Read Хуыцауы Дзырд иронау Зарджыты зарӕг 1 Bible Online

Зарджыты зарӕг 1 - Хуыцауы Дзырд иронау bible

Зарджыты зарӕг 1

¹Соломоны зарджытӕн сӕ хуыздӕр. Чызг — йӕ уарзонӕн: — О, бафсад мӕ дӕ батӕй! Дӕ рӕвдыд — адджындӕр сӕнӕй!

²Дӕ хӕрздӕф хъары уӕлдӕфы, дӕ ном у адджын, миррӕйы хӕрздӕфау, чызджытӕ дӕ уымӕн уарзынц.

³О, ахон мӕ, мах лидздзыстӕм дӕ фӕдыл! О, паддзах мӕ ӕрбакодта йӕ галуанмӕ! Йерусалимы чызджытӕ: — Зӕрдӕскъӕфт фӕуыдзыстӕм ӕмӕ дыл цин кӕндзыстӕм, дӕ рӕвдыд дын сӕнӕй фылдӕр стаудзыстӕм — аккаг уарзтӕй дӕ уарзынц чызджытӕ! Чызг:

⁴— Йерусалимы чызджытӕ! О, сау дӕн ӕз, фӕлӕ рӕсугъд — кедаронты халагъудтау,[1] Соломоны цатыртау.

⁵О, сау дӕн, уымӕ ма кӕсут — мӕ буар хурмӕ басыгъди. Ме ’фсымӕртӕ мӕм смӕсты сты: сӕ сӕндӕттӕм мын бафӕдзӕхстой зилын — мӕхи сӕндон нӕ бахъахъхъӕдтон! Чызг:

⁶— Зӕгъ-ма мын, мӕ уарзон, кӕм хизыс дӕ фосы дзуг, кӕм улӕфыс ӕмбисбон йемӕ? Дӕу агурӕг кӕдмӕ зилдзынӕн де ’мбӕлтты рӕгъӕуттыл? Йерусалимы чызджытӕ:

⁷— Уӕ, сылгоймӕгты рӕсугъддӕр! Кӕд уыдӕттӕ нырмӕ нӕ зоныс, уӕд цу ӕмӕ фыййӕутты цатырты алыварс хиз дӕ фыстӕ ӕмӕ дӕ сӕгъты. Лӕппу:

⁸— О, мӕ хур! Фараоны бӕхуӕрдоны кӕй баифтындзынц, уыцы ефсимӕ дӕ абарин!

⁹Куыд рӕсугъд сты фӕлындӕнты бын дӕ рустӕ, фӕрдгуыты бын дӕ дӕллагхъуыр куыд аив у!

¹⁰Сыгъзӕрин фӕлындӕнтӕ дын сараздзыстӕм, саив сӕ кӕндзыстӕм ӕвзистӕй. Чызг:

¹¹— Цалынмӕ паддзах йӕ фынджы уӕлхъус бадти, уӕдмӕ мӕ кӕрдӕджыты хӕрздӕф уӕлдӕфы нӕ атад.

¹²Мӕ уарзон хӕрздӕфгӕнаг миррӕйау ӕрӕнцадис мӕ риуыл.

¹³Мӕ уарзон мӕнӕн — Ен-Гедийы сӕндӕтты дидинджыты хӕрздӕф! Лӕппу:

¹⁴— О мӕ уарзон, цӕй диссаджы рӕсугъд дӕ! Бӕлӕтты ’нгӕс — дӕ цӕстытӕ. Чызг:

¹⁵— О мӕ зынаргъ, цӕй диссаджы рӕсугъд дӕ! Нӕ хуыссӕн — цъӕх нӕуу,

¹⁶нӕ уӕлхӕдзар — нӕзытӕ, нӕ систӕ — кипаристӕ.