Read Хуыцауы Дзырд иронау Ӕмбисӕндтӕ 24 Bible Online

Ӕмбисӕндтӕ 24 - Хуыцауы Дзырд иронау bible

Ӕмбисӕндтӕ 24

¹Фыдзӕрдӕтӕм хӕлӕг ма кӕн ӕмӕ се ’хсӕнмӕ ма тырн,

²уымӕн ӕмӕ сӕ хъуыдыты фыдвӕндтӕ йеддӕмӕ ницы ис, фыдбылызты кой фӕкӕнынц.

³Хӕдзар арӕзт ӕрцӕуы уӕлзонды фӕрцы ӕмӕ сфидар вӕййы раст зондӕй,

⁴зонынады руаджы йӕ уӕттӕ байдзаг вӕййынц зынаргъ ӕмӕ рӕсугъд исбонӕй.

⁵Куырыхон — тыхджын, бирӕзонаг — хъомысджын.

⁶Тохы куы бацӕуай, уӕд уынаффӕтӕм хъус, уынаффӕгӕнджытӕ бирӕ кӕм уа, уым — уӕлахиз.

⁷Ӕдылы не ’ххӕссы уӕлзондмӕ, сахары кулдуары цур йӕ дзыхӕй хъыпп-сыпп не схауы.

⁸Фыдвӕндтӕ чи аразы, уый фыдвӕндгӕнӕг схондзысты.

⁹Ӕдылыйы фӕндтӕ — тӕригъӕдджын, ӕдзӕсгомыл адӕм ӕлгъ кӕнынц.

¹⁰Бӕллӕхы заман кӕд лӕмӕгъ разындтӕ, уӕд хъаруйӕ мӕгуыр дӕ.

¹¹Марынмӕ кӕй фӕкӕнынц, уыдоны фервӕзын кӕн, сӕфты къахыл чи лӕууы, уыдонӕй дӕхи ма аиуварс кӕн.

¹²Ды зӕгъдзынӕ: «Ӕмӕ мах уый тыххӕй куы ницы зыдтам!» Фӕлӕ зӕрдӕтӕ Фӕлварӕг, ау, ницы зоны? Дӕ цард Хъахъхъӕнӕг зоны алцыдӕр, алкӕмӕн дӕр йӕ хъуыддӕгтӕм гӕсгӕ бафиддзӕн.

¹³Мӕ лӕппу, мыд хӕр, уымӕн ӕмӕ мыд хорз у, мыды фӕзгъӕртӕ дын дӕ дзых садджын кӕндзысты.

¹⁴Уӕлзонд дӕр ахӕм у дӕ удӕн, кӕд ӕй ссарай, уӕд дын ис фидӕн, дӕ зӕрдӕдарӕн сӕфт нӕ уыдзӕн.

¹⁵Ӕнӕхуыцау! Рӕстуды хӕдзары раз асадӕны ма бад, йӕ хӕдзар ын ма сафтид кӕн,

¹⁶уымӕн ӕмӕ рӕстуд авд хатты куы ’рхауа, уӕд дӕр сыстдзӕнис, ӕнӕхуыцӕуттӕ та фыдбылызӕй фесӕфдзысты.

¹⁷Де знаг куы ’рхауа, уӕд ма цин кӕн ӕмӕ, куы фӕкӕла, уӕд дӕ зӕрдӕ ма райӕд,

¹⁸уымӕн ӕмӕ, Дунедарӕг уый куы фена, уӕд Ын ӕхсызгон нӕ уыдзӕн, ӕмӕ дзы Йӕ маст аздахдзӕн.

¹⁹19-20 Фыдгӕнджытӕм ма мӕсты кӕн, ӕнӕхуыцӕуттӕм хӕлӕг ма кӕн, уымӕн ӕмӕ фыдгӕнӕгӕн фидӕн нӕй, ӕнӕхуыцӕуттӕн сӕ цырагъ ахуысдзӕн.

²¹Мӕ лӕппу, Дунедарӕгӕй ӕмӕ паддзахӕй тӕрс, дӕхи хиз змӕнтджытӕй,

²²уымӕн ӕмӕ уыдоныл ӕвиппайды фыдбылыз ӕрцӕудзӕн: цавӕр бӕллӕх сӕ баййафдзӕн, уый ничи зоны.

²³Мӕнӕ ма ноджыдӕр куырыхонты ’мбисӕндтӕ: тӕрхондоны искӕй хъулон кӕнын хорз нӕу.

²⁴Аххосджынӕн, раст дӕ, зӕгъгӕ, чи дзуры, уый адӕмтӕ ’лгъитдзысты, знӕмтӕн ӕнӕуынон суыдзӕнис.

²⁵Фӕлӕ азымджыны чи бафхӕры, уыдон ӕнтыстджын ӕмӕ арфӕгонд уыдзысты.

²⁶Раст дзуапп чи ратты, уый цыма былтӕн аба кӕны.

²⁷Раздӕр уал дӕ кӕртмӕ базил ӕмӕ дӕ хуымты куыст бакӕн, уый фӕстӕ дӕхицӕн хӕдзар араз.

²⁸Хионы ныхмӕ мӕнгӕвдисӕн ма ныллӕуу — сайӕн ныхас ма схауӕд дӕ дзыхӕй.

²⁹Афтӕ ма зӕгъ: «Уый мын куыд бакодта, ӕз дӕр ын афтӕ бакӕндзынӕн, йӕ хъуыддӕгтӕм гӕсгӕ йын бафиддзынӕн».

³⁰Иу хатт фӕцӕйцыдтӕн магусайы хуымы цурты, ӕнӕзонд адӕймаджы сӕндоны рӕзты.

³¹Йӕ зӕхх какон сындзытӕй байдзаг, хӕмпӕлгӕрдӕджы бын фӕцис, дурӕй амад гӕрӕн ныккалди.

³²Ӕз кастӕн ӕмӕ хъуыды кодтон, мӕнӕ цы федтон ӕмӕ бамбӕрстон:

³³иу чысыл афынӕй кӕндзынӕ, чысыл арӕдзӕ-мӕдзӕ кӕндзынӕ, иу чысыл ницы кусгӕйӕ абаддзынӕ,

³⁴ӕмӕ дӕм дзӕгъӕлдзуйау фӕзындзӕн гӕвз, абырӕгау — мӕгуырдзинад.