Read Хуыцауы Дзырд иронау Ӕмбисӕндтӕ 22 Bible Online

Ӕмбисӕндтӕ 22 - Хуыцауы Дзырд иронау bible

Ӕмбисӕндтӕ 22

¹Хорз ном — мулкӕй бӕллиццагдӕр; хорзы кой — сыгъзӕрин ӕмӕ ’взистӕй хуыздӕр.

²Хъӕздыг ӕмӕ мӕгуыр фӕрсӕй-фӕрстӕм ӕрлӕудзысты, уымӕн ӕмӕ сӕ дыууӕйы дӕр Дунедарӕг сфӕлдыста.

³Зондджын фыдбылыз рагацау уыны ӕмӕ йӕхи ӕрӕмбӕхсы, ӕнӕхин та йӕ фӕндагыл ӕмраст ацӕуы ӕмӕ ӕфхӕрд баййафы.

⁴Сӕрныллӕгдзинад ӕмӕ Дунедарӕджы тас — сӕ фӕдыл цӕуынц хъӕздыгдзинад, цыт ӕмӕ цард.

⁵Мӕнгард лӕгӕн йӕ фӕндагыл — сындзытӕ ӕмӕ ахсӕн хызтӕ, йӕ цард чи хъахъхъӕны, уый сӕм хӕстӕг нӕ цӕуы.

⁶Лӕппуйӕн раст фӕндаг куы бацамонай, уӕд дзы зӕрондӕй дӕр иуварс нӕ фӕзилдзӕн.

⁷Хъӕздыг мӕгуыр лӕгӕн — йӕ хицау, хӕсджын та, хӕс кӕмӕй дары, уымӕн — йӕ цагъар.

⁸Фыдракӕндтӕ чи тауы, уый фыдбылызы бахаудзӕн, йӕ фыдӕхы лӕдзӕг ӕвӕдӕй фесӕфдзӕн.

⁹Хӕларзӕрдӕ адӕймаг арфӕгонд уыдзӕн, уымӕн ӕмӕ йӕ къӕбӕрӕй мӕгуыр лӕгӕн хай ратты.

¹⁰Ӕдзӕсгомы куы атӕрай, уӕд хъаугъа банцайдзӕн, загъд ӕмӕ ’лгъыст басабыр уыдзысты.

¹¹Сыгъдӕгзӕрдӕйӕ цӕрын чи уарзы ӕмӕ йӕ дзыхы ныхас ӕхсызгон кӕмӕн у, уымӕн паддзах йе ’мбал уыдзӕн.

¹²Дунедарӕг хъахъхъӕны ӕцӕгдзинад, ӕууӕнкхорӕн йӕ ныхӕсты мӕнгдзинад равдисы.

¹³Зивӕггӕнаг хъӕр кӕны: «Уынджы — домбай! Куыддӕр хӕдзарӕй рацӕуон, афтӕ ме сӕфт ӕрцыд!»

¹⁴Искӕй усы ’взаг — арф сӕрсӕфӕн, Дунедарӕг кӕй ралгъита, уый дзы ныххаудзӕн.

¹⁵Лӕппу фыдуаг митыл куы сагъуыйы, уӕд, цӕмӕй йе ’дылы зонд ныууадза, уый тыххӕй йӕ уисӕй нӕмын хъӕуы.

¹⁶Мӕгуыр лӕджы ’фхӕргӕйӕ, йӕ исбоныл чи ’фтауы, хъӕздыгӕн та лӕвӕрттӕ чи кӕны, уый мӕгуырмӕ ’рцӕудзӕнис.

¹⁷Дӕ хъус ӕрбадар ӕмӕ куырыхонты ныхӕстӕм байхъус, мӕ зондамындмӕ мын де ’ргом раздах:

¹⁸уыдон дын дӕ зӕрдыл дарын ӕхсызгон уыдзӕн, уадз ӕдзухдӕр де ’взагыл бадой.

¹⁹Цӕмӕй Дунедарӕг дӕ зӕрдӕдарӕн суа, уый тыххӕй дын сӕ абон хъусын кӕнын.

²⁰Ӕз дын ныффыстон дӕс ӕмӕ ссӕдз ӕмбисонды, уынаффӕтӕ ӕмӕ зонындзинӕдтӕ дзы ссардзынӕ,

²¹цӕмӕй сахуыр уай ӕцӕгдзинады ныхӕстыл ӕмӕ дӕ хицӕуттӕн дӕ бон дзуапп раттын уа.

²²Мӕгуыр лӕджы, мӕгуыр кӕй у, уый тыххӕй ма бастигъ, кулдуары раз ма бафхӕр гӕвзыччы,

²³уымӕн ӕмӕ Дунедарӕг сӕ хъасты рахӕцдзӕн сӕ сӕрыл, чи сӕ бастыгъта, уыдоны цардцух фӕкӕндзӕн.

²⁴Мӕстыгӕримӕ ма лымӕн кӕн, загъдӕргомӕй дӕхи дард лас,

²⁵науӕд йӕ фӕндӕгтыл цӕуын сахуыр уыдзынӕ ӕмӕ къӕппӕджы аирвӕздзынӕ.

²⁶26-27 Искӕй тыххӕй дӕ сӕр лыгмӕ ма дӕтт, искӕй ӕвджид ма ныллӕу — цы бафидай, уый дӕм куынӕ уа, уӕд ма дын дӕ хуыссӕнтӕ дӕр дӕ бынӕй раласдзысты.

²⁸Дӕ фыдӕлтӕ арӕнӕн цы дур сӕвӕрдтой, уый йӕ бынатӕй ма фезмӕлын кӕн.

²⁹Йӕ куысты дӕсны чи у, ахӕм адӕймаджы искуы федтай? Уый лӕггад кӕны паддзӕхтӕн, хуымӕтӕг адӕммӕ хӕстӕг нӕ цӕуы.