Read Хуыцауы Дзырд иронау Псаломттӕ 51 Bible Online

Псаломттӕ 51 - Хуыцауы Дзырд иронау bible

Псаломттӕ 51

¹Зарӕггӕнджыты къорды разамонӕгӕн. Давиды зондамонӕн псалом.

²Едомаг Доег Саулмӕ кӕй бацыди ӕмӕ Давиды, Ахимелехы хӕдзары йӕ федтон, зӕгъгӕ, кӕй банымыгъта, уый фӕдыл.

³Цы ’ппӕлыс дӕ фыдракӕндӕй, тыхджын? Хуыцауы хорзӕх иудадзыг мемӕ ис.

⁴Де ’взаг нывӕнды сӕрысӕфты фӕндтӕ, цыргъ сӕрдасӕнау дын мӕнгард у.

⁵Фыддзинад дын хорз ракӕнынӕй — ӕхцондӕр, мӕнгдзинад та — раст ныхӕстӕ дзурынӕй.

⁶Уарзыс ды, сӕфтмӕ чи кӕны, ахӕм ныхӕстӕ, мӕнгард ӕвзаг дын у ӕхцон.

⁷Уый тыххӕй дӕ Хуыцау фесафдзӕни ӕнусмӕ, фелвасдзӕн дӕ ӕмӕ дӕ фехсдзӕни дӕ цатырӕй, ӕд уидаг дӕ срӕдувдзӕни удӕгӕсты зӕххӕй.

⁸Уый фенгӕйӕ, тас бацӕудзӕни рӕстудты, фӕхуддзысты дыл ӕмӕ зӕгъдзысты:

⁹«Ацы адӕймагӕн йӕ ныфс Хуыцау нӕ уыди, йӕ зӕрдӕ дардта йӕ бирӕ мулкыл, йӕ фыдракӕндты фӕрцы схъӕздыг ис».

¹⁰Ӕз та — Хуыцауы хӕдзары цъӕх чи дары, уыцы оливӕ бӕласау, Хуыцауы хорзӕхыл мӕ зӕрдӕ дардзынӕн мыггагмӕ.

¹¹О Хуыцау, стаудзынӕн Дӕ ӕнусмӕ Дӕ хъуыддӕгты тыххӕй. Мӕ зӕрдӕ дардзынӕн Дӕ номыл — иузӕрдион Дыл чи у, уыдонӕн уый фарн хӕссы.