Read Хуыцауы Дзырд иронау Экклесиаст 1 Bible Online

Экклесиаст 1 - Хуыцауы Дзырд иронау bible

Экклесиаст 1

¹Давиды фырты паддзахы бадӕн Йерусалимы уыди. Хуыцауы ныхас хорз чи амыдта, ахӕм лӕгыл нымад уыд. Афтӕ-иу дзырдта:

²«Алц дӕр аивгъуыйы, алцӕмӕндӕр кӕрон ӕрцӕуы».

³Уӕдӕ арвы бын адӕмӕн се ’ппӕт фӕллӕйттӕй цы баззайы? Ницы.

⁴Ӕрмӕстдӕр фӕлтӕртӕ ивынц кӕрӕдзи, фӕлӕ зӕхх уыцы иухуызонӕй лӕууы.

⁵Хур скӕсы ӕмӕ аныгуылы, ногӕй раздӕхы йӕ бынатмӕ.

⁶Дымгӕ куы хуссарӕрдӕм дымы, куы — цӕгатӕрдӕм, иу уысм дӕр йӕ зилдухӕй не ’нцайы.

⁷Цӕугӕдӕттӕ денджызмӕ кӕлынц, фӕлӕ денджыз нӕ дзаг кӕны; дӕттӕ ног сӕ донгуырӕнмӕ раздӕхынц.

⁸Дуне ӕмызмӕлд кӕны; алцы дзурынӕй бафӕллайӕн ис, алцы цӕстӕй фенӕн нӕй, алцӕмӕ нӕй байхъусӕн.

⁹Цы уыди, уый уыдзӕн, цы ’рцыди, уыдӕттӕ та ’рцӕуынц, арвы бын ногӕй ницы ис.

¹⁰Лӕг арӕх истӕуыл бадис кӕны ӕмӕ фӕзӕгъы: «Уый ног цыдӕр у!» Фӕлӕ дзы уадиссагӕй ницы разыны. Диссаг ӕм цы фӕкаст, уый нӕ фыдӕлтӕ раджы федтой.

¹¹Кӕддӕр чи царди, уыцы фӕлтӕрты абоны фӕлтӕр нӕ хъуыды кӕны, фидӕны чи цӕрдзӕн, уыдон дӕр сӕ байзӕддагӕй ферох уыдзысты.

¹²Ӕз, Хуыцауы ныхас амонӕг, уыдтӕн Израилы паддзах. Мӕ паддзахы бадӕн Йерусалимы уыди.

¹³Ӕз сфӕнд кодтон уӕлзонды фӕрцы, дунейы цыдӕриддӕр ис, уыдӕттӕ бафӕлварын. Ацы ӕвзӕр хъуыддаг Хуыцау адӕмӕн бабар кодта, цӕмӕй тухӕн кӕной.

¹⁴Арвы бын цытӕ цӕуы, уыдӕттӕм лӕмбынӕг куы ’ркастӕн, уӕд бамбӕрстон: алцыдӕр аивгъуыйы, алцыдӕр, дымгӕ ӕрцахсыныл куы архайай, уымӕй уӕлдай нӕу.

¹⁵Зылын цы у, уый ничи сраст скӕндзӕн; цы фӕхъуыди, уый банымайӕн нӕй.

¹⁶Мӕхимӕ гӕсгӕ, Йерусалимы мӕ хуызӕн зондджын ӕмӕ стыр куырыхон лӕг никуыма райгуырд, ӕмӕ йӕ зондӕй мӕныйас ничи ницы бафӕлвӕрдта.

¹⁷Фӕлӕ мӕ ноджы, зонд ӕдылыдзинад ӕмӕ ӕррадзинадӕй цӕмӕй хицӕн кӕны, уый бӕлвырд базонын бафӕндыд. Ӕмӕ бамбӕрстон, уый дӕр та, дымгӕ ’рцахсыныл куы архайай, уымӕй уӕлдай кӕй нӕу.

¹⁸Уымӕн ӕмӕ адӕймаг цас куырыхондӕр кӕны, уыйас йӕ маст арфдӕр кӕны, ӕмӕ йӕ зондыл цас фылдӕр ӕфтауы, уыйас тынгдӕр — йӕ рыст.