! Ды — ме ’ххуысгӕнӕг, мӕ ирвӕзынгӕнӕг! Фӕстиат ма фӕкӕн, мӕ Хуыцау!