Read Хуыцауы Дзырд иронау Зарджыты зарӕг 3 Bible Online

Зарджыты зарӕг 3 - Хуыцауы Дзырд иронау bible

Зарджыты зарӕг 3

¹Чызг: — Ӕхсӕвы мӕ уарзоны агуырдтон мӕ хуыссӕны, фӕлӕ йӕ не ссардтон.

²Уӕдӕ ныр сыстон ӕмӕ сахарыл ӕрзилон, уынгты ӕмӕ фӕзты агурон мӕ уарзоны. Фӕцагуырдтон ӕй, фӕлӕ йӕ не ссардтон.

³Хъахъхъӕнджытыл амбӕлдтӕн — уыдон зылдысты сахарыл, фарстон сӕ: «Нӕ мын федтат мӕ уарзоны?»

⁴Куыддӕр сӕ цурӕй ацыдтӕн, афтӕ дын мӕ уарзоны куы ссарин! Ныххӕцыдтӕн ыл, нал ӕй суӕгъд кодтон, цалынмӕ йӕ не ’рбакодтон мӕ мады хӕдзармӕ, мӕ ныййарӕг мады уатмӕ.

⁵Йерусалимы чызджытӕ! Сычъитӕ ӕмӕ быдираг хъуазтӕй расомы кӕнут: ма райхъал кӕнут уарзт, ма йӕ фӕхъыгдарут! Адӕм:

⁶— Акӕсут-ма, ӕдзӕрӕг быдырӕй арты фӕздӕгау чи ссӕуы, йӕ алыварс — буд ӕмӕ миррӕйы хӕрздӕф, алы хӕрздӕфгӕнӕнтӕ судзынц йӕ разы, афтӕмӕй?

⁷Мӕнӕ — Соломоны къухтыхӕсгӕ паддзахы бадӕн, йӕ разы — ӕхсай гуыппырсары, Израилы тыхджындӕртӕ.

⁸Се ’ппӕт дӕр — фӕлтӕрд ӕфсӕддонтӕ, кӕрдтӕй — ифтонг; алкӕмӕн дӕр йӕ кард йӕ фарсыл — ӕхсӕвыгон мацӕмӕй уа тас.

⁹Соломон йӕ паддзахы бадӕн сарӕзта ливайнаг нӕзытӕй;

¹⁰йӕ цӕджындзтӕ — ӕвзистӕй, йӕ фӕсонӕнцайӕн — сыгъзӕринӕй, йӕ бадӕн — сӕнт сырх хъуымацӕй фӕлыст, Йерусалимы чызджытӕ йӕ зӕрдиагӕй саив кодтой мидӕгӕй.

¹¹Сионы чызджытӕ! Рацӕут ӕмӕ паддзах Соломоны кады худ фенут! Йӕ ныййарӕг мад ыл ӕй йӕ чындзӕхсӕвы, йӕ цины бон ӕркодта!