Read Хуыцауы Дзырд иронау Ӕмбисӕндтӕ 2 Bible Online

Ӕмбисӕндтӕ 2 - Хуыцауы Дзырд иронау bible

Ӕмбисӕндтӕ 2

¹Мӕ лӕппу! Мӕ ныхӕстӕ мын дӕ зӕрдӕмӕ куы айсай, мӕ зондамынд мын дӕ уды рӕбын куы бавӕрай,

²дӕ хъус куы ’рбадарай уӕлзондмӕ, дӕ зӕрдӕ зонды ’рдӕм куы саразай,

³зонынадмӕ куы сидай ӕмӕ лӕгъстӕйӕ зонд куы курай,

⁴куы йӕм бӕллай, ӕвзистау ӕй куы агурай,

⁵уӕд Дунедарӕгӕй тӕрсын цы нысан кӕны, уый бамбардзынӕ, уӕд базондзынӕ Хуыцауы.

⁶Адӕймаджы уӕлзондӕй Дунедарӕг схайджын кӕны, зонд ӕмӕ зонынад Уый дзыхӕй рацӕуынц.

⁷Рӕстгӕнджытӕн Уый ӕрцӕттӕ кодта уӕлахиз, тӕригъӕдӕй йӕхи чи хизы, уыдонӕн Уый сӕ уарт у.

⁸Уый хъахъхъӕны раст адӕмы фӕндӕгтӕ, ӕнувыд Ыл чи у, уыдоны цӕуӕнтӕ.

⁹Уӕд бамбардзынӕ рӕстад, рӕстдзинад ӕмӕ ӕууӕнчы, алы хорз фӕндаджы мидис.

¹⁰Уӕлзонд дӕ зӕрдӕйы ӕрцӕрдзӕн, ӕмӕ зонынад дӕ удӕн ӕхсызгон уыдзӕн.

¹¹Дӕ дардмӕуынӕг зонд дӕ хъахъхъӕндзӕн, дӕ зонд-иу дӕ бахиздзӕн.

¹²Уӕлзонд-иу дӕ фервӕзын кӕндзӕн галиу фӕндӕгтӕй ӕмӕ сайӕгойтӕй;

¹³талынг фӕндӕгтыл цӕуыны мондагӕй, раст фӕндаг чи ныууагъта,

¹⁴йӕ фыдракӕндтыл цин чи кӕны, ӕнӕуаг ӕмӕ ӕвзӕр митӕй йӕ зӕрдӕ кӕмӕн райы,

¹⁵галиу фӕндӕгтыл чи цӕуы ӕмӕ, йӕхи фӕндӕгтыл чи адзӕгъӕл, уыдонӕй.

¹⁶Афтӕмӕй дӕхи бахиздзынӕ искӕй усӕй, чындзыцыды узӕлӕг ныхӕстӕй,

¹⁷йе ’взонджы бонтӕй йын цы сӕрыхицау уыд, уый кӕмӕй ферох ис, йӕ Хуыцауы фӕдзӕхстыл йӕ зӕрдӕ чи сивта, уымӕй.

¹⁸Йӕ хӕдзар — мӕлӕтмӕ фӕндаг, йӕ цӕуӕнтӕ дӕ мӕрдтимӕ баиу кӕндзысты.

¹⁹Мидӕмӕ йӕм чи бахизы, уый царды фӕндагыл нал ацӕуы.

²⁰Уымӕ гӕсгӕ раст адӕмы фӕндӕгтыл цу, рӕстгӕнджыты цӕуӕнтыл фидар хӕц.

²¹Уымӕн ӕмӕ зӕххыл цӕрдзысты рӕстгӕнджытӕ, рӕстзӕрдӕтӕ йыл баззайдзысты,

²²ӕнӕхуыцӕуттӕ та фӕхъӕудзысты зӕххӕй, фӕлитойты сӕ бындзарӕй срӕдувдзысты.