Read Хуыцауы Дзырд иронау Исайа 34 Bible Online

Исайа 34 - Хуыцауы Дзырд иронау bible

Исайа 34

¹Ӕввахс ӕрбалӕуут, алы адӕмтӕ, алы знӕмтӕ! Лӕмбынӕг ӕрбайхъусут! Ӕрбайхъусӕд ӕгас дуне, ӕппӕт зӕхх йӕ цӕрджытимӕ!

²Дунедарӕджы маст ссыгъд ӕппӕт адӕмтӕм, ӕппӕт дзыллӕтӕм. Йӕ азары амӕттаг сӕ бакодта, мӕлӕты тӕрхон сын рахаста.

³Сӕ мӕрдтӕ баззайдзысты уӕлӕуыл ӕмӕ сысмаг уыдзысты, хӕхтӕ ныуудӕсдзысты сӕ туджы.

⁴Стъалытӕ бастъӕлдзысты, уӕлӕрвтӕ батымбыл уыдзысты тухгӕ чиныгау, сӕ мидӕг цыдӕриддӕр ис, уыдон иууылдӕр ӕрызгъӕлдзысты, сӕнӕфсир ӕмӕ легъуийы хус сыфтӕрау.

⁵Уӕлӕрвты кардӕлвӕстӕй лӕууы Дунедарӕг, тӕрхон кӕнынмӕ ӕрхиздзӕн Едоммӕ, Йӕ азары амӕттаг бакӕнинаг кӕй у, уыцы адӕммӕ.

⁶Туг ӕмӕ сой лӕдӕрсдзысты Дунедарӕджы кардӕй, фыстӕ ӕмӕ сӕгътӕ ’ргӕвдгӕйӕ куыд вӕййы, афтӕ. Уымӕн ӕмӕ Дунедарӕг кусарт кӕндзӕни Боцрайы сахары, бирӕ ӕргӕвстытӕ уыдзӕн Едомы зӕххыл.

⁷Семӕ афӕлдӕхдзысты хъӕддаг галтӕ дӕр, родтӕ ӕмӕ хъомылтӕ. Зӕхх ныддымсдзӕни сӕ тугӕй, ныттыппыр уыдзӕни сӕ фиуӕй.

⁸Уый уыдзӕни Дунедарӕджы мастисӕн бон, Сионы фыдгултӕн се сӕфты заман.

⁹Едомӕн йӕ дӕттӕ фестдзысты писи, йӕ мӕр — сондон. Афтӕмӕй йӕ зӕхх иууылдӕр фестдзӕни судзгӕ писи,

¹⁰судздзӕн ӕппынӕдзух, бон дӕр ӕмӕ ӕхсӕв дӕр. Йӕ фӕздӕг калдзӕн ӕнусты, мыггагӕй-мыггагмӕ уыдзӕни ӕдзӕрӕг, лӕджы къах ыл никуыуал ауайдзӕн.

¹¹Фестдзӕни зымтӕ ӕмӕ уызынты бӕстӕ, сидахъхъытӕ ӕмӕ сынтыты цӕрӕн. Дунедарӕг ӕй абардзӕни бӕндӕнӕй ӕмӕ йын йӕ арӕнтыл алырдыгӕй ӕрӕвӕрдзӕн арӕндуртӕ, цӕмӕй мыггагмӕ уа гӕныстон ӕмӕ ӕдзӕрӕг.

¹²Иу дӕр нал баззайдзӕн Едомы уӕздӕттӕй, йе ’лдӕрттӕ бабын уыдзысты иууылдӕр.

¹³Каконтӕ, сындзкъутӕр ӕмӕ ичъийы бын фӕуыдзысты сӕ галуантӕ, сӕ фидӕрттӕ. Фестдзысты мӕрдтыбирӕгъты цӕрӕнтӕ, страусты бадӕнтӕ.

¹⁴Уым кӕрӕдзиуыл ӕмбӕлдзысты хъӕддаг гӕдытӕ ӕмӕ гиенӕтӕ, хъӕддаг сӕгътӕ уым кӕрӕдзимӕ сиддзысты. Ӕхсӕвдзу ӕндӕргтӕ дзы уадздзысты сӕ фӕллад.

¹⁵Ахстон дзы скӕндзӕни калм, ӕйчытӕ дзы ӕрӕфтаудзӕн ӕмӕ-иу сыл ӕрбаддзӕн. Цъиусуртӕ дзы ӕмбырд кӕндзысты.

¹⁶Дунедарӕджы чиныгмӕ ӕркӕсут ӕмӕ базонат: уыдон иууылдӕр къайгай уыдзысты уым. Уымӕн ӕмӕ сын уый Дунедарӕгӕн Йӕхи фӕдзӕхст у, ӕрӕмбырд сӕ кӕндзӕн Йӕ Уды фӕрцы.

¹⁷Алкӕй тыххӕй дӕр дзы хал сӕппардзӕн ӕмӕ бӕндӕнӕй абардзӕн Едомы зӕххӕй. Ӕмӕ уыцы хӕйттӕ ӕнусты уыдзысты сӕ бар, цӕрдзысты дзы мыггагӕй-мыггагмӕ.