Read Хуыцауы Дзырд иронау Ӕмбисӕндтӕ 25 Bible Online

Ӕмбисӕндтӕ 25 - Хуыцауы Дзырд иронау bible

Ӕмбисӕндтӕ 25

¹Мӕнӕ Соломоны иннӕ ӕмбисӕндтӕ, ӕрӕмбырд сӕ кодтой Иудейы паддзах Езекиайы барджынтӕ.

²Кадджын у Хуыцау — сусӕгтӕ ’мбӕхсӕг, цытджын у паддзах — сусӕгдзинӕдтӕ сгарӕг.

³Арвы бӕрзӕндты, зӕххы арфы ӕмӕ паддзахы зӕрдӕйы цы ис, уый зонд нӕ ахсы.

⁴Ӕвзист ссыгъдӕг кӕн, ӕмӕ зӕрингуырд мигӕнӕн сараздзӕн;

⁵ӕнӕхуыцауы паддзахы цурӕй аиуварс кӕн, ӕмӕ йӕ паддзахы бадӕн раст зонды фӕрцы сфидар уыдзӕн.

⁶Паддзахы раз схъӕл ныхӕстӕ ма кӕн, стыр хицӕутты ӕмрӕнхъ ма ӕрлӕуу.

⁷7-8 Фӕлтау дын зӕгъӕд: «Уӕлдӕр схиз», уӕздӕтты раз дӕ фегад кӕныны бӕсты. Дӕхи цӕстӕй цы фенай, уый тӕрхондонмӕ рахӕссыныл тагъд ма кӕн, науӕд уый фӕстӕ цы фӕуыдзынӕ, дӕ хион дӕ куы фӕхудинаг кӕна, уӕд?

⁹9-10 Дӕ хионимӕ тӕрхон кӕн ӕрмӕст дӕхи хъуыддаджы фӕдыл, искӕй сусӕгдзинад ма раргом кӕн, науӕд, чи дӕ фехъуса, уый дын дӕхи фӕхудинаг кӕндзӕн, ӕмӕ фидиссаг фӕуыдзынӕ.

¹¹Ӕвзист тӕбӕгъы сыгъзӕрин фӕткъуытӕ — уыдоны ’нгӕс у афоныл загъд ныхас.

¹²Сыгъзӕрин хъусцӕг, сыгъдӕг сыгъзӕринӕй конд фӕлындӕн — уыдоны ’нгӕс у куырыхоны уайдзӕф, лӕмбынӕг чи фӕхъусы, уымӕн.

¹³Хуымгӕрдӕнты тӕмӕны — уазал мит, уый ӕнгӕс у ӕууӕнкджын минӕвар йе ’рвитӕгӕн; йӕ хицауы зӕрдӕ дзы райы.

¹⁴Мигътӕ ӕмӕ дымгӕ ӕнӕ къӕвдайӕ — уыдоны ’нгӕс у, кӕй нӕ ракодта, ахӕм лӕвӕрттӕй чи феппӕлы, уыцы адӕймаг.

¹⁵Бирӕбыхст хицауы зӕрдӕ ӕртасын кӕны, фӕлмӕн ныхас стджытӕ дӕр сӕтты.

¹⁶Мыд куы ссарай, уӕд дзы ӕрмӕст, цас дӕ хъӕуы, уый бӕрц бахӕр; фырхӕрд дзы куы бакӕнай, уӕд дӕ зӕрдӕ схӕццӕ уыдзӕн.

¹⁷Де ’рдхорды хӕдзармӕ ӕгӕр арӕх ма цу, науӕд дӕ куы стыхса, уӕд ын ӕнӕуынон суыдзынӕ.

¹⁸Йӕ хионы ныхмӕ мӕнгӕвдисӕн чи ныллӕууы, уый у старц, кард ӕмӕ цыргъ фаты ’нгӕс.

¹⁹Ӕмбыд дӕндаг кӕнӕ къуылых къах — мӕнгардыл дӕр бӕллӕхы бон уыдонау зӕрдӕ дарӕн нӕй.

²⁰Фӕнды уазал бон дӕ дарӕс лас, кӕнӕ содӕйыл дзмари ныккал, фӕнды ’нкъард зӕрдӕйӕн зарджытӕ кӕн.

²¹Кӕд де знаг ӕххормаг у, уӕд ын дзул ратт, кӕд дойныйӕ мӕлы, уӕд ӕй донӕй бафсад.

²²Афтӕмӕй йын ды йӕ сӕрыл судзгӕ ’взалытӕ ’мбырд кӕныс, дӕуӕн та Дунедарӕг дӕ хорздзинад бафиддзӕн.

²³Цӕгатаг дымгӕ йемӕ ’рбахӕссы къӕвда, мӕнгдзурӕджы ’взаг та — мӕсты цӕсгӕмттӕ.

²⁴Фыдсылимӕ цӕрыны бӕсты фӕлтау уӕлхӕдзары кӕрон цӕр.

²⁵Дойныйӕ чи мӕлы, уымӕн уазал дон нуазын куыд ӕхсызгон у, афтӕ ’хцон у хорз уац дард бӕстӕйӕ.

²⁶Ӕнӕхуыцауы раз фыр тӕссӕй чи ризы, уыцы рӕстуд у чъизи донгуырӕны, змӕст суадоны ’нгӕс.

²⁷Мыдӕн йӕ бирӕ хӕрд пайда куыд нӕу, афтӕ ’ппӕлӕн ныхасмӕ бӕллын дӕр хорз нӕу.

²⁸Йӕхиуыл хӕцын чи нӕ зоны, уыцы адӕймаг, йӕ систӕ цы сахарӕн ныккалдысты, уый хуызӕн у.