Read Хуыцауы Дзырд иронау Ӕмбисӕндтӕ 29 Bible Online

Ӕмбисӕндтӕ 29 - Хуыцауы Дзырд иронау bible

Ӕмбисӕндтӕ 29

¹Уайдзӕфтӕм хъусгӕйӕ, йӕхи чи схъӕхъхъаг кӕны, уымӕн ӕвиппайды йе сӕфт ӕрцӕудзӕн, ӕмӕ йын ницыуал баххуыс кӕндзӕн.

²Рӕстудтӕ куы сбирӕ вӕййынц, уӕд адӕм цин фӕкӕнынц, ӕнӕхуыцау хицауы бынат куы бацахсы, уӕд та хъӕрзгӕ кӕнынц.

³Уӕлзонд чи уарзы, уымӕй йӕ фыды зӕрдӕ райы; хӕтаг сылтимӕ йӕ рӕстӕг чи ’рвиты, уый та йӕ хӕдзары исбон ныкъкъуыввитт кӕны.

⁴Паддзах раст тӕрхонӕй бӕстӕ сфидар кӕны, гӕртӕмттӕ чи уарзы, уый та йӕ мӕгуырмӕ ’ртӕры.

⁵Йӕ хионӕн цурон ныхӕстӕ чи кӕны, уый йын йӕ къӕхты бын ахсӕн хыз ӕвӕры.

⁶Ӕнӕхуыцауӕн йӕ тӕригъӕд — йӕ къӕппӕг, рӕстуд та цин кӕны ӕмӕ райы.

⁷Рӕстуд мӕгуыр адӕмы хъаст нӕ рох кӕны, ӕнӕхуыцауы сӕ хъуыддаг ӕвзарыны мӕт нӕй.

⁸Ӕдзӕсгӕмттӕ сахар сызмӕнтынц, куырыхонтӕ маст басабыр кӕнынц.

⁹Куырыхон ӕдылыимӕ быцӕу куы фӕкӕны, уӕд хъӕр ӕмӕ хынджылӕгӕй уӕлдай ницы фӕхъусы, пайда та дзы ницы вӕййы.

¹⁰Тугмондаг чи у, уыдонӕн сыгъдӕгзӕрдӕ адӕймаг ӕнӕуынон у, рӕстгӕнджыты фесафынмӕ тырнынц.

¹¹Ӕдылы йӕ маст нӕ уромы, куырыхон та йӕхиуыл хӕцын зоны.

¹²Кӕд паддзах мӕнг ныхӕстӕм хъусы, уӕд йӕ фӕсдзӕуинтӕ сты ӕнаккӕгтӕ.

¹³Мӕгуыр лӕгмӕ ӕмӕ тыхгӕнӕгмӕ иумӕйагӕй уый ис: сӕ дыууӕйӕн дӕр цӕсты рухс Дунедарӕг радта.

¹⁴Паддзах мӕгуыртӕн раст тӕрхон куы кӕна, уӕд йӕ паддзахы бадӕн мыггагмӕ фидар уыдзӕн.

¹⁵Уисӕй над ӕмӕ уайдзӕф адӕймаджы зондджындӕр кӕнынц, рохуаты цы сабийы ныууадзай, уый йӕ ныййарӕг мады фӕхудинаг кӕндзӕн.

¹⁶Ӕнӕхуыцӕуттӕ куы сбирӕ вӕййынц, уӕд тӕригъӕд парахат кӕны, фӕлӕ сын рӕстудтӕ се сӕфт фендзысты.

¹⁷Дӕ лӕппуйӕн зонд бацамон ӕмӕ йыл мӕт нӕ кӕндзынӕ, дӕ зӕрдӕ дзы райдзӕн.

¹⁸Пехуымпартӕ рагуацтӕ куынӕуал фӕуынынц, уӕд адӕм, ӕфсарм цы у, уый ферох кӕнынц; Хуыцауы ’гъдау чи ӕххӕст кӕны, уый тӕхудиаг у.

¹⁹Цагъарӕн ӕрмӕст ныхӕстӕй зонд нӕ бацамондзынӕ, куы сӕ бамбара, уӕд дӕр сӕм йӕ хъус не ’рдардзӕн.

²⁰Рӕузонд ныхӕстӕ чи фӕкӕны, ахӕм адӕймаджы искуы федтай? Зондцухӕй дӕр ма фылдӕр пайда ис.

²¹Цагъары йӕ сабийы бонтӕй буц куы дарай, уӕд дзы хорзӕй ницы рауайдзӕн.

²²Мӕстыгӕр загъд къахы, загъдӕргом йӕ тӕригъӕдтӕ сбирӕ кӕны.

²³Сӕрыстыр йӕхи сӕгад кӕндзӕн, сӕрныллӕг та скадджын уыдзӕн.

²⁴Хуыснӕджы ’мбал йӕхицӕн знаг у: давӕджы куыд ӕлгъитынц, уый хъусы, фӕлӕ йӕ дзыхыл хӕцы.

²⁵Адӕмы раз тас кӕмӕ ис, уымӕн уый — йӕ ахсӕн хыз, Дунедарӕгыл йӕ зӕрдӕ чи дары, уый — ӕдас.

²⁶Бирӕтӕ бӕллынц бӕстӕйы хицауы хорз зӕрдӕйы ахастмӕ, фӕлӕ адӕймагӕн Дунедарӕг у тӕрхонгӕнӕг.

²⁷Рӕстгӕнджытӕн ӕнӕхуыцӕуттӕ ’лгъаг сты, ӕнӕхуыцӕуттӕн та — цӕсгомджын адӕм.