Read Хуыцауы Дзырд иронау Псаломттӕ 91 Bible Online

Псаломттӕ 91 - Хуыцауы Дзырд иронау bible

Псаломттӕ 91

¹Псалом. Сабатбоны зарӕг.

²Куы ӕхцон у Дунедарӕджы стауын ӕмӕ Дӕ номы кадӕн зарын, Бӕрзӕндтыл Бадӕг,

³сӕумӕрайсом стауын Дӕ хорзӕх, ӕхсӕвыгон — Дӕ иузӕрдиондзинад,

⁴дӕстӕнонтӕ ӕмӕ хъисфӕндырты зӕлтимӕ.

⁵Уымӕн ӕмӕ мын, Дунедарӕг, мӕ зӕрдӕ срухс кодтай Дӕ хъуыддӕгтӕй. Дӕ къухӕй цыдӕриддӕр сарӕзтай, уыдоны цинӕй райын.

⁶О Дунедарӕг! Куыд ӕгӕрон сты Дӕ хъуыддӕгтӕ, куыд арф сты Дӕ хъуыдытӕ!

⁷Ӕдылы сӕ нӕ зоны, ӕнӕфенд сӕ не ’мбары.

⁸Фыдгӕнджытӕ кӕрдӕгау рӕзынц, ӕнӕхуыцӕуттӕ дидинӕг калынц, фӕлӕ уыдон фесӕфдзысты мыггагмӕ.

⁹Дӕуӕн та, Дунедарӕг, Дӕ кад бӕрзонд у ӕнусмӕ!

¹⁰Де знӕгтӕ, Дунедарӕг, Де знӕгтӕ бабын уыдзысты ӕцӕгдӕр, фыдгӕнджытӕ алырдӕмты фӕлидздзысты.

¹¹Мӕнӕн та галы сыкъайау мӕ сыкъа сисыс бӕрзонд, ноглӕмӕрст оливӕйы сойӕ мӕ байсӕрдыс.

¹²Мӕ цӕстытӕ ме знӕгты сӕфт уынынц, мӕ ныхмӕ растджытӕн се сӕфты кой хъусын.

¹³Рӕстгӕнӕг дыргъбӕласау дидинӕг калдзӕн, хӕрдмӕ фӕцӕудзӕни ливайнаг кедрау.

¹⁴Дунедарӕджы хӕдзары кӕй ныссагътой, уыдон дидинӕг калынц нӕ Хуыцауы кӕртыты,

¹⁵зӕры бонты дӕр дыргъджын, донджын ӕмӕ райдзастхуыз уыдзысты,

¹⁶цӕмӕй хъусын кӕной, Дунедарӕг, мӕ къӕдзӕх, рӕстаг кӕй у, уый ӕмӕ Йӕм ӕнӕрастӕй кӕй ницы ис!