Read Хуыцауы Дзырд иронау Псаломттӕ 64 Bible Online

Псаломттӕ 64 - Хуыцауы Дзырд иронау bible

Псаломттӕ 64

¹Зарӕггӕнджыты къорды разамонӕгӕн. Давиды псалом. Зарӕг.

²Хуыцау! Кады аккаг Ды дӕ Сионыл, нӕ сомытӕ сӕххӕст кӕндзыстӕм Дӕ разы.

³Ды адӕймагӕн хъусыс йӕ куывд, Дӕу агуры алчи.

⁴Мӕ тӕригъӕдтӕ мыл уӕлахиз кӕнынц; Ды нӕ ссыгъдӕг кӕндзынӕ нӕ азымӕй.

⁵Тӕхудиаг у, Ды кӕй равзӕрстай, Дӕхимӕ кӕй ӕрбаввахс кодтай, уый. Дӕ уаз Кувӕндоны, Дӕ хӕдзары мах амондджын уыдзыстӕм.

⁶О, карз ӕмӕ раст тӕрхонгӕнӕг, фехъус нӕ! О Хуыцау, нӕ Ирвӕзынгӕнӕг! Ӕппӕт зӕххон цӕрджытӕн, денджызы фале дард бӕстӕтӕн Ды дӕ сӕ ныфс.

⁷Дӕ хъаруйы фӕрцы ӕрӕвӕрдтай хӕхтӕ, хъомысӕй сфӕлыстай Дӕхи.

⁸Ды ’рсабыр кӕныс денджызы уылӕнтӕ, змӕнтӕг адӕмты.

⁹Зӕххы кӕрӕтты Де ’вдисӕйнӕгтӕй адӕм фыр тӕссӕй ризынц, скӕсӕн ӕмӕ Дӕ ныгуылӕны стауынц.

¹⁰Ды аудыс зӕххыл, донӕй йӕ ’фсадыс, дӕттыс ын бӕркад. Хуыцауы цӕугӕдон донӕй хъӕздыг у. Ды ӕрзайын кӕныс хор — ахӕм ӕгъдау радтай зӕххӕн.

¹¹Йӕ ауӕдзтӕ йын донӕй бафсадыс, ныммур ын кӕныс йӕ къуыбӕрттӕ, ӕрфӕлмӕн ӕй кӕныс уарыны ӕртӕхтӕй, йӕ тыллӕгыл ӕруадзыс Дӕ арфӕ.

¹²Дӕ хорзӕхӕй нӕ куы схайджын кӕныс, уӕд аз — бӕркадджын,

¹³быдыры сӕрвӕттӕ — сойджын, къуыбыртӕ — цинӕй фӕлыст;

¹⁴фӕзты — бирӕ фос, дӕлвӕзтӕ нал фӕзынынц хорӕй, цин фӕкӕнынц ӕмӕ зарынц.