Read Хуыцауы Дзырд иронау Экклесиаст 12 Bible Online

Экклесиаст 12 - Хуыцауы Дзырд иронау bible

Экклесиаст 12

¹Ӕвзонджы бонтӕй ма рох кӕн, Сфӕлдисӕгимӕ дӕ сӕмбӕлын кӕй хъӕуы, уый, науӕд фидӕны фӕсмон кӕндзынӕ ӕмӕ дзурдзынӕ: «Бафӕлладтӕн цардӕй!»

²Уӕд хур, мӕй ӕмӕ стъалыты рухс нал фендзынӕ, къӕвда нӕма фӕуыдзӕн, афтӕ фӕстӕмӕ мигътӕй дӕхи ӕмбӕхсдзынӕ.

³Ахӕм рӕстӕг ӕрцӕудзӕн, ӕмӕ хъахъхъӕнджытӕ фыр тӕссӕй нырриздзысты, тыхджынтӕ фӕкӕлдзысты, куыройгӕстӕ сӕ куыст ныууадздзысты, уымӕн ӕмӕ дзӕвгар фӕкъаддӕр уыдзысты; рудзгуытӕй чи кӕсы, уыдон ницыуал фендзысты.

⁴Уынгмӕ цы дуӕрттӕ цӕуынц, уыдон ӕхгӕд ӕрцӕудзысты, куыройы фыдтӕн сӕ зилын нал хъуысдзӕн. Ахӕм адӕймаг-иу мӕргъты уастӕй дӕр фехъал уыдзӕн сӕумӕрайсом, фӕлӕ зарӕджы зӕлтӕ нал фехъусдзӕн.

⁵Искуыдӕм бӕрзонд схизынмӕ йӕ ныфс нал хӕсдзӕн, цӕугӕ дӕр кӕндзӕн тӕрсгӕ-ризгӕйӕ. Йӕ дзыккутӕ ӕхсӕр бӕласы дидинджытау сурс уыдзысты, цъырцъыраг дӕр ӕм уӕззау кӕсдзӕн, йӕ монцтӕй ницыуал баззайдзӕн. Афтӕмӕй йе ’нусон хӕдзармӕ ацӕудзӕн, фӕндагыл йӕ алыварс ӕрӕмбырд уыдзысты хъарӕггӕнджытӕ.

⁶Ӕвзист рӕхыс куы ’рбаскъуына, сыгъзӕрин кӕхц куы ’рбасӕтта, суадоны былыл дурын куы ныппырх уа, цъайы сӕрмӕ донисӕн хъӕд куы асӕтта,

⁷уӕд, зӕххӕй цы рыг ист ӕрцыд, уый фӕстӕмӕ зӕххыл бафтдзӕн, уд та, Чи йӕ радта, уыцы Хуыцаумӕ раздӕхдзӕн.

⁸Алцӕмӕн дӕр кӕрон ӕрцӕуы, — зӕгъы Хуыцауы ныхас амонӕг, — алцыдӕр аивгъуыйы!

⁹Хуыцауы ныхас амонӕг куырыхон лӕг уыди, адӕмӕн-иу зонд амыдта; алцыдӕр бафӕлвӕрдта ӕмӕ басгӕрста, бирӕ ӕмбисӕндтӕ ныффыста.

¹⁰Хуыцауы ныхас амонӕг архайдта аив ныхӕстӕ ссарыныл, ӕмӕ, ӕцӕгдзинад цы дзырдты ис, уыдон ныффыста раст.

¹¹Куырыхонты ӕмбисӕндтӕ — фос тӕрӕджы лӕдзӕджы ӕнгӕс, хост зӕгӕлтау адӕймаджы зӕрдӕйы ахизынц. Чи сӕ фыста, уыдоны иу Фыййау рарвыста.

¹²Мӕ лӕппу, уыдонӕй фӕстӕмӕ цы ис, уыдӕттӕй дӕхи хиз. Бирӕ чингуытӕ ныффыссыныл куы архайай, уӕд сын кӕрон нӕ уыдзӕни, бирӕ кӕсынӕй адӕймагӕн йе ’нӕниздзинад сӕфгӕ кӕны.

¹³Ныр ӕппӕт адӕттӕм куы байхъуыстай, уӕд дын мӕнӕ мӕ ныстуан: кад кӕн Хуыцауӕн ӕмӕ Йын Йӕ фӕдзӕхстытӕ ӕххӕст кӕн, уымӕн ӕмӕ адӕймагӕй ӕндӕр ницы баззайы ӕнусмӕ.

¹⁴Уымӕн ӕмӕ Хуыцау тӕрхон кӕндзӕн алы хъуыддагӕн, уыимӕ — сусӕг хъуыддӕгтӕн, хорзӕй, ӕвзӕрӕй.