Read Хуыцауы Дзырд иронау Зарджыты зарӕг 6 Bible Online

Зарджыты зарӕг 6 - Хуыцауы Дзырд иронау bible

Зарджыты зарӕг 6

¹Йерусалимы чызджытӕ: — О сылгоймӕгты рӕсугъддӕр! Кӕдӕм ацыди дӕ уарзон? Кӕцырдӕм фӕраст ис? Цом, иумӕ йӕм агурӕг фӕцӕуӕм. Чызг:

²— Мӕ уарзон йӕ дыргъдонмӕ ныццыди, дидинджыты хӕрздӕфгӕнаг къохмӕ; уым хиздзӕнис йӕ дзуг, кӕркусӕгтӕ ӕмбырд кӕндзӕнис.

³Мӕ уарзон мӕн у, ӕз та уый дӕн, йӕ фысты дзуг кӕркусӕгты ’хсӕн хизы. Лӕппу:

⁴— О мӕ уарзон! Йерусалимау, Тирцайау рӕсугъд дӕ, тырысатимӕ цӕуӕг ӕфсӕдтау — тасӕфтауӕг!

⁵О, ма мӕм кӕс, дӕ цӕстӕнгас мӕ судзы!

⁶Галаады хохы сӕрӕй цыма сӕгътӕ ’рцӕйуайынц, уыйау дӕ дзыккутӕ фӕйлауынц; ногӕлвыд фыстӕ цыма найӕнӕй рацӕйцӕуынц, уыйау урс сты дӕ дӕндӕгтӕ; алкӕмӕн дӕр дзы — фаззон, иу дӕр дзы иунӕг нӕу.

⁷Хызы бынӕй гранаты ’рдджытау сырхӕй зынынц дӕ рустӕ.

⁸Ӕртиссӕдз — мӕ ус-паддзӕхтӕ, мӕ номылустытӕ — цыппарыссӕдзы, ӕнӕнымӕц — чызджытӕ,

⁹фӕлӕ се ’хсӕн иунӕг уый равзӕрстон — мӕ сыгъдӕг бӕлоны; йӕ ныййарӕг мадӕн — иунӕг чызг, йӕ цӕсты рухс. Чызджытӕ йӕм кӕсынц ӕмӕ йӕ стауынц, кад ын кӕнынц ус-паддзӕхтӕ ӕмӕ номылустытӕ. Йерусалимы чызджытӕ:

¹⁰— Чи у уый, чи ӕрттивы сӕуӕхсидау? Мӕйау диссаджы рӕсугъд чи у? Чи ныррухс ис хурау? Тырысатимӕ цӕуӕг ӕфсӕдтау чи у тасӕфтауӕг? Чызг:

¹¹— Ӕз ӕрцыдтӕн ӕнгуз бӕлӕсты къохмӕ: дӕлвӕзы халсартӕм бакӕсынмӕ: сӕнӕфсиртӕ ӕмӕ гранаттӕ дидинӕг ӕфтауынц ӕви нӕ.

¹²Мӕхӕдӕг дӕр ӕй нӕ бамбӕрстон, афтӕ куыд рауадис, уый, фӕлӕ мӕ адӕмы уӕздӕттӕн сӕ уӕрдӕтты цур февзӕрдтӕн!