Read Хуыцауы Дзырд иронау Исайа 38 Bible Online

Исайа 38 - Хуыцауы Дзырд иронау bible

Исайа 38

¹Уыцы бонты Езекиа фӕци мӕлӕтдзаг рынчын. Амоцы фырт, пехуымпар Исайа йӕм ӕрбацыд ӕмӕ загъта: «Дунедарӕг дын фӕдзӕхсы, дӕ хӕдзаронтӕн, дам, ныууадз ныстуан, уымӕн ӕмӕ мӕлӕтдзаг низӕй нал сдзӕбӕх уыдзынӕ».

²Езекиа къулы ’рдӕм азылди ӕмӕ Дунедарӕгмӕ скуывта:

³«О Дунедарӕг! Рох Дӕ ма уӕд, иузӕрдион Дыл кӕй уыдтӕн, уый. Зӕрдиагӕй Дӕм хъуыстон, ӕдзух Дын Дӕ фӕндон ӕххӕст кодтон». Ӕмӕ ныккуыдта.

⁴4-5 Уӕд Дунедарӕг Исайайӕн бафӕдзӕхста, Езекиамӕ бацу ӕмӕ йын Мӕ номӕй, Давиды Хуыцауы номӕй, зӕгъ: «Дӕ куывд дын фехъуыстон, федтон дын дӕ цӕстысыг дӕр ӕмӕ ма дын дӕттын фынддӕс азы цӕрӕнбон.

⁶Ассирийы паддзахы фыдӕхӕй фервӕзын кӕндзынӕн дӕу дӕр ӕмӕ ацы сахар дӕр. Ӕз бахъахъхъӕндзынӕн Йерусалим.

⁷Мӕнӕ дын нысан, Хуыцау Йӕ дзырд кӕй сӕххӕст кӕндзӕн, уый тыххӕй.

⁸Ныртӕккӕ паддзах Ахазы конд асиныл дӕс къӕпхӕны бӕрц фӕстӕмӕ ссӕуын кӕндзынӕн хуры аууон». Ӕмӕ хур фӕстӕмӕ ссыди, цы дӕс къӕпхӕныл ӕрхызти, уыдоныл.

⁹Езекиа йӕ низӕй куы сдзӕбӕх, уӕд ныффыста ацы куывд:

¹⁰«Мӕхицӕн загътон, мӕ царды тӕккӕ ӕмбисы мӕ мӕрдтыбӕсты къӕсӕрыл бахизын хъӕуы.

¹¹Дзырдтон, нӕ фендзынӕн Дунедарӕджы, нӕ фендзынӕн Дунедарӕджы а дунейыл, нал рацӕудзынӕн адӕмы ’хсӕнмӕ.

¹²Мӕ цӕрӕнуат мын ахӕсдзысты йӕ бынатӕй фыййауы мусонгау. Тынуафӕг йӕ тын куыд батухы, афтӕ батухдзынӕн мӕ цард. Ды мын ӕй алыг кӕндзынӕ, тынуафӕг цӕттӕ тын куыд алыг кӕны, уыйау. Бон ӕмӕ ӕхсӕв ӕнхъӕлмӕ кастӕн, кӕрон мын кӕд скӕндзынӕ, уымӕ.

¹³Мӕхицӕн ныфсытӕ ӕвӕрдтон райсоммӕ, кӕд фӕдзӕбӕх уаин, зӕгъгӕ, фӕлӕ мын низ домбайау ме стӕг саста. О, бон ӕмӕ ӕхсӕв ӕнхъӕлмӕ кастӕн, кӕрон мын кӕд скӕндзынӕ, уымӕ.

¹⁴Мӕ хъӕлӕс уыди зӕрватыччы цъиу-цъиуы, бӕлоны хъуырруйы хуызӕн. Арвы бӕрзондмӕ кастӕн ныфссастӕй ӕмӕ куывтон: „О Дунедарӕг! Нал фӕразын, фӕдзӕхсын дыл Мӕхи!“

¹⁵Ӕндӕр цы загътаин? Йӕхӕдӕг мын сарӕзта, ныфс мын цӕмӕй бавӕрдта, уый. Ӕмӕ ныр ӕнцад ӕрвитдзынӕн мӕ царды бонтӕ, мӕ уды хъизӕмар мысгӕйӕ.

¹⁶О Дунедарӕг! Афтӕ цӕрынц адӕм, Уыдӕтты мидӕг — йӕ царды мидис мӕ удӕн. Ды мӕ сдзӕбӕх кӕндзынӕ, цард мын балӕвар кӕндзынӕ.

¹⁷Мӕ хъизӕмар мын хорзӕрдӕм фӕци. Ингӕны къӕсӕрӕй мӕ раздӕхтай, мӕ тӕригъӕдтӕ мын Дӕ фӕсчъылдыммӕ фехстай дард.

¹⁸Мӕрдтыбӕсты Дын ничи скад кӕндзӕн, мард чи у, уый нӕ ныззардзӕн Дӕ кадӕн. Ингӕнмӕ чи ныххиза, уый Дыл нӕ бафӕдзӕхсдзӕн йӕхи.

¹⁹Ӕрмӕстдӕр ӕгас чи у, уый Дын скӕндзӕни кад мӕнӕ мӕнау абон. Фыд дзурдзӕн йӕ цотӕн, цӕмӕй Дыл фӕдзӕхсой сӕхи.

²⁰Дунедарӕг мӕ фервӕзын кӕндзӕн, ӕмӕ, цалынмӕ цӕрӕм, уӕдмӕ хъисфӕндыртӕй цӕгъддзыстӕм Йӕ Кувӕндоны».

²¹Исайа загъта: «Ӕрбахӕссӕнт легъуиты хустӕ, йӕ хӕфдзастыл ын сӕ ӕрӕвӕрӕнт, ӕмӕ уӕд сдзӕбӕх уыдзӕн».

²²Езекиа бафарста: «Цӕмӕй базондзынӕн, ногӕй та Дунедарӕджы Кувӕндонмӕ бацӕуын мӕ бон суыдзӕн, уый?»