Read Хуыцауы Дзырд иронау Исайа 22 Bible Online

Исайа 22 - Хуыцауы Дзырд иронау bible

Исайа 22

¹Рагуац Цӕстылуайӕнты дӕлвӕзы тыххӕй. Дӕ цӕрджытӕ уӕлхӕдзӕрттӕм цы схызтысты?

²Цы схъомпал, сахар, дӕ хъӕлӕба, дӕ цины уынӕр куы хъуысы! Дӕ адӕмӕй чи фӕмард ис, уыдон кардылӕфтыд нӕ фесты, тохы быдыры нӕ байсӕфтой сӕ сӕртӕ.

³Тохы быдырӕй ӕмхуызонӕй ралыгъдысты дӕ фӕтӕгтӕ, фӕлӕ уацары бахаудтой, сӕ иуыл дӕр дзы фат суадзыны сӕр фыдгулы нӕ бахъуыди, афтӕмӕй. Дӕ хӕстонтӕй дард чи алыгъд, уыдон дӕр уацарӕй нӕ фервӕзтысты.

⁴Уымӕ гӕсгӕ ӕз зӕгъын, ныууадзут мӕ мӕхи бар. Ӕз зӕрдӕхалӕн хъарӕг кӕндзынӕн. Ныфсӕвӕрӕн ныхӕстӕ мын ма кӕнут, уымӕн ӕмӕ бабын сты мӕ адӕм.

⁵Уый у Дунедарӕджы, Уӕларвӕфсады Бардарӕджы бон Цӕстылуайӕнты Дӕлвӕзы. Уый у сахары систӕ дӕрӕнгӕнӕн бон ӕмӕ хӕхтӕм ӕххуысмӕ дзыназыны бон.

⁶Еламаг хӕстонтӕ ӕрбабырсынц ӕд сагъадахътӕ, ӕд тохуӕрдӕттӕ ӕмӕ ӕд бӕхӕфсад. Киры хӕстонтӕ дӕр сӕ уартытӕ исынц сӕ агъудтӕй.

⁷Дӕ хуыздӕр дӕлвӕзтӕ байдзаг сты тохуӕрдӕттӕй, фыдгулы бӕхӕфсад сахары кулдуары раз ӕрлӕууыд.

⁸Иудей ӕнӕхай фӕци йӕ фидӕрттӕй. Уыцы бон ма сымах уӕ ныфс дардтат, Ливайнаг хъӕдӕй фӕлыст галуаны[1] уын цы хотыхтӕ ӕфснайд уыди, уыдоныл.

⁹Сымах федтат, Давиды сахары быру бирӕ рӕтты къахыртӕ ӕмӕ пырхытӕ кӕй уыд, уый. Дон ӕфтауц кодтат Дӕллаг Цады.

¹⁰Йерусалимы хӕдзӕрттӕй-иу, фехалӕн дзы кӕй уыд, ахӕмтӕ равзӕрстат ӕмӕ-иу сӕ фехӕлдтат, цӕмӕй сын сӕ хӕлддзӕгтӕй сахары быру бампъузат.

¹¹Быруйы къулрӕбын ног донуат скъахтат ӕмӕ йӕм зӕронд цадӕй дон рауагътат. Фӕлӕ сымах, ӕппӕт адӕтты тыххӕй рагацау уынаффӕ Чи рахаста, Уымӕ нӕ кастыстут, ӕмӕ уыдӕттӕ раджы заманы Чи сфӕнд кодта, Уымӕ уе ’ргом нӕ раздӕхтат.

¹²Дунедарӕг, Уӕларвӕфсады Бардарӕг, сымахӕн фӕдзӕхста, цӕмӕй уыцы бон сау дарат ӕмӕ дзыназат, уӕ сӕрыхил алвынат ӕмӕ уӕ уӕлӕ сӕхъис скӕнат.

¹³Фӕлӕ сымах уый бӕсты хъӕлдзӕгдзинад сарӕзтат; цин кӕнут, галтӕ ӕмӕ фыстӕ ӕргӕвдут, дзидза хӕрут, сӕн нуазут ӕмӕ дзурут: «Цӕй уӕдӕ хӕрӕм ӕмӕ нуазӕм — уӕддӕр райсом мӕлгӕ кӕндзыстӕм!»

¹⁴Уӕларвӕфсады Бардарӕг мын загъта: «Ацы тӕригъӕд уын хатыргонд нӕ уыдзӕн уӕ амӕлӕты бонмӕ дӕр». Афтӕ загъта Дунедарӕг, Уӕларвӕфсады Бардарӕг.

¹⁵Дунедарӕг, Уӕларвӕфсады Бардарӕг, загъта: «Бацу-ма уыцы Шевнамӕ, паддзахы галуаны фӕткдармӕ, ӕмӕ йын зӕгъ,

¹⁶ам, зӕгъ, цы агурыс, чи дын, зӕгъ, радта уыцы бар, ӕмӕ ам, уӕлвӕзы, къӕдзӕхыл, дӕхицӕн скӕнай зӕппадз, айнӕджы хуылфы — хӕдзар?

¹⁷Дунедарӕг дӕ ардыгӕй фехсдзӕн, богал, алырдыгӕй дӕ ӕрбалвасдзӕн,

¹⁸къуыбылойау дӕ стухдзӕн ӕмӕ дӕ пуртийау ӕгӕрон тыгъд быдырмӕ ныззыввытт ласдзӕн. Уым ссардзынӕ дӕ мӕлӕт, ӕмӕ уым баззайдзысты дӕ диссаджы тохуӕрдӕттӕ дӕр. Дӕ паддзахы сӕр фӕфидиссаг кодтай!

¹⁹Ӕз дӕ уый тыххӕй раппардзынӕн дӕ бынатӕй, дӕ кадджын бадӕнӕй дӕ расхойдзынӕн».

²⁰Дунедарӕг загъта: «Уыцы бон Ӕз фӕсиддзынӕн Мӕ цагъар Елиакиммӕ, Хилкиайы фыртмӕ,

²¹скӕндзынӕн ыл дӕ кадджын дарӕс, бабӕтдзынӕн ыл дӕ рон ӕмӕ йӕ дӕ бӕсты паддзахы барджынӕй сӕвӕрдзынӕн. Уый Йерусалимы цӕрджытӕ ӕмӕ ӕппӕт иудейӕгтӕн суыдзӕни сӕ фыд.

²²Давиды галуаны дӕгъӕлтӕ йын бакӕндзынӕн йӕ къухы, ӕмӕ галуаны дуарӕн йӕ бакӕнын дӕр, стӕй йӕ рахгӕнын дӕр ӕрмӕст Елиакимы бар уыдзӕн.

²³Ӕз ӕй зӕгӕлау бӕстон ныффидар кӕндзынӕн, ӕмӕ йӕ мыггаджы кад бӕрзонд сисдзӕни.

²⁴Фидар зӕгӕлау уромдзӕни ӕмӕ нӕ фӕцудын кӕндзӕн йӕ фыды хӕдзары кад, цудын нӕ бауадздзӕн йӕ байзӕддаджы кад дӕр — цотӕй, цоты цотӕй. Йӕ бар уыдзысты суанг йӕ хӕдзары мигӕнӕтӕ дӕр, чысыл къусӕй дурыны онг».

²⁵«Уыцы бон, — зӕгъы Уӕларвӕфсады Бардарӕг, — фидар ран цы зӕгӕл ныкъкъуырдӕуыд, уый сызмӕлдзӕн ӕмӕ рахаудзӕн, цыдӕриддӕр ыл ауыгъд уыди, уыдон ныппырх-нызгъӕлӕн уыдзысты». Афтӕ зӕгъы Дунедарӕг.