Read Хуыцауы Дзырд иронау Экклесиаст 8 Bible Online

Экклесиаст 8 - Хуыцауы Дзырд иронау bible

Экклесиаст 8

¹Куырыхонимӕ кӕй абардзынӕ? Алцы дын уый хуызӕн чи бамбарын кӕндзӕн? Куырыхоны цӕсгом рухс у, Ӕппӕтхъомыс ын йӕ цӕсгомы хуыз ивы.

²Ӕз афтӕ зӕгъын: байхъус паддзахы фӕдзӕхстмӕ, афтӕмӕй Хуыцауы раз дӕ сомы сӕххӕст кӕндзынӕ.

³Паддзахы цурӕй ацӕуыныл тагъд ма кӕн, галиу хъуыддӕгты дӕхи ма тъысс, уымӕн ӕмӕ паддзах, цы йӕ фӕнда, уый бакӕндзӕн,

⁴ничи йын зӕгъдзӕн, цы кусыс, зӕгъгӕ.

⁵Паддзахы фӕдзӕхст чи ӕххӕст кӕны, уый фыдбылызӕй хызт у; куырыхон, цы кӕнын хъӕуы, уый фӕзоны.

⁶Алы хъуыддагӕн дӕр ис йӕхи афон ӕмӕ тӕрхон, уымӕн ӕмӕ адӕмы фыдракӕндтӕ уӕззау сты.

⁷Адӕймаг, фидӕны цы уыдзӕни, уый нӕ фӕзоны, стӕй йын ӕй чи радзурдзӕн?

⁸Адӕймаг дымгӕ йӕ армы нӕ бауромдзӕн, стӕй йӕ удыл дӕр йӕ бар нӕ цӕуы, цы бон амӕлдзӕн, уый йӕхицӕй аразгӕ нӕу. Ацы мӕлӕтдзаг тохӕн аргъӕвӕн нӕй, суанг фыдгӕнӕг дӕр йӕ фыдбылызты фӕрцы нӕ аирвӕздзӕн.

⁹Ӕз хъуыды кодтон ацы дунейыл; иутӕ ам ӕдзухдӕр хицӕуттӕ сты, иннӕтӕ та сын хъуамӕ сӕхи фыдӕнӕн коммӕгӕс уой. Иу адӕймаг иннӕмӕн хицау куы свӕййы, уӕд ӕй хъизӕмарӕй фӕмары.

¹⁰Ӕз федтон, фыдгӕнджыты кадимӕ куыд ныгӕдтой, уый. Адӕм куыддӕр уаз бынатӕй раздӕхынц, афтӕ фыдгӕнджытӕн, фыдбылызтӕ цы сахары арӕзтой, уым сӕ кой ферох вӕййы. Уыдӕттӕ дӕр тагъд аивгъуыйынц!

¹¹Фыдгӕнджытӕн сӕ тӕрхоны заман тагъд не ’рцӕудзӕн, фыдбылызтӕ кӕнынӕй дӕр уымӕн нӕ тӕрсынц.

¹²Тӕригъӕдджын сӕдӕ хатты тӕригъӕд ракӕны, мӕлӕт та йӕм хӕстӕг нӕ цӕуы. Фӕлӕ йӕ зонын: Хуыцауӕй чи тӕрсы, уыдон амондджын уыдзысты.

¹³Тӕригъӕдджын та хорзӕй ницы фендзӕнис, аууонау фӕцыдӕр уыдзӕн, уымӕн ӕмӕ никуы тарст Хуыцауӕй.

¹⁴Ис зӕххыл, чи аивгъуыйы, ахӕм хъуыддаг: алцы тагъд кӕрӕдзийы ивы, раст лӕджы баййафы фыдгӕнӕджы азар, фыдгӕнӕг та, рӕстуд цӕй аккаг уыд, уый ӕвзары. Ногӕй та зӕгъын: «Алцыдӕр ивгӕ кӕны, алцыдӕр тагъд аивгъуыйы!»

¹⁵Ӕз раппӕлыдтӕн цинӕй: лӕгӕн а зӕххыл нуазын, хӕрын ӕмӕ цин кӕнынӕй хуыздӕр ницы ис. Йӕ куысты фӕллойӕ уыдӕттӕ спайда кӕны, цалынмӕ, Хуыцау ын йӕ зӕххон цардӕн цы ’мгъуыд скодта, уый нӕ ахицӕн ис, уӕдмӕ.

¹⁶Ӕз архайдтон куырыхон зондмӕ баххӕссыныл, мӕн фӕндыд, зӕххыл цытӕ цӕуы, лӕгӕн ӕхсӕвӕй-бонӕй йӕ хуыссӕг кӕй тыххӕй фӕлидзы, уыцы хъуыддӕгтӕ бамбарын.

¹⁷Ӕз федтон Хуыцауы хъуыддӕгтӕ се ’ппӕт дӕр ӕмӕ загътон: адӕймаг, зӕххыл цытӕ цӕуы, уыдӕттӕ никуы бамбардзӕн, цыфӕнды куырыхон куы уа, уӕддӕр. Алцы зонын, зӕгъгӕ, куы дзура, уӕддӕр уымӕн афтӕ уӕвӕн нӕй.