Read Хуыцауы Дзырд иронау Экклесиаст 3 Bible Online

Экклесиаст 3 - Хуыцауы Дзырд иронау bible

Экклесиаст 3

¹Дунейы алцӕмӕн дӕр ис бӕлвырд рӕстӕг ӕмӕ хуыздӕр афон:

²райгуырынӕн ӕмӕ амӕлынӕн; тауынӕн ӕмӕ, цы ныссагъдӕуыд, уый ӕд уидӕгтӕ срӕдувынӕн;

³марынӕн ӕмӕ дзӕбӕх кӕнынӕн; халынӕн ӕмӕ аразынӕн;

⁴кӕуынӕн ӕмӕ худынӕн; хъарӕг кӕнынӕн ӕмӕ кафынӕн;

⁵дуртӕ алырдӕм хӕлиу кӕнынӕн ӕмӕ се ’мбырд кӕнынӕн; хъӕбыстӕн ӕмӕ хъӕбыстӕй хи иуварс кӕнынӕн;

⁶агурынӕн ӕмӕ, цы фесӕфтис, уый фӕдыл мауал зилынӕн; бавӕрынӕн ӕмӕ аппарынӕн;

⁷аскъуыйынӕн ӕмӕ бахуыйынӕн; хъусӕй лӕууынӕн ӕмӕ дзурынӕн;

⁸уарзт ӕмӕ ӕнӕуынондзинадӕн; хӕст ӕмӕ фидыдӕн.

⁹Уӕдӕ кусӕг лӕг йӕ хидвӕллойӕ ӕцӕгӕйдӕр цы райсы?

¹⁰Ӕз федтон, Хуыцау адӕмӕн цы куыстытӕ бабар кодта, уыдон се ’ппӕт дӕр.

¹¹Алцыдӕр хорз йӕ афоныл у, Хуыцауӕн фӕндон куыд у, уымӕ гӕсгӕ. Хуыцау адӕмӕн сӕ зӕрдӕты бавӕрдта ӕнусон дуне ӕмбарыны зонд, фӕлӕ Йын Йӕ хъуыддӕгтӕ кӕронмӕ бамбарын адӕймаджы бон нӕу.

¹²Ӕз базыдтон: цалынмӕ адӕймаг зӕххыл цӕры, уӕдмӕ йын хъӕлдзӕг ӕмӕ райгондӕй цӕрынӕй хуыздӕр ницы ис.

¹³Кӕд лӕг хӕры ӕмӕ нуазы, йӕ къухты фӕллойӕ йӕ зӕрдӕ райы, уӕд ын уый Хуыцауӕй лӕвӕрд у.

¹⁴Ӕз бамбӕрстон: Хуыцау цы саразы, уый ӕнусон у. Йӕ хъуыддӕгтӕм Ын бафтауӕн ницы ис, аппарӕн дӕр афтӕ. Уыдӕттӕ аразгӕйӕ, Хуыцау тырны уымӕ, цӕмӕй Йын адӕм кад кӕной.

¹⁵Цы уыди, уый ис ӕмӕ уыдзӕн. Ивгъуыды цыдӕриддӕр уыд, уыдон Хуыцауӕн Йӕ бон фӕстӕмӕ раздахын у.

¹⁶Алы ран дӕр зӕххыл иу хъуыддаг уыдтон: рӕстдзинад кӕм хъуамӕ уа, уым — фыдракӕнд, рӕстады бынаты дӕр афтӕ.

¹⁷Мӕхицӕн загътон: «Хуыцау рӕстудӕн дӕр ӕмӕ фыдгӕнӕгӕн дӕр стӕрхон кӕндзӕн, алцӕмӕн дӕр дӕр йӕхи афон ис».

¹⁸Ноджы ма загътон: «Хуыцау адӕмы фӕлваргӕ кӕны: хъуамӕ бамбарой, ӕнӕ Хуыцауӕй фосӕй уӕлдай кӕй не сты».

¹⁹Уымӕн ӕмӕ сын иу фидӕн ис: фос дӕр ӕмӕ адӕм дӕр мӕлынц, иу уӕлдӕфӕй улӕфынц, адӕймаг фосӕй хуыздӕр ницӕмӕй у. Иутӕ дӕр ӕмӕ иннӕтӕ дӕр фесӕфдзысты.

²⁰Фос дӕр ӕмӕ адӕм дӕр уыцы иу ранмӕ цӕуынц: удӕгасӕй цыдӕриддӕр ис, уыдон иууылдӕр сыджытӕй равзӕрдысты ӕмӕ сыджытыл бафтдзысты.

²¹Бӕлвырд куыд базонӕн ис, адӕймаджы уд уӕларвмӕ атӕхы, цӕрӕгойы уд та зӕххы бынмӕ ацӕуы, уый?

²²Ӕз бамбӕрстон: адӕймагӕн йӕ зӕрдӕ хъуамӕ райа йӕ куыстӕй. Ницы ис лӕгӕн уымӕй хуыздӕр, уымӕн ӕмӕ кусынӕн райгуыры. Йӕ фӕстӕ цы уыдзӕн, уыдон та йын чи равдисдзӕн?