Read Хуыцауы Дзырд иронау Ӕмбисӕндтӕ 7 Bible Online

Ӕмбисӕндтӕ 7 - Хуыцауы Дзырд иронау bible

Ӕмбисӕндтӕ 7

¹Мӕ лӕппу, мӕ ныхӕстӕ мын дӕ зӕрдыл бадар, мӕ фӕдзӕхстытӕ мын ма ферох кӕн.

²Мӕ фӕдзӕхстытӕ мын ӕххӕст кӕн ӕмӕ цӕрдзынӕ, мӕ зондамынд мын цӕстыгагуыйау хъахъхъӕн.

³Де ’нгуылдзтыл сӕ къухдарӕнау дар, дӕ зӕрдӕйы тӕгтыл сӕ ныффыс.

⁴Уӕлзондӕн зӕгъ: „Мӕ хо дӕ!“, зондимӕ хӕстӕгдзинад бакӕн.

⁵Уыдон дӕ хъахъхъӕндзысты искӕй усӕй, чындзыцыд сылгоймаджы рӕвдауӕн ныхӕстӕй.

⁶Иу хатт мӕ хӕдзары рудзынгӕй кастӕн; згъӕрхызы уылты кӕсын, ӕмӕ

⁷хуымӕтӕг адӕмы астӕу, фӕсивӕды ’хсӕн, иу ӕнӕзонд лӕппуйы бафиппайдтон.

⁸Хъахбай сылгоймаг цы уынджы царди, уым хъеллау кодта, йӕ хӕдзары ’рдӕм ын фӕцӕйцыд.

⁹Хур аныгуылд, изӕрмилтӕ ’рбахъуызыдысты, баталынг.

¹⁰Уалынмӕ дын йӕ размӕ иу сылгоймаг хӕтаг сылы дарӕсы рацӕуы —

¹¹мӕнгард, ӕнӕнцой ӕмӕ къӕйных, йӕ бон хӕдзары бадын кӕмӕн нал у, ахӕм.

¹²Куы уынгты зилы, куы фӕзты, алы тигъыл дӕр хъахъхъӕны.

¹³Фӕлӕбурдта йӕм, аба йын кодта, ӕнӕфсармхуызӕй йӕм дзуры:

¹⁴„Абон ӕз фидыды нывӕндтӕ ’рхастон, мӕ зӕрдӕвӕрдтӕ сӕххӕст кодтон.

¹⁵Дӕ размӕ дӕр уымӕн рацыдтӕн, агуырдтон дӕ ӕмӕ дӕ ссардтон.

¹⁶Мӕ хуыссӕныл ӕмбӕрзӕнтӕ байтыдтон, хуызджын мысыраг хъуымӕцтӕй йӕ сфӕлыстон,

¹⁷бапырх ӕй кодтон миррӕ, алой ӕмӕ корицӕйӕ.

¹⁸Рацу мӕм, боныцъӕхтӕм кӕрӕдзийы рӕвдаудзыстӕм, нӕ уарзты мондӕгтӕ суадздзыстӕм.

¹⁹Мӕ лӕг хӕдзары нӕй, дард балцы ацыди.

²⁰Ӕвзистӕй йедзаг чыссӕ йемӕ ахаста, цалынмӕ мӕй цалхыдзаг суа, уӕдмӕ не ’рыздӕхдзӕн“.

²¹Алыхуызон хинӕйдзаг митӕй йӕ асайдта, адджын ныхӕстӕй йӕ фӕрӕдийын кодта.

²²Лӕппу араст ис йӕ фӕдыл — гал ӕргӕвдынмӕ куыд фӕцӕйцӕуы, саг къӕппӕгмӕ куыд фезгъоры,

²³цалынмӕ фат йӕ игӕрыл нӕ сӕмбӕлы, уӕдмӕ; маргъау тӕхы ахсӕн хызмӕ, уым йӕ мӕлӕт кӕй ссардзӕн, уый нӕ зонгӕйӕ.

²⁴Уӕдӕ мӕм байхъусут, лӕппутӕ, мӕ ныхӕстӕм мын байхъусут лӕмбынӕг.

²⁵Ма бауадз дӕ зӕрдӕ йӕ фӕндагмӕ фӕзилын, йӕ цӕуӕнтыл ын хъеллау ма кӕн,

²⁶уымӕн ӕмӕ йӕ амӕттаг бирӕтӕ баисты, бирӕ адӕмы фесӕфта.

²⁷Йӕ хӕдзар — фӕндаг мӕрдтыбӕстӕм, ингӕнмӕ дӕ батӕрдзӕн».