Read Хуыцауы Дзырд иронау Ӕмбисӕндтӕ 27 Bible Online

Ӕмбисӕндтӕ 27 - Хуыцауы Дзырд иронау bible

Ӕмбисӕндтӕ 27

¹Райсомы бонӕй ма раппӕл, — йемӕ цы ’рхӕсдзӕн, уый нӕ зоныс.

²Дӕхӕдӕг ма ӕппӕл дӕхицӕй, уадз ӕмӕ дӕ ’ндӕр исчи раппӕла.

³Дур уӕззау у, змис дӕр рог нӕу, фӕлӕ зондцухы митӕ — ноджы уӕззаудӕр.

⁴Маст ӕгъатыр у, ӕнцон нӕу ӕхсидгӕ маст уромын, фӕлӕ зӕрдӕхсайдӕн чи ныффӕраздзӕн?

⁵Сусӕг уарзтӕй ӕргом уайдзӕф — хуыздӕр.

⁶Чи дӕ уарзы, уымӕн йӕ уайдзӕф дӕр — зӕрдиаг; ӕнӕуынон кӕмӕн дӕ, уымӕн та йӕ батӕ дӕр — гӕды митӕ.

⁷Хӕринагӕй чи фелгъӕд ис, уый мыды фӕзгъӕртӕ къахӕй ссӕнды, ӕххормагмӕ та маст дӕр адджын кӕсы.

⁸Йӕ райгуырӕн къона чи ныууадзы, уый, йӕ ахстонӕй цы маргъ фӕхицӕн ис, уый хуызӕн у.

⁹Сӕрдӕны хӕрздӕф ӕмӕ будтӕф зӕрдӕйӕн ӕхцон сты, ӕмбалы зӕрдӕбын уынаффӕ дӕр афтӕ ’хсызгон у.

¹⁰Де ’мбӕлтты ӕмӕ дӕ фыды ’рдхӕрдты ма рох кӕн; уынгӕг заман дӕ хӕстӕджытӕм ма цу — дард ӕфсымӕрӕй хӕстӕг сыхаг — хуыздӕр.

¹¹Зондджын у, мӕ лӕппу, мӕ зӕрдӕ дӕ куыд райа, афтӕ, ӕмӕ уӕд, ме ’фхӕрджытӕн цавӕр дзуапп раттон, уый зондзынӕн.

¹²Зондджын фыдбылыз рагацау уыны ӕмӕ йӕхи ӕрӕмбӕхсы, ӕнӕхин та ӕмраст йӕ фӕндагыл ацӕуы ӕмӕ ’фхӕрд баййафы.

¹³Ӕнӕзонгӕ адӕймаджы тыххӕй йӕ сӕр лыгмӕ чи ратта, уымӕн йӕ дарӕс дӕр ласт ӕрцӕудзӕн; искӕй усы ’вджид чи ныллӕууа, уымӕн дӕр афтӕ.

¹⁴Сӕумӕрайсом йӕ сыхагӕн хъӕрӕй чи арфӕ кӕны, уый ӕлгъитӕгыл банымайдзысты.

¹⁵Фыдрӕстӕджы къӕвда куыннӕуал фенцайы, загъдӕргом ус дӕр афтӕ:

¹⁶фӕнды дымгӕ уром кӕнӕ дӕ армы сой нылхъив, фӕнды уый ӕрсабыр кӕныныл архай.

¹⁷Ӕфсӕн ӕфсӕны куыд цыргъ кӕны, афтӕ адӕм дӕр кӕрӕдзийы ӕнаипдӕр кӕнынц.

¹⁸Легъуи бӕласмӕ чи зилы, уый йын йӕ дыргътӕй хӕрдзӕн, йӕ хицауыл чи тыхсы, уый та скадджын уыдзӕн.

¹⁹Цӕсгом доны куыд зыны, афтӕ дӕ зӕрдӕ дӕр искӕй зӕрдӕйы фендзынӕ.

²⁰Мӕрдтыбӕстӕ ӕмӕ зындон ӕнӕфсис сты, адӕймаджы цӕстытӕ дӕр афтӕ.

²¹Згъӕртайынгӕнӕн — ӕвзистӕн, куынцгом — сыгъзӕринӕн, лӕджы зӕрдӕ та ’ппӕлдӕй атайы.

²²Ӕдылыйы нӕмгуытимӕ фӕхты куы фӕхойай, уӕд дӕр дзы йе ’дылы зонд нӕ фӕхицӕн уыдзӕн.

²³Дӕ фысты нымадӕй зон, дӕ рӕгъӕуттӕм дзӕбӕх зил,

²⁴уымӕн ӕмӕ хъӕздыгдзинад ӕнусон нӕу ӕмӕ паддзахы кады худ дӕр алыхатт иу фӕлтӕрӕй иннӕмӕ не ’рхауы.

²⁵Кӕрдӕг бахус, фӕлӕ та мӕнӕ цъӕхӕй сзынди, хӕххон уыгӕрдӕнтӕ карст ӕрцыдысты;

²⁶уӕрыччытӕ дын — дарӕсӕн, сӕныччытӕ — зӕххы хай балхӕнынӕн,

²⁷сӕгъы ’хсыр дӕм фаг уыдзӕн, цӕмӕй дӕ бинонты ӕмӕ дӕ унӕутты бафсадай.