Read Хуыцауы Дзырд иронау Ӕмбисӕндтӕ 3 Bible Online

Ӕмбисӕндтӕ 3 - Хуыцауы Дзырд иронау bible

Ӕмбисӕндтӕ 3

¹Мӕ лӕппу! Мӕ зондамынд мын ма ферох кӕн, мӕ фӕдзӕхстытӕ мын дӕ зӕрдӕйы арф бавӕр, —

²дӕ царды бонтӕ ӕмӕ дӕ азты нымӕц фӕфылдӕр уыдзысты, фарн дын ӕрхӕсдзысты.

³Уырнындзинад ӕмӕ рӕстдзинад дӕ макуы ныууадзӕнт, дӕ хъуырыл сӕ бакӕн фӕрдгуытау, дӕ зӕрдӕйы тӕгтыл сӕ ныффыс, —

⁴уӕд схайджын уыдзынӕ Хуыцау ӕмӕ адӕмы хорзӕх ӕмӕ хӕрзаудӕнӕй.

⁵Ӕппӕт зӕрдӕйӕ Дунедарӕгыл ӕууӕнд, дӕхи зондыл дӕ зӕрдӕ ма дар.

⁶Цыфӕнды фӕндагыл куы цӕуай, уӕддӕр-иу Дунедарӕджы фӕндон базонынмӕ тырн, ӕмӕ дын дӕ фӕндӕгтӕ слӕгъз кӕндзӕн.

⁷Дӕхи цӕсты куырыхон ма у, Дунедарӕгӕй тӕрс, ӕвзӕрдзинадӕй дӕхи хиз, —

⁸уӕд дӕ буар уыдзӕн ӕнӕниз, де стӕг — фидар.

⁹Дӕ исбонӕй ӕмӕ дӕ алы ’фтиаджы сӕрӕй Дунедарӕгӕн кад кӕн кӕддӕриддӕр,

¹⁰ӕмӕ дӕ къӕбицтӕ уӕле исгӕ, бынӕй ахадгӕ уыдзысты, ног сӕн дӕ сӕндуцӕнты сӕрты акӕлдзӕн.

¹¹Мӕ лӕппу, Дунедарӕджы ӕфхӕрдмӕ ницыйы цӕстӕй ма кӕс, Йӕ уайдзӕфтӕ дын хъыг ма уӕнт.

¹²Уымӕн ӕмӕ Дунедарӕг, кӕй уарзы, уыдоны ’фхӕры, фыд, зынаргъ ын чи у, йӕ уыцы фырты куыд бафхӕры, афтӕ.

¹³Тӕхудиаг у, уӕлзондӕй чи схайджын, зондмӕ чи сӕххӕссыд, уыцы адӕймаг,

¹⁴уымӕн ӕмӕ уӕлзонд ӕвзистӕй пайдадӕр у, сызгъӕринӕй фылдӕр ӕфтиаг ратты;

¹⁵уӕлзонд — налхъуыт-налмастӕй зынаргъдӕр, цӕмӕ бӕллыс, уыдонӕй йемӕ абарӕн дӕр ницы ис.

¹⁶Уӕлзондӕн йӕ рахиз къухы — бирӕ цӕрӕнбон, йӕ галиуы — хъӕздыгдзинад ӕмӕ цыт.

¹⁷Уӕлзонды фӕндӕгтӕ — цины цӕуӕнтӕ, иууылдӕр — ӕнӕфыдбылыз.

¹⁸Чи дзы схайджын ис, уымӕн у царды бӕлас, чи йӕ хъахъхъӕны, уыдон тӕхудиаг сты.

¹⁹Дунедарӕг уӕлзондӕй зӕххӕн ӕрӕвӕрдта бындур, уӕлӕрвтӕ сфидар кодта зондӕй.

²⁰Йӕ уӕлзондӕй байгом вӕййынц ӕнӕбын ӕрфытӕ, ӕврӕгътӕй ӕрлӕдӕрсы ӕртӕх.

²¹Мӕ лӕппу, уыдӕттӕй дӕ цӕст ма ис, раст зондахаст ӕмӕ арфуынӕг зонд хъахъхъӕн.

²²Уыдоны фӕрцы цӕрдзынӕ, дӕ хъуырыл сӕ бакӕндзынӕ фӕрдгуытау.

²³Уӕд ӕдасӕй дӕ фӕндагыл ацӕудзынӕ ӕмӕ нӕ фӕкӕлдзынӕ,

²⁴ӕдӕрсгӕйӕ-иу бафынӕй уыдзынӕ ӕмӕ адджын фынӕй кӕндзынӕ.

²⁵Ма тӕрс, ӕвиппайды цы бӕллӕх ӕрцӕуы, уымӕй, ӕнӕхуыцӕуттӕ кӕй цӕттӕ кӕнынц, уыцы фыдбылызӕй,

²⁶уымӕн ӕмӕ ныфсджын уыдзынӕ Дунедарӕгӕй, нӕ дӕ бауадздзӕн къӕппӕджы бахауын.

²⁷Истӕмӕй хъуаг чи ӕййафы, уымӕн дӕ бон хорз ракӕнын куы уа, уӕд ын «нӕ» ма зӕгъ.

²⁸Дӕ хионӕн афтӕ ма дзур: «Ацу, райсом ногӕй ӕрбацӕудзынӕ, ӕмӕ дын уӕд ратдзынӕн», — цы йын раттай, уый дӕм куы уа, уӕд.

²⁹Дӕ разы ӕдӕрсгӕйӕ чи цӕры, уый ныхмӕ фыдвӕнд ма араз.

³⁰Адӕймаг дын ӕвзӕрӕй куы ницы ракӕна, уӕд йемӕ ӕнӕ ’фсонӕй ма хыл кӕн.

³¹Фыдгӕнӕджы цардмӕ ма хӕлӕг кӕн, йӕ фӕндӕгтӕй йын иу дӕр ма равзар,

³²уымӕн ӕмӕ Дунедарӕджы цӕсты мӕнгард адӕймаг ӕлгъаг у, цӕсгомджын чи у, уыдоныл ӕууӕнды.

³³Дунедарӕджы ’лгъыст ӕнӕхуыцауы хӕдзарыл сӕмбӕлы, рӕстуды хӕдзарыл та ӕруадзы Йӕ арфӕ.

³⁴Искӕуыл чи худы, ууыл Хуыцау фӕхуддзӕн, сӕрныллӕджытӕн та хорзӕх дӕтты.

³⁵Куырыхонтӕ скадджын уыдзысты, зондцухтӕ та худинаджы бын фӕуыдзысты.