Read Хуыцауы Дзырд иронау Ӕмбисӕндтӕ 5 Bible Online

Ӕмбисӕндтӕ 5 - Хуыцауы Дзырд иронау bible

Ӕмбисӕндтӕ 5

¹Мӕ лӕппу, байхъус мӕ куырыхон зондмӕ, дӕ хъус мӕм ӕрбадар,

²цӕмӕй схайджын уай дардуынӕг зондӕй ӕмӕ дӕ дзыхӕй зонынад хъуыса.

³Искӕй усӕн йе ’взагӕй мыд тӕдзы, йӕ ныхӕстӕ сойӕ фӕлмӕндӕр сты,

⁴фӕлӕ дын фӕстӕдӕр скъӕлдзойау мастад скӕндзӕн, дыкомыг цирхъ дын фестдзӕнис.

⁵Йӕ къӕхтӕ уырдыгмӕ хизынц мӕлӕтмӕ, йӕ къахдзӕфтӕ — мӕрдтыбӕстӕм арӕзт.

⁶Уый царды фӕндагыл нӕ хъуыды кӕны, йӕ фӕндӕгтӕ куыд фӕлдурӕджджын сты, уый йӕхӕдӕг дӕр нӕ зоны.

⁷Уӕдӕ мӕм байхъусут, лӕппутӕ, мӕ ныхӕстыл мын уӕхи ма атигъ кӕнут.

⁸Дӕхи дзы хъахъхъӕн, ӕввахс ма цу йӕ къӕсӕрмӕ,

⁹науӕд дӕ хъарутӕ искӕуыл фӕуыдзынӕ, дӕ цардыбонтӕ ӕнауӕрдонтыл бахардз кӕндзынӕ;

¹⁰дӕ хъаруйӕ ӕцӕгӕлӕттӕ бафсӕддзысты, дӕ фӕллӕйттӕ кӕйдӕр хӕдзармӕ ’рхаудзысты.

¹¹11-12 Дӕ царды кӕрон дӕ буар куы батайа, уӕд хъӕрздзынӕ ӕмӕ дзурдзынӕ: „Зондамынд мын ӕнӕуынон цӕмӕн уыди, уайдзӕфтыл ӕнӕввӕрсон цӕмӕн уыдтӕн?

¹³Цӕуылнӕ хъуыстон мӕ ахуыргӕнджытӕм? Мӕ зондамонджытӕм мӕ хъус цӕуылнӕ ’рдардтон?

¹⁴Иу къахдзӕф ма мӕ хъӕуы, ӕмӕ ’ппӕт адӕмы раз фӕхудинаг уыдзынӕн“.

¹⁵Дӕхи донуаты цы дон ис ӕмӕ дӕхи цъайӕ цы дон кӕлы, уый нуаз.

¹⁶Дӕ дӕттӕ уынгты цӕмӕн хъуамӕ акӕлой, фӕзты лӕсӕнтӕ цӕмӕн хъуамӕ кӕной?

¹⁷Дӕхи уӕнт ӕрмӕстдӕр, искӕимӕ сӕ ма дих кӕн.

¹⁸Дӕхи донгуырӕн арфӕгонд уӕд, де ’рыгон бонтӕй дын цы бинойнаг ис, ууыл цин кӕн.

¹⁹Уарзон хъуаз, зӕрдӕйӕн адджын сычъи! Йӕ риутӕй дӕ ’фсадӕд ӕдзухдӕр, йӕ уарзтӕй йын иудадзыг расыг куыд кӕнай, афтӕ.

²⁰Мӕ лӕппу, цӕмӕн расыг кӕныс дӕхи искӕй усӕй, йӕ астӕуӕн ын хъӕбыстӕ цӕмӕн кӕныс?

²¹Дунедарӕг адӕймагӕн йӕ алы фӕндаг дӕр уыны, йӕ алкӕцы фӕндагмӕ дӕр ын Йӕ цӕст дары.

²²Ӕнӕхуыцау йӕ фыдракӕндты къӕппӕджы бахауы, йӕ тӕригъӕдтӕ — йӕ ахсӕн хыз.

²³Зондамонӕг ын нӕ фӕцис, ӕмӕ фесӕфы, йе ’дылы зонды аххосӕй йӕ фӕндагыл адзӕгъӕл вӕййы.