Read Хуыцауы Дзырд иронау Ӕмбисӕндтӕ 4 Bible Online

Ӕмбисӕндтӕ 4 - Хуыцауы Дзырд иронау bible

Ӕмбисӕндтӕ 4

¹Байхъусут, лӕппутӕ, уӕ фыды зондамындмӕ; лӕмбынӕг хъусут, ӕмӕ уӕ зондыл бафтдзӕнис.

²Ӕз уӕ хорз зондыл сахуыр кӕндзынӕн, ма мын ферох кӕнут мӕ фӕдзӕхст.

³Мӕнӕн дӕр уыди фыд ӕмӕ мад, ӕз дӕр сын уыдтӕн уарзон хъӕбул, сӕ цӕсты рухс.

⁴Мӕ фыд мын-иу ахӕм зонд амыдта: «Мӕ ныхӕстӕ мын дӕ зӕрдыл бадар, мӕ фӕдзӕхстытӕ мын ӕххӕст кӕн ӕмӕ цӕр.

⁵Уӕлзонды хӕзнатӕ агур, зондагурӕг зил, цы дын загътон, уыдӕттӕ ма ферох кӕн, дӕхи сыл ма атигъ кӕн.

⁶Уӕлзонд рохуаты куынӕ ныууадзай, уӕд дӕ хъахъхъӕндзӕн, уарзгӕ йӕ кӕн, ӕмӕ дӕ бахиздзӕн.

⁷Куырыхон зонды райдиан — уӕлзонд агурӕг зилын, де ’ппӕт исбонӕй дӕр зонд балхӕн.

⁸Уӕлзондӕн аргъ кӕн, ӕмӕ дӕ бӕрзонд бынатмӕ сисдзӕн, дӕ хъӕбысы йӕ бакӕн, ӕмӕ дӕ скадджын кӕндзӕн.

⁹Рӕсугъд кады худ дын ӕркӕндзӕн дӕ сӕрыл, диссаджы кады худ дын балӕвар кӕндзӕн.

¹⁰Мӕ лӕппу, байхъус мын мӕ ныхӕстӕм, дӕ зӕрдӕмӕ сӕ айс ӕмӕ бирӕ фӕцӕрдзынӕ.

¹¹Ӕз дын уӕлзонды фӕндаг бацамондзынӕн, раст фӕндагыл дӕ акӕндзынӕн.

¹²Куы фӕцӕйцӕуай, уӕд дӕ цыды къуылымпы не ’ййафдзынӕ, куы азгъорай, уӕд нӕ фӕкӕлдзынӕ.

¹³Зондамындыл фидар хӕц, ма йӕ ныууадз, хъахъхъӕн ӕй, уымӕн ӕмӕ дӕ цард уый мидӕг ис.

¹⁴Ӕнӕхуыцӕутты фӕндагыл ма ныллӕу, фыдгӕнджыты фӕндагыл ма ацу,

¹⁵фӕзил дзы, ма йыл цу, аздӕх, ацу йӕ рӕзты.

¹⁶Уыдон исты фыдбылыз куынӕ саразой, уӕд сыл ӕхсӕв хуыссӕг нӕ хӕцы, искӕмӕн знаггад куынӕ ракӕной, уӕд ӕхсӕвыгон фынӕй нӕ кӕнынц.

¹⁷Фыдракӕндтӕй сӕхи бафсадынц дзулау, ӕмӕ тыхмитӕ сӕнау нуазынц.

¹⁸Рӕстудты фӕндаг — сӕуӕхсиды ’нгӕс, цалынмӕ бынтон не ’рбабон ис, уӕдмӕ ирдӕй-ирддӕр кӕны;

¹⁹ӕнӕхуыцӕутты фӕндаг — саудалынджы ’нгӕс, цӕуыл фӕкӕлдзысты, уый нӕ зонынц.

²⁰Мӕ лӕппу! Байхъус мын мӕ ныхасмӕ, мӕ ныхӕстӕм мын байхъус лӕмбынӕг.

²¹Дӕ цӕст сӕ ма ис, дӕ зӕрдӕйы сӕ арф бавӕр,

²²уымӕн ӕмӕ уыдон, чи сӕ схайджын ис, уымӕн цард дӕттынц, ӕгас буарӕн — ӕнӕниздзинад.

²³Ӕппӕт хӕзнатӕй фылдӕр дӕхи зӕрдӕ хъахъхъӕн — царды гуырӕн уый у.

²⁴Сайӕн ныхас ма ссӕуӕд дӕ дзыхӕй, мӕнг ныхас де ’взагӕй фӕсур.

²⁵Дӕ цӕстытӕй размӕ кӕс, дӕ цӕстӕнгас размӕ сараз.

²⁶Дӕхицӕн раст фӕндаг айгӕрд, ӕмӕ дӕ фӕндӕгтӕ иууылдӕр уыдзысты ӕдас.

²⁷Дӕ фӕндагыл дыууӕрдӕм ма кӕн, ӕвзӕрдзинадӕй дӕхи хиз.