Read Хуыцауы Дзырд иронау Зарджыты зарӕг 2 Bible Online

Зарджыты зарӕг 2 - Хуыцауы Дзырд иронау bible

Зарджыты зарӕг 2

¹Чызг: — Ӕз — шаройнаг нарцисс, дӕлвӕзты кӕркусӕг! Лӕппу:

²— Кӕркусӕг сындзыты ’хсӕн ивддзаг куыд нӕ кӕны, афтӕ мӕ уарзон чызджыты астӕу бӕрӕг дары. Чызг:

³— Фӕткъуы бӕлас хъӕддаг бӕлӕсты ’хсӕн ивддзаг куыд нӕ кӕны, афтӕ мӕ уарзон лӕппуты астӕу бӕрӕг дары; ӕхсызгон мын у йӕ аууоны бадын, адджын мын сты йӕ дыргътӕ.

⁴— Мӕ уарзон мӕ йӕ куывдмӕ бахуыдта, йӕ уарзты тырыса фӕйлауы мӕ сӕрмӕ.

⁵Фӕфидар мӕ кӕнут адджинӕгтӕй, фӕткъуытӕй мӕ ауазал кӕнут, уымӕн ӕмӕ судзын фыр уарзтӕй!

⁶Йӕ галиу къух мын бакодта мӕ сӕры бын, рахизӕй мӕ ’рбатыхта йӕ хъӕбысы.

⁷Йерусалимы чызджытӕ! Сычъитӕ ӕмӕ быдираг хъуазтӕй расомы кӕнут: ма райхъал кӕнут уарзт, ма йӕ фӕхъыгдарут, цалынмӕ йӕхи бафӕнда, уӕдмӕ! Чызг:

⁸— Мӕ уарзоны хъӕлӕс хъуысы! Хӕхтӕ ӕмӕ къуыбырты сӕрты мӕм гӕппытӕгӕнгӕ ’рбазгъоры.

⁹Сычъийы хуызӕн, саджы ’нгӕс у мӕ уарзон. Мӕнӕ нӕ сисы цур ӕрлӕууыди, рудзынгмӕ кӕсы, хызӕджы уылты ’рбакӕсы мидӕмӕ.

¹⁰Мӕ уарзон мӕм дзуры: «Сыст, мӕ хур, мӕ рӕсугъд, ракӕс мӕм ӕддӕмӕ!

¹¹Кӕсыс, зымӕг фӕцис, уарынтӕ банцадысты,

¹²зӕххы бынӕй дидинджытӕ скастысты; зарын афон ралӕууыд, нӕ бӕстӕйы бӕлӕтты зарын хъуысы.

¹³Фӕкъуыбар сты легъуи бӕлӕстӕ, дидинӕг калынц сӕнӕфсиры талатӕ, сӕ хӕрздӕф хъары уӕлдӕфы. Сыст, мӕ уарзон, ракӕс мӕм ӕддӕмӕ!

¹⁴О, мӕ бӕлон, комы айнӕджы бын чи бамбӕхст! Ратт мын дӕ феныны бар, фехъусын мын кӕн дӕ хъӕлӕс — адджын у дӕ хъӕлӕс, дӕ цӕсгом — диссаджы рӕсугъд!»

¹⁵— Ӕрцахсут рувӕсты ӕмӕ сӕ лӕппынты! Нӕ сӕндӕттӕ нын сафынц сӕ тӕккӕ дидинӕг ӕфтаугӕйӕ! Чызг:

¹⁶— Мӕ уарзон мӕн у, ӕз та уый дӕн, йӕ дзуг кӕркусӕгты ’хсӕн хизы.

¹⁷Цалынмӕ нӕма сбон ис ӕмӕ аууӕттӕ нӕ фӕцыдӕр сты, уӕдмӕ саг кӕнӕ сычъийау хӕхты цъассытыл лидзгӕ кӕн, мӕ уарзон!