Read Хуыцауы Дзырд иронау Исайа 32 Bible Online

Исайа 32 - Хуыцауы Дзырд иронау bible

Исайа 32

¹Рӕхджы уын уыдзӕни рӕстаг Паддзах ӕмӕ уӕд паддзӕхтӕ рӕстдзинадмӕ гӕсгӕ хицауиуӕг кӕндзысты.

²Алчидӕр сӕ йӕ адӕмӕн уыдзӕни, сис дымгӕйӕ куыд бахизы, уӕлхӕдзар — тыгъдызӕйӕ, суадӕттӕ хус быдыры куыд бахъӕуынц, бӕрзонд къӕдзӕхы аууон ӕдзӕрӕг ран фӕллад лӕгӕн куыд баххуыс кӕны, уыйау.

³Уӕд адӕмӕн сӕ цӕстытӕ райдайдзысты уынын, хъустӕ — хъусын.

⁴Рӕузондты сӕры бацӕудзӕни зонд, гуылӕвзӕгтӕ райдайдзысты раст дзурын.

⁵Ӕдылыдзӕфӕй, кадджын у, зӕгъгӕ, нал дзурдзысты фӕлитойы нал хондзысты ӕууӕнкджын.

⁶Уымӕн ӕмӕ ӕнӕхуыцау ӕнӕхуыцау ныхӕстӕ кӕны, фыдвӕндтӕ кӕны йӕхимидӕг, ӕнӕхуыцау сты йӕ митӕ, Дунедарӕджы тыххӕй тӕригъӕд дзуры, ӕххормагӕн комдзаг хӕлӕг кӕны, дойныйӕ мӕлӕгӕн — дон.

⁷Фӕлитой адӕймаг фыдбылыз аразӕг у, тӕрхоны раз йӕ налат ӕвзаг суадзы ӕмӕ мӕгуыр лӕджы бабын кӕны рӕстӕй.

⁸Ӕууӕнкджын лӕгӕн та йӕ фӕндтӕ дӕр ӕфсармджын сты. Алы хъуыддаджы дӕр сыгъдӕг у йӕ цӕсгом.

⁹Ӕнӕсагъӕс сылгоймӕгтӕ ӕмӕ ӕнӕмӕт чызджытӕ, ӕрбайхъусут-ма, цы уын зӕгъон, уымӕ!

¹⁰Иу афӕдз ӕмӕ къорд боны фӕстӕ фыр тӕссӕй нырриздзыстут, ӕнӕмӕттӕ! Уымӕн ӕмӕ нӕдӕр сӕнӕфсиртонӕнтӕ ралӕудзысты, нӕдӕр — тыллӕгӕфснайӕнтӕ.

¹¹Ӕмризӕджы ризут, ӕнӕмӕттӕ! Тӕрсут, ӕнӕмӕттӕ! Уӕ дарӕстӕ раласут ӕмӕ уӕ уӕлӕ сӕхъистӕ скӕнут.

¹²Фыр адӕргӕй хойут уӕ риутӕ! Кӕут рӕсугъд хуымтӕ ӕмӕ сӕнӕфсиры зад талайыл!

¹³Кӕут Мӕ адӕмы хуымтыл: каконтӕ ӕмӕ сындзыты бын фӕуыдзысты. Кӕут, уымӕн ӕмӕ хӕдзӕртты бамыр уыдзӕни цин, сахары мидӕг хъӕлдзӕгӕн йӕ кой, йӕ хъӕр дӕр нал уыдзӕн.

¹⁴Уымӕн ӕмӕ галуан дӕр сафтид, сахар дӕр федзӕрӕг уыдзӕн. Ныккӕлдзысты Офел[1] ӕмӕ хъахъхъӕнӕн мӕсыг, ӕмӕ дзы мыггагмӕ ӕрбынат кӕндзысты хъӕддаг хӕрджытӕ, ривӕд дзы кӕндзысты фосы дзугтӕ,

¹⁵цалынмӕ ныл Дунедарӕг бӕрзондӕй Йӕ Уды арфӕ не ’руадза, уӕдмӕ. Ӕмӕ уӕд ӕдзӕрӕг быдыр фестдзӕни дыргъдон, дыргъдон та хъӕды хуызӕн суыдзӕн.

¹⁶Уӕд Хуыцауы раст тӕрхон ӕрфидар уыдзӕн алы ран дӕр, ӕдзӕрӕг быдыры уа ӕви дыргъдоны.

¹⁷Уӕд раст тӕрхоны фӕрцы мыггагмӕ ӕрбынӕттон уыдзысты фарн, ӕнцой ӕмӕ ӕдасдзинад.

¹⁸Мӕ адӕм цӕрдзысты фӕрнджын ран, ӕдас, ӕнӕмастӕй.

¹⁹Их-иу куы ныууара — ӕрмӕстдӕр хъӕды бӕлӕстыл. Сахары цӕрджытӕ-иу дӕлвӕзмӕ ӕрхиздзысты ӕдасӕй, ӕнӕкъуылымпыйӕ.

²⁰Тӕхудиаг уыдзыстут: байтаудзыстут донӕфсӕст хуымтӕ иууылдӕр, алы ран хиздзыстут уӕ галтӕ ӕмӕ уӕ хӕрджыты.