Read Хуыцауы Дзырд иронау Псаломттӕ 71 Bible Online

Псаломттӕ 71 - Хуыцауы Дзырд иронау bible

Псаломттӕ 71

¹Соломоныл. О Хуыцау! Саккаг кӕн паддзахӕн Дӕ рӕстдзинад, паддзахы фыртӕн — Дӕ раст тӕрхон!

²Уадз ӕмӕ раст тӕрхон кӕна Дӕ адӕмӕн, уадз ӕмӕ раст ӕвзара мӕгуырты хъаст.

³Уадз ӕмӕ хӕхтӕй адӕммӕ амонд ӕрцӕуа, уадз ӕмӕ къуыбыртӕ адӕмӕн рӕстады дыргътӕ ’рхӕссой.

⁴Уадз ӕмӕ мӕгуыртӕн сӕ хъаст ӕвзара, фервӕзын кӕна мӕгуыр лӕджы цоты, басӕтта тыхгӕнӕджы, —

⁵уӕд мыггагмӕ кад кӕндзысты Дӕуӕн, цалынмӕ ’рттивой хур ӕмӕ мӕй.

⁶Къӕвдайау, тыгъдызӕйау ӕрцӕуӕд зӕхмӕ;

⁷йӕ заманы рӕстуд фӕрнӕйдзагӕй цӕрӕд! Цалынмӕ мӕй рухс кӕны, уӕдмӕ зӕхх амондӕй йедзаг уӕд.

⁸Паддзахиуӕг кӕнӕд иу денджызӕй иннӕмӕ, Евфраты донӕй зӕххы кӕрӕттӕм.

⁹Ӕдзӕрӕг быдыры сырдтӕ ӕрзоныг уӕнт йӕ разы, йе знӕгтӕ рыг сдӕрӕнт.

¹⁰Фидӕнт ын хъалон Таршиш ӕмӕ сакъадӕхты паддзӕхтӕ; Сава ӕмӕ Севайы паддзӕхтӕ йын лӕвӕрттӕ хӕссӕнт.

¹¹Бакувӕнт ын ӕппӕт паддзӕхтӕ, лӕггад ын кӕнӕнт ӕппӕт адӕмтӕ.

¹²Уый фервӕзын кӕндзӕни мӕгуыры, фӕхӕцӕг кӕуыл нӕй ӕмӕ чи дзыназы, уыцы ’фхӕрд адӕмы.

¹³Фӕтӕригъӕд кӕндзӕн мӕгуырӕн, мӕгуыр адӕмы фервӕзын кӕндзӕни,

¹⁴мӕнгарддзинад ӕмӕ тыхмийӕ сӕ бахиздзӕн, зын ын уыдзӕни се сӕфтмӕ кӕсын.

¹⁵Бирӕ цӕрӕд! Савайӕ йын ласдзысты сыгъзӕрин, ӕдзух ын кувдзысты, ӕрвылбон ын арфӕ кӕндзысты.

¹⁶Ӕмӕ зӕххыл сбирӕ уыдзӕни хор, Ливаны хӕхтау дыргъӕй нал зындзӕн, сахарты адӕм кӕрдӕгӕй фылдӕр суыдзысты.

¹⁷Йӕ ном цӕрдзӕни ӕнусмӕ. Цалынмӕ хур рухс кӕны, уӕдмӕ нӕ ферох уыдзӕн йӕ ном. Уый уыдзӕнис арфӕгонд, ӕппӕт адӕмтӕ йӕ амондджын хондзысты.

¹⁸Арфӕгонд у Дунедарӕг Хуыцау, Израилы Хуыцау! Ӕрмӕстдӕр Уый аразы диссӕгтӕ.

¹⁹Йӕ кадджын ном арфӕгонд у ӕнусмӕ, ӕппӕт зӕхх байдзаг уӕд Йӕ кадӕй. Аммен, аммен!

²⁰Уыйадыл фесты Йессейы фырт Давиды куывдтытӕ.