Read Хуыцауы Дзырд иронау Исайа 16 Bible Online

Исайа 16 - Хуыцауы Дзырд иронау bible

Исайа 16

¹Селайӕ Сионы хохмӕ ӕдзӕрӕг быдырыл арвитут уӕрыччытӕ — бӕстыхицауӕн лӕварӕн.

²Уымӕн ӕмӕ Арноны донуайӕнты цур моаваг чызджытӕ рауай-бауай кӕнынц, сӕ ахстонӕй кӕй раппӕрстой, ахӕм удаист лӕппын цъиутау.

³Бауынаффӕ, зӕгъ, нын кӕн, исты нын, зӕгъ, ӕрхъуыды кӕн. Ӕмбисбоны ӕнтӕфы нӕ дӕ базыры бын бакӕн, ӕхсӕвы тар алцы куыд бааууон кӕны, афтӕ.

⁴Моавы лигъдӕттӕ уал, зӕгъ, ацӕрӕнт дӕумӕ; сӕ фӕдыл чи зилы, уыдоны къухӕй сӕ бахиз. Ӕфхӕрӕг куынӕуал уа, гӕныстонгӕнджытӕ куы фесӕфой,

⁵уӕд ӕрфидар уыдзӕн паддзахдзинад, ӕмӕ паддзахы бадӕныл, Давиды цатыры, ӕрбаддзӕни рӕстаг тӕрхонгӕнӕг, рӕстдзинадыл хӕцӕг.

⁶Мах фехъуыстам, Моав куыд ӕнӕввӕрсон у, йе схъӕл митӕн кӕрон куыд нӕй, куыд къӕйных ӕмӕ куыд налат у, куыд тутт сты йӕ хиппӕлой ныхӕстӕ.

⁷Уымӕ гӕсгӕ йӕ хъысмӕтыл дзыназы Моав, ӕгас бӕстӕ кӕуы! Додой кӕнут ныр, кир-харесетаг чисмисджын гуылтӕ мысгӕйӕ!

⁸Бахус сты Хешбоны сӕндӕттӕ, Сивмайы сӕнӕфсир дӕр афтӕ. Адӕмты барджынтӕ йын йӕ хуыздӕр талатӕ бассӕстой, афтӕмӕй та уыдон кӕддӕр суанг Йазеры онг аххӕссыдысты, дарддӕр та апырх сты ӕдзӕрӕг быдырыл. Уым фӕйнӕрдӕм райрӕзтысты ӕмӕ суанг Мард денджызы фаллаг фарсмӕ бахӕццӕ сты.

⁹Уӕдӕ ӕз дӕр Йазеры цӕрджытимӕ Сивмайы сӕнӕфсирыл кӕудзынӕн. Хешбон ӕмӕ Елале, мӕ цӕссыг уыл фӕкалдзынӕн, уымӕн ӕмӕ тыллӕгӕфснайӕнты цины хъӕр нал хъуысы сымахӕй.

¹⁰Сойджын зӕххыл цин ӕмӕ хъӕлдзӕгдзинадӕн фесӕфти сӕ кой дӕр, сӕндӕттӕй цины зарӕг нал хъуысы. Сӕндондартӕ сӕн нал дуцынц сӕ сӕндуцӕнты, кӕрон ӕрцыди цины хъӕртӕн.

¹¹Хъисфӕндырау дзыназы мӕ зӕрдӕ Моавыл, мӕ уд кӕуы Кир-Хересы хъысмӕтыл.

¹²Моавӕгтӕ сӕхи цасфӕнды хъарӕнт сӕ бӕрзӕндтыл нывӕндтӕ хӕссыныл, сӕ кувӕндонмӕ цӕуӕнт ӕмӕ кувӕнт — уыдӕттӕ сын нал ницыуал баххуыс уыдзысты.

¹³Моавӕн ацы тӕрхон Дунедарӕг рахаста раджы.

¹⁴Ныр та зӕгъы: «Ӕртӕ азы фӕстӕ — нӕдӕр бон раздӕр, нӕдӕр бон фӕстӕдӕр — кадджын Моавыл худинаджы гакк сбаддзӕн. Йӕ бирӕ дзыллӕйӕ ма армыдзаг баззайдзӕн ӕрмӕст».