Read Хуыцауы Дзырд иронау Исайа 43 Bible Online

Исайа 43 - Хуыцауы Дзырд иронау bible

Исайа 43

¹Фӕлӕ уын ныр, Израилы адӕм, Йаковы байзӕддӕгтӕ, уе сфӕлдисӕг Дунедарӕг зӕгъы: «Ма тӕрсут, Ӕз уӕ ссӕрибар кӕндзынӕн! Ӕз уӕм басидтӕн уӕ номӕй, уымӕн ӕмӕ Мӕн стут!

²Доны сӕрты ахизын уӕ куы хъӕуа, уӕд уыдзынӕн уемӕ, цӕугӕдӕтты сӕрты куы хизат, уӕд нӕ фӕдӕлдон уыдзыстут. Арты сӕрты хизгӕйӕ, уӕхи басудздзыстут ӕмӕ уӕ арт нӕ ацараудзӕн.

³Уымӕн ӕмӕ Ӕз Дунедарӕг дӕн, уӕ Хуыцау, Израилы Стыр Хуыцау. Уӕ балхӕнынӕн радтон Мысыр, ноджы ма — Эфиопи ӕмӕ Сева.

⁴Ахӕм зынаргъ Мын стут, афтӕ бирӕ уӕ уарзын, ӕмӕ уын уӕ сӕрвӕлтау ратдзынӕн иннӕ адӕмты, ӕнӕхъӕн дуне.

⁵Мацӕмӕй тӕрсут, уымӕн ӕмӕ Ӕз уемӕ дӕн ӕмӕ уе ’ппӕты дӕр ӕрӕмбырд кӕндзынӕн скӕсӕнӕй дӕр ӕмӕ ныгуылӕнӕй дӕр.

⁶Цӕгатӕн зӕгъдзынӕн: „Ӕри Мын сӕ!!“ Хуссарӕн та: „Мауал Мын сӕ уром!“ Дардӕй Мын ӕрбакӕнут Мӕ фыртты, зӕххы кӕрӕттӕй — Мӕ чызджыты,

⁷Мӕ ном чидӕриддӕр хӕссы, уыдоны, Мӕ кадӕн кӕй сфӕлдыстон, кӕй рантысын кодтон, фӕлгонц кӕмӕн радтон, ӕппӕт уыдоны».

⁸Размӕ рацӕуӕнт Мӕ адӕм, цӕстытӕ кӕмӕн ис, фӕлӕ сӕ уынгӕ чи нӕ кӕны, хъустӕ кӕмӕн ис, фӕлӕ сӕ хъусгӕ чи нӕ кӕны!

⁹Иумӕ ӕрӕмбырд уӕнт адӕмтӕ, ӕртыгуыр уӕнт дзыллӕтӕ! Фӕлӕ уыцы хъуыддаг кӕй ӕрцӕудзӕн, уый сӕ рагацау чи загъта? Ӕрбакӕнӕнт сӕхицӕн ӕвдисӕнтӕ ӕмӕ сӕхи сраст кӕнӕнт, цӕмӕй хъусджытӕ зӕгъой, раст сты, зӕгъгӕ!

¹⁰Дунедарӕг зӕгъы: «Сымах Ме ’вдисӕнтӕ стут. О, сымах ӕмӕ Мӕ цагъар, Ме ’взӕрст. Мӕ хъуыддӕгтӕн стут ӕвдисӕнтӕ, цӕмӕй Мӕ базонат, цӕмӕй баууӕндат, Ӕз Иунӕг Стыр Хуыцау кӕй дӕн ӕмӕ ӕндӕр Хуыцау Мӕ разӕй дӕр кӕй никуы уыд ӕмӕ Мӕ фӕстӕ дӕр кӕй никуы уыдзӕн, ууыл.

¹¹Дунедарӕг ӕрмӕстдӕр Ӕз дӕн! Мӕн йеддӕмӕ Ирвӕзынгӕнӕг ничи у!

¹²Ӕз рагагъоммӕ загътон, кӕй уӕ фервӕзын кӕндзынӕн, уый тыххӕй ӕмӕ уын ӕй фехъусын кодтон. Гъеныр Мын стут ӕвдисӕнтӕ, уымӕн ӕмӕ базыдтат, Ӕз Хуыцау кӕй дӕн, уый.

¹³Ӕз райдианӕй нырмӕ дӕр гъе уыцы Хуыцау дӕн. Мӕ къухӕй никӕй бон бауыдзӕни байсын. Мӕ фӕнд дӕр никӕй бон у аивын».

¹⁴Афтӕ зӕгъы Дунедарӕг, Израилы Стыр Хуыцау, уӕ Ирвӕзынгӕнӕг: «Сымах сӕраппонд Ӕз Вавилонмӕ арвыстон тыхгӕнӕг ӕмӕ фӕлидзӕг кӕндзынӕн уе ’фхӕрджыты. Удаистӕй халдейӕгтӕ лидздзысты, ныр сӕ цины хъӕртӕ кӕцӕй хъуысынц, уыцы наутыл.

¹⁵Ӕз Дунедарӕг дӕн, уе Стыр Хуыцау, Израилы Сфӕлдисӕг, уӕ Паддзах!»

¹⁶Дунедарӕг зӕгъы: «Ӕз Мӕ адӕмӕн денджызы бынты, бӕрзонд уылӕнты ’хсӕнты, кӕддӕр айгӕрстон фӕндаг.

¹⁷Фӕсте сӕ тохуӕрдӕттӕ ӕмӕ бӕхтыл цы тыхджын ӕфсад сырдта, уый бабын ис. Ӕрхаудысты ӕмӕ сӕ бон нал баци сыстын. Сӕ зынг ахуыссыд, судзгӕ цырагъ куыд ӕрмынӕг вӕййы ӕмӕ ахуыссы, уыйау.

¹⁸Фӕлӕ сымах нӕ сагъӕс кӕнут уыцы рагон цауыл — ферох ӕй кодтат.

¹⁹Ныр уӕ сӕраппонд аразын ног хъуыддаг. Хурау бӕрӕг куы у, кӕй ӕрцӕудзӕн, уый, уӕд ӕй нӕ фиппайут? Ӕдзӕрӕг быдыры уын айгӕрддзынӕн фӕндаг, сыгъд быдырты уын рауадздзынӕн цӕугӕдӕттӕ.

²⁰Кад Мын кӕндзысты тугдзых сырдтӕ, мӕрдтыбирӕгътӕ ӕмӕ страустӕ, уымӕн ӕмӕ сыгъд быдыртыл рауадздзынӕн цӕугӕдӕттӕ, цӕмӕй Ме ’взӕрст адӕмы бафсадон донӕй.

²¹Уыцы адӕмы Ӕз сфӕлдыстон Мӕхицӕн, ӕмӕ Мын дунейыл айхъуысын кӕндзысты Мӕ кад, Мӕ ном».

²²Дунедарӕг загъта Израилы адӕмӕн, Йаковы байзӕддагӕн: «Сымах нӕ куывтат Мӕнмӕ, нӕ хъизӕмар кодтат Мӕн тыххӕй.

²³Уӕ фыстӕй Мын нӕ хастат иууылсудзинаг, ницы нывӕндтӕ Мын кодтат Мӕ кадӕн. Нӕ уӕ домдтон Мӕхицӕн хойраджы хуынтӕ, нӕ уӕ тыхсын кодтон, буд Мын судзут, зӕгъгӕ.

²⁴Ӕвзистӕй Мын не ’лхӕдтат хӕрздӕфгӕнӕн буд, нӕ Мӕ ’фсӕстат уӕ нывӕндты нардӕй. Фӕлӕ Мӕ уыйхыгъд фыдӕбоны хай кодтат уӕ тӕригъӕдтӕй, ӕвӕрдтат Мыл уӕ азымы уӕззау уӕргътӕ.

²⁵Фӕлӕ уын Ӕз Мӕхи сӕраппонд барын уӕ фыдракӕндтӕ, уӕ тӕригъӕдтӕ уын нӕ бадардзынӕн уӕ цӕстмӕ.

²⁶Цӕй ӕмӕ иумӕ тӕрхоны раз ӕрлӕууӕм, ӕмӕ уӕхи сраст кӕнут уӕ раныхасӕй!

²⁷Уӕ фыдӕл Йаков дӕр ракодта тӕригъӕд, уӕ раздзӕуджытӕ рацыдысты Мӕ ныхмӕ.

²⁸Уымӕ гӕсгӕ уын Ӕз уӕ сауджынты сӕгад кӕндзынӕн, Йаковы байзӕддаджы Мӕ азары хай бакӕндзынӕн, Израилы ныффидиссаг кӕндзынӕн».