Read Хуыцауы Дзырд иронау Псаломттӕ 77 Bible Online

Псаломттӕ 77 - Хуыцауы Дзырд иронау bible

Псаломттӕ 77

¹Асафы зондамонӕн псалом. О мӕ адӕм, уӕ хъус ӕрдарут мӕ зонды ныхасмӕ, ӕрбайхъусут мӕ зондамындмӕ.

²Ӕз дзурдзынӕн ӕмбисӕндтӕй, рагзаманты сусӕгтӕ уын ӕрхӕсдзынӕн.

³Цы фехъуыстам ӕмӕ цы базыдтам, фыдӕлтӕ нын кӕй радзырдтой,

⁴уый мах сӕ байзӕддагӕй нӕ бамбӕхсдзыстӕм: фӕстагӕттӕн ракӕндзыстӕм Дунедарӕджы кады хъуыддӕгты, Йӕ хъомысы, Йӕ диссӕгты кой.

⁵Уый Йаковимӕ сфидар кодта фидыд, Израилӕн радта Ӕгъдау ӕмӕ загъта нӕ фыдӕлтӕн, сӕ сабитӕн ӕй куыд амоной.

⁶Нӕ фӕстагӕттӕ, ӕрцӕуинаг фӕлтӕртӕ сӕ куыд зоной ӕмӕ сӕ уыдон дӕр сӕ сабитӕн куыд амоной сӕ рады.

⁷Цӕмӕй сӕ зӕрдӕ дарой Хуыцауыл, ма рох кӕной Хуыцауы хъуыддӕгтӕ, ӕххӕст Ын кӕной Йӕ фӕдзӕхстытӕ.

⁸Цӕмӕй сӕ фыдӕлты хуызӕн ма уой — нӕсӕттон ӕмӕ змӕнтӕг фӕлтӕр, уыдон ӕппӕт зӕрдӕйӕ Хуыцауимӕ нӕ уыдысты, ӕнувыд Ыл нӕ разындысты сӕ удтӕ.

⁹Ефремы фырттӕ, хӕстифтонг фатӕхсджытӕ, лидзӕг фесты тохы бон.

¹⁰Уыдон Хуыцауы фӕдзӕхст фехӕлдтой, Йе ’Гъдаумӕ гӕсгӕ цӕрын нӕ бакуымдтой.

¹¹Ферох сӕ сты Йӕ хъуыддӕгтӕ, Йӕхӕдӕг сын кӕй фенын кодта, Йӕ уыцы диссӕгтӕ.

¹²Сӕ фыдӕлты цӕсты раз Уый диссӕгтӕ сарӕзта Мысыры, Цоаны фӕзы:

¹³Уый фӕйнӕрдӕм фӕцӕуын кодта денджызы дӕттӕ, хъен сӕ сӕвӕрдта сисау ӕмӕ сӕ ракодта йӕ астӕуты.

¹⁴Боныгон сӕ разӕй цыдис ӕврагъау, ӕхсӕвыгон — арты рухсау.

¹⁵Айнӕг афаста ӕдзӕрӕг быдыры, цӕмӕй сӕ бафсада донӕй — раст цыма дӕтты ӕнӕбын арфӕй.

¹⁶Айнӕджы риуӕй феггуырсын кодта суадӕттӕ, ӕмӕ калдысты цӕугӕдӕттау.

¹⁷Фӕлӕ нӕ фыдӕлтӕ Йӕ разы сӕ тӕригъӕдтӕм ноджы бафтыдтой — Бӕрзӕндтыл Бадӕджы ныхмӕ сыстадысты ӕдзӕрӕг быдыры.

¹⁸Хуыцауы бафӕлварын сфӕнд кодтой: сӕ уды фӕндиаг хӕринаг Дзы домдтой.

¹⁹Хуыцауы ныхмӕ ахӕм ныхӕстӕ дзырдтой: «Хуыцауӕн ӕдзӕрӕг быдыры фынг сӕвӕрын Йӕ бон суыдзӕн?

²⁰О, уый айнӕг ӕрцавта, ӕмӕ дзы дон фемӕхсти, ракалдысты суадӕттӕ. Уӕд Йӕ бон нӕу ӕмӕ нын дзул ратта, Йӕ адӕмы фыдызгъӕлӕй бафсада?»

²¹Дунедарӕг сӕ фехъуыста ӕмӕ смӕсты ис, Йӕ маст рафыхти Йаковмӕ, артау ссыгъд Израилы ныхмӕ.

²²Уымӕн ӕмӕ уыдон сӕхи нӕ бафӕдзӕхстой Хуыцауыл, кӕй сӕ фервӕзын кӕндзӕн, уый ныфс сӕ нӕ уыди.

²³Уый бардзырд радта мигътӕн ӕмӕ арвы дуӕрттӕ байтыгъта.

²⁴Ӕрсаха сыл кодта маннӕ — уӕларвон дзул сын радта хойрагӕн.

²⁵Зӕдты дзул хордтой адӕм — бафсӕста сӕ Дунедарӕг.

²⁶Уый арвыл сыстын кодта скӕсӕйнаг дымгӕ, хуссайраг дымгӕ Йӕ хъаруйӕ ӕрбалӕууын кодта —

²⁷рыгау сыл ӕруарын кодта фыдызгъӕл, мӕргъты бын сӕ фӕкодта денджызы змисау.

²⁸Сӕ цатырты раз сын, асадӕны, мӕргътӕ ӕркалдта

²⁹ӕмӕ асастой се стонг, фыдызгъӕлӕй сӕ уӕлдай ныууагътой — сӕххӕст сын кодта сӕ фӕндон.

³⁰Фӕлӕ сӕ мондӕгтӕ нӕма суагътой ӕмӕ сӕ ком нӕма равдӕлон,

³¹афтӕ сӕ Хуыцауы азар баййӕфта: адӕмӕн сӕ тыхджындӕртӕ ӕрбамардысты, Израилы тырынтӕ адӕргъ сты зӕххыл.

³²Фӕлӕ уӕддӕр адӕм тӕригъӕды цыдысты, Йӕ диссӕгтыл Ын не ’ууӕндыдысты.

³³Ӕмӕ сын Уый сӕ цӕрӕнбон скаст ӕмӕ ӕркаст скодта, сӕ бонтӕ тӕрсгӕ-ризгӕйӕ ӕрвыстой.

³⁴Марын-иу сӕ куы райдыдта, уӕд-иу Ӕм раздӕхтой се ’ргом, ногӕй та-иу Хуыцауы агурын райдыдтой.

³⁵Сӕ зӕрдыл та-иу ӕрлӕууыд, Уый сӕ къӕдзӕх кӕй у, Иууылбӕрзонд Хуыцау сӕ Ирвӕзынгӕнӕг кӕй у,

³⁶ӕмӕ Йӕ разы цурон митӕ кодтой, сайдтой Йӕ ӕвзагӕй.

³⁷Афтӕмӕй та Йӕм ӕндӕр зӕрдӕ дардтой, Йӕ фидыдыл нӕ уыдысты ӕнувыд.

³⁸Фӕлӕ Уый уарзӕгой у, сӕ азымтӕ сын барста, нӕ Йӕ фӕндыд сӕ фесафын. Бирӕ хӕттыты сӕм урӕдта Йӕ маст, Йӕ судзгӕ масты фӕдыл нӕ цыди.

³⁹Уымӕй рох нӕ уыди, уыдон буарӕй уӕлдай кӕй ницы сты — чи ацӕуы ӕмӕ нал фӕзыны, уыцы уддзӕфау.

⁴⁰Цал ӕмӕ цал хатты сыстадысты Йӕ ныхмӕ ӕдзӕрӕг быдыры, змӕлӕг кӕм нӕй, уыцы бӕсты!

⁴¹Цал ӕмӕ цал хатты фӕлвӕрдтой ӕмӕ ӕфхӕрдтой Израилы Уаз Хуыцауы!

⁴²Ферох сӕ ис Йӕ къухы хъомыс, знагӕй сӕ куыд фервӕзын кодта, уыцы бон;

⁴³Мысыры кӕй равдыста ӕвдисӕйнӕгтӕ, Цоаны фӕзы диссӕгтӕ кӕй сарӕзта;

⁴⁴Мысырӕгты цӕугӕдӕттӕ иууылдӕр туг куыд фестын кодта, ӕмӕ сӕ дон нуазынӕн куд нал бӕззыд;

⁴⁵дзынгатӕ ӕмӕ ӕлгъаг галхӕфсыты ахӕсты сӕ куыд фӕкодта, цӕмӕй сӕ бацарӕфтыд кӕной;

⁴⁶сӕ тыллӕг сын мӕтыхты хай бакодта, сӕ бирӕ фыдӕбон зулчъыты амондӕн разынди;

⁴⁷сӕ сӕнӕфсир сын ихӕй ныххоста, сӕ сикомортӕ сын ныссӕлын кодта;

⁴⁸сӕ фос сын фесӕфта ихӕй, сӕ рӕгъӕуттӕ сын арв ӕрцавта.

⁴⁹Йӕ судзгӕ маст сыл ныккалдта, Йӕ азар, Йӕ фыдӕхы хай сӕ бакодта, фыдбылыз сыл ӕруагъта ӕмӕ сӕм сӕфты зӕдты рарвыста.

⁵⁰Нал баурӕдта Йӕ маст, марынӕй сыл нӕ бацауӕрста, рыны амӕттаг сӕ бакодта.

⁵¹Ӕрцавта Мысырӕгты зӕнӕджы хистӕрты, фыццаггуырдты фӕцагъта Хамы цатырты.

⁵²Ӕмӕ фыстау ракодта Йӕ адӕмы, фосы дзугау сӕ размӕ кодта ӕдзӕрӕг быдыры.

⁵³Йемӕ сын ницӕмӕй уыди тас, сӕ фыдгулты та сын аныхъуырдта денджыз.

⁵⁴Ӕрбакодта сӕ Йӕ уаз зӕхмӕ, Йӕхи къухӕй кӕй райста, Йӕ уыцы хохмӕ.

⁵⁵Сӕ сӕрвӕлтау фӕсырдта адӕмты, сӕ зӕххытӕ сын байуӕрста Израилӕн, ӕцӕгӕлӕтты цатырты сӕ ӕрцӕрын кодта.

⁵⁶Фӕлӕ Йӕ уыдон раздӕрау фӕлвӕрдтой, Бӕрзӕндтыл Бадӕджы ныхмӕ-иу сыстадысты, Йӕ фӕдзӕхстытӕм гӕсгӕ нӕ цардысты.

⁵⁷Сӕ фыдӕлтау Ын Йӕ зӕрдӕхудт истой, гадзрахатӕй Йыл цыдысты, сайдтой Йӕ тӕссонд ӕрдынау.

⁵⁸Йӕ хъыджы цыдысты сӕ уаз къуыппыты аххосӕй, сӕ гуымирыты тыххӕй сӕм цӕхӕртӕ калдта фыр мӕстӕй.

⁵⁹Хуыцау уый куы фехъуыста, уӕд сӕм Йӕ маст рафыхти ӕмӕ Йӕхи атигъ кодта Израилыл.

⁶⁰Ныууагъта Силомы Йӕ цӕрӕн, ныууагъта, адӕмы ’хсӕн кӕм ӕрбынат кодта, Йӕ уыцы Цатыр.

⁶¹Йӕ тыхы ӕвдисӕн уацары радта, знаджы къухмӕ радта Йӕ кад.

⁶²Карды комыл бафтыдта Йӕ адӕмы, Йӕ маст ныккалдта Йӕ исбоныл.

⁶³Ӕрыгон лӕппутӕ арты хай баисты, чындзхӕсджыты зарджытӕ нал кодтой чызджытӕн.

⁶⁴Сӕ сауджынтӕ карды амӕттаг баисты, фӕлӕ сӕ бон кӕуын нӕ уыди сӕ идӕдз устытӕн.

⁶⁵Уӕд Дунедарӕг цыма Йӕ фынӕйӕ фехъал ис, цыма бӕгъатыр йӕ нозтӕй ӕрӕрвонг,

⁶⁶уыйау Йе знӕгты Йӕ уӕлныхты айста, ӕнусмӕ сӕ фӕхудинаг кодта.

⁶⁷Уый Йӕхи атигъ кодта Йосефы цатыртыл, Ефремы хӕдзарвӕндаг нӕ сӕвзӕрста.

⁶⁸Фӕлӕ равзӕрста Иудӕйы хӕдзарвӕндаг, бауарзта Сионы хох.

⁶⁹Уӕлӕрвтау сарӕзта Йӕ Кувӕндон, ӕнустӕм ӕй ӕрфидар кодта зӕххау.

⁷⁰Уый равзӕрста Йӕ цагъары, Давиды, фосдарӕнтӕй йӕ ракодта,

⁷¹фысты дзугтӕй йӕ фӕиртӕста, цӕмӕй Йын Давид хиза Йӕ адӕмы — Йаковы байзӕддӕгты, цӕмӕй хиза Израилы — Йӕ исбон.

⁷²Ӕмӕ сӕ хызта сыгъдӕгзӕрдӕйӕ, куырыхонӕй сӕ размӕ кодта.