Read Хуыцауы Дзырд иронау Псаломттӕ 43 Bible Online

Псаломттӕ 43 - Хуыцауы Дзырд иронау bible

Псаломттӕ 43

¹Зарӕггӕнджыты къорды разамонӕгӕн. Корахы фыртты зондамонӕн псалом.

²О Хуыцау, мах нӕ фыдӕлтӕй фехъуыстам нӕхи хъустӕй, раджы заманы, сӕ рӕстӕджы, Ды цы хъуыддӕгтӕ сарӕзтай, уыдоны кой.

³Ды Дӕхи къухӕй иннӕ адӕмты фӕсырдтай, уыдоны та ӕрцӕрын кодтай сӕ зӕххыл; басастай ӕмӕ фӕтардтай адӕмты.

⁴Сӕ карды фӕрцы нӕ самал кодтой ацы зӕхх, сӕ хъару сын не ’рхаста уӕлахиз, фӕлӕ Дӕ къух ӕмӕ Дӕ хъомыс, Дӕ цӕсгомы рухс — Ды сыл аудыдтай.

⁵О Хуыцау, Ды — мӕ паддзах! Фервӕзын кӕн Йаковы фӕдонты!

⁶Дӕ фӕрцы мах не знӕгты нӕ сыкъатыл сисдзыстӕм. Дӕ хорзӕх нӕ куы уа, уӕд нӕ ныхмӕлӕуджыты бассӕнддзыстӕм.

⁷Мӕ зӕрдӕ ме ’рдыныл нӕ дарын, мӕ кард дӕр мӕ нӕ фервӕзын кӕндзӕн.

⁸Ды-иу нӕ фервӕзын кодтай не знӕгтӕй, йе сӕфт нӕ чи уыны, уыдоны-иу ӕгады бынатмӕ ’ртардтай.

⁹Ӕрвылбон мах кадджын кӕнӕм Хуыцауы, мыггагмӕ Дын кад кӕндзыстӕм Дӕ номӕн.

¹⁰Уӕдӕ нӕ цӕмӕн фӕхудинаг кодтай, цӕмӕн нӕ ныууагътай? Не ’фсадимӕ цӕуылнӕуал цӕуыс?

¹¹Не знӕгты разӕй нӕ лидзӕг куы фӕкодтай, хӕлӕттаг куы фестӕм нӕ фыдгултӕн.

¹²Фыстау нӕ радтай ӕргӕвдынмӕ, адӕмты ’хсӕн нӕ ныххӕлиу кодтай.

¹³Ницӕуыл ауӕй кодтай дӕ адӕмы, ницы пайда дзы райстай.

¹⁴Нӕ сыхӕгтӕн нӕ фидиссаг фӕкодтай, нӕ алыварс чи ис, уыдон ныл худынц, хынджылӕг нӕ кӕнынц.

¹⁵Адӕмтӕ нӕ ’мбисондӕн ӕрхӕссынц, махмӕ кӕсгӕйӕ, банкъусынц сӕ сӕртӕ.

¹⁶Кӕй сӕгад дӕн, уый алы бон уынын, мӕ худинагӕй судзы мӕ цӕсгом —

¹⁷мӕ алыварс фидистӕ ӕмӕ ’фхӕрӕн ныхӕстӕ, фыдгулы мастисӕн цӕстӕнгас.

¹⁸Ӕппӕт уыдӕттӕ баййӕфтой нӕ сӕртӕ, фӕлӕ Дӕ уӕддӕр нӕ ферох кодтам, нӕ фехӕлдтам Дӕ фидыд.

¹⁹Нӕ зӕрдӕ Дыл нӕ сивтам ӕмӕ Дӕ фӕндагӕй нӕ адзӕгъӕл стӕм.

²⁰Ды нӕ мӕрдты бирӕгъты хӕтӕнты ныффалгӕрон кодтай, саудалынгӕй нӕ бамбӕрзтай.

²¹Мах нӕ Хуыцауы куы ферох кодтаиккам, кӕйдӕр хуыцаумӕ нӕ къухтӕ куы сивӕзтаиккам,

²²уӕд Хуыцау, ау, уый нӕ федтаид? Зӕрдӕйы сусӕгтӕ дӕр зындгонд куы сты Уымӕн!

²³Дӕу тыххӕй нӕ алы бон марынц, нымайынц нӕ ӕргӕвдинаг фыстыл.

²⁴О Дунедарӕг, ракӕс! Куыд фынӕй кӕныс?! Ма нӕ ныууадз бынтон!

²⁵Дӕхи ныл цӕмӕн атигъ кодтай? Куыд Дӕ ферох сты нӕ удхар ӕмӕ нӕ фыдбылызтӕ?

²⁶Нӕ удтӕ рыджы сӕвдылдысты, нӕ буӕрттӕ зӕххимӕ сиу сты.

²⁷Раст ӕмӕ нын феххуыс кӕн! Фервӕзын нӕ кӕн Дӕ хорзӕхы фӕрцы!