Read Хуыцауы Дзырд иронау Псаломттӕ 87 Bible Online

Псаломттӕ 87 - Хуыцауы Дзырд иронау bible

Псаломттӕ 87

¹Зарӕг. Корахы фыртты псалом. Зарӕггӕнджыты къорды разамонӕгӕн. «Махалат леаннот»-ы зӕлтӕм гӕсгӕ. Зарахы байзӕддаг Хеманы зондамонӕн псалом.

²О Дунедарӕг, мӕ ирвӕзынгӕнӕг Хуыцау, ӕхсӕвӕй-бонӕй Дӕумӕ дзыназын!

³Мӕ куывд Дӕм фехъуысӕд! Мӕ лӕгъстӕмӕ Дӕ хъус ӕрдар!

⁴Хъизӕмарӕй мӕлын, мӕрдтыбӕстӕйы къӕсӕрыл лӕууын.

⁵Ӕз сдӕн, ингӕнмӕ чи ныххызти, хъару кӕмӕ нал ис, уыдоны ’нгӕс.

⁶Мӕрдты ’хсӕн мӕ ныууагътой; ингӕны чи хуыссы, уыдоны — лӕджы къухӕй кӕй амардӕуыд, Ды хъуыды дӕр кӕй нал кӕныс ӕмӕ Дӕ къухӕй чи фӕиртӕсти, уыдоны ’нгӕс сдӕн.

⁷Фехстай мӕ ӕнӕбын сӕрсӕфӕнмӕ, сау дӕлдзӕхмӕ.

⁸Дӕ судзгӕ маст мыл уӕз кӕны, Дӕ уылӕнтӕ бын фӕдӕн.

⁹Фӕсырдтай мын мӕ хӕлӕртты, ӕлгъ мыл кӕнынц. Ахӕстау ӕддӕмӕ мӕ къах нал ӕвӕрын.

¹⁰Фыр хъизӕмарӕй мӕ цӕстытӕй ницыуал уынын. Ӕрвылбон Дӕм дзынӕзтон, Дунедарӕг, мӕ къухтӕ Дӕм тыгъдӕй фӕдардтон.

¹¹Мӕрдтӕн Ды цавӕр диссӕгтӕ равдисдзынӕ? Мӕрдты удтӕ растдзысты, мыййаг, ӕмӕ Дӕ райдайдзысты стауын?

¹²Ингӕны Дӕ хорзӕхы кой чи ракӕндзӕн? Мӕрдтыбӕсты чи ӕрымысдзӕн Дӕ иузӕрдиондзинад?

¹³Талынг дунейы чи базондзӕн Дӕ диссӕгтӕ, рохуаты бӕсты — Дӕ рӕстдзинад?

¹⁴Ӕз та, Дунедарӕг, дзыназын Дӕумӕ! Ӕрвылрайсом Дӕм кувын!

¹⁵Дунедарӕг, цӕмӕн мыл атигъ кодтай Дӕхи, Де ’ргом мӕ цӕмӕн аздӕхтай?

¹⁶Ме ’взонджы бонтӕй фӕстӕмӕ хъизӕмарӕй мӕлын, ӕрдуйӕ нарӕгдӕр сси мӕ уд. Дӕ азар мӕ баййӕфта, ӕвирхъау тас мыл ӕртыхсын кодтай ӕмӕ ӕз удхайраг фӕдӕн.

¹⁷Дӕ масты уылӕнтӕ акалдысты мӕ сӕрты, стыр тас мыл бафтыдтай, ӕмӕ асасти мӕ ныфс.

¹⁸Алы бон мыл донивылдау ӕртыхсы, ӕрбалвасы мӕ алырдыгӕй.

¹⁹Мӕ хӕлӕртты, мӕ уарзон ӕмбӕлтты Ды адард кодтай мӕнӕй; талынг — мӕ иунӕг ӕмбал.