Read Хуыцауы Дзырд иронау Исайа 57 Bible Online

Исайа 57 - Хуыцауы Дзырд иронау bible

Исайа 57

¹«Раст адӕймаг амӕлы, ӕмӕ йыл ничи бахъынцъым кӕны, Хуыцаумӕ кувӕг цардӕй ахицӕн вӕййы, ӕмӕ йӕ ничи бамбары, цӕмӕн. Рӕстуды иуварс айстӕуы фыддзинадӕй,

²ӕмӕ ӕрӕнцайы. Раст фӕндагыл чи цӕуы, уыдон сӕ удтӕн ӕнцой ссардзысты.

³Мӕ цуры ӕрлӕуут, къулбадӕгусы лӕппутӕ, хӕтаг лӕг ӕмӕ хъахбай сылгоймаджы цот!

⁴Сымах кӕмӕй хынджылӕг кӕнут? Ӕвзӕр дзыхӕй кӕмӕ дзурут, уе ’взаг кӕмӕ суагътат? Сымах стут фыдгӕнджыты цот, фӕлитойты байзӕддаг.

⁵Алы пӕлӕхсар бӕласы бын ӕнӕуаг митӕ кӕнут уӕ мӕнгхуыцӕуттимӕ, ноджы ма къӕдзӕхты бын комы нарджыты, тӕрфыты, кусарт кӕнут уӕ сабиты.

⁶Къададӕтты дойнаг дуртӕ — уӕ хай, уӕ амонд. Уыдонӕн ӕрбахӕссут сӕн, лӕвар сын кӕнут хойраджы хуынтӕ. Ӕмӕ Ӕз уыдӕттӕй райгонд куыд хъуамӕ уон?

⁷Уӕ, Израил! Бӕрзонд хохыл сарӕзтай де ’нӕуаг кувӕн бынат ӕмӕ йыл хӕссыс нывӕндтӕ.

⁸Дӕ хӕдзары миддуар ӕмӕ дӕ тарвӕзты цур ӕрӕвӕрдтай дӕ табуйаг нысӕнттӕ. Мӕныл дӕхи атигъ кодтай ӕмӕ араст вӕййыс дӕ кувӕн бынатмӕ, ноджы йӕ фӕпарахатдӕр кодтай. Бафидыдтай, ӕнӕуаг митӕ кӕнын кӕимӕ уарзыс, уыдонимӕ ӕмӕ сын сӕ кувӕн бынӕттыл фӕлгӕсыс.

⁹Мӕнгхуыцау Молохӕн снывонд кодтай сӕрдӕн сой, сарӕзтай йын бирӕ хӕрздӕфгӕнӕнтӕ. Мӕрдтыбӕсты онг абалц кӕнын кодтай дӕ минӕвӕртты.

¹⁰Бирӕтӕ федтай ӕмӕ-иу бастадтӕ, фӕлӕ никуы загътай, мӕ ныфс асасти, зӕгъгӕ. Бирӕ ма дын ӕнтыст ӕмӕ дӕ хъару нӕ сӕфти.

¹¹Афтӕ тынг кӕмӕй фӕтарстӕ, ӕмӕ Мӕныл дӕ зӕрдӕ сивай, хъуыды дӕр Мӕ мауал кӕнай? Дзӕвгар рӕстӕг дын Мӕхи кӕй нал раргом кодтон, ӕдзӕмӕй кӕй фӕлӕууыдтӕн, уый тыххӕй Мӕ нал тӕрсыс?

¹²Гъемӕ дын Ӕз раргом кӕндзынӕн, дӕ митӕ куыд раст сты, уый. Ӕмӕ уӕд бӕрӕг уыдзӕни, цы пайда дын ӕрхӕссой, уый.

¹³Дзыназын куы байдайай, уӕд дӕм бакӕсдзыстӕм, кӕддӕра дӕ куыд фервӕзын кӕндзысты дӕ бирӕ гуымирытӕ. Се ’ппӕт дӕр дымгӕмӕ дард ӕрцӕудзысты, Йӕ зӕрдӕ Мӕныл чи дары, уыдоны хай бауыдзӕни зӕхх, Мӕ уаз хох бауыдзӕни сӕ исбон».

¹⁴Дунедарӕг зӕгъы: «Мӕ адӕмӕн айгӕрдут фӕндаг! Айгӕрдут ӕмӕ йӕ слӕгъз кӕнут, иунӕг цӕлхдур дӕр ыл ма ныууадзут!»

¹⁵Афтӕ зӕгъы Бӕрзонд, Кадджын, Мыггагмӕцӕрӕг, Уаз Чи хуыйны, Уый: «Ӕз цӕрын уаз бӕрзӕндты, фӕлӕ ма ноджы — састзӕрдӕтимӕ ӕмӕ сӕрныллӕгтимӕ. Састзӕрдӕтӕн раттын ныфс, сӕрныллӕгтӕн сӕ зӕрдӕтӕ райгас кӕнын.

¹⁶Мыггагмӕ сӕ азымджын нӕ кӕндзынӕн, мӕсты нӕ кӕндзынӕн ӕдзухдӕр, науӕд адӕм, Ме сконд адӕм, бынтондӕр рафтдзысты Мӕ разы.

¹⁷Зыд ӕмӕ кӕрӕф кӕй уыдысты, уый тыххӕй сыл Мӕ маст калдтон, цагътон сӕ ӕмӕ сӕ фыр мӕстӕй Мӕхи ӕмбӕхстон, фӕлӕ уӕддӕр кодтой, сӕхи цы фӕндыди, уый.

¹⁸Цытӕ кодтой, уый Ӕз дзӕбӕх уыдтон. Фӕлӕ сӕ ныр сӕ къахыл слӕууын кӕндзынӕн ӕмӕ сӕ раст фӕндагыл сараздзынӕн. Цы мӕстытӕ бавзӕрстой, уыдоны фӕстӕ сӕ барӕвдаудзынӕн, ныфс сӕ бауадздзынӕн.

¹⁹Ӕз афтӕ бакӕндзынӕн, ӕмӕ Мӕ дзыхы ныхасӕй дӕр стаудзысты. Ратдзынӕн сын амонд ӕмӕ фарн — дард чи у, уыдонӕн дӕр, ӕмӕ хӕстӕг чи у, уыдонӕн дӕр. Се ’ппӕты дӕр сӕ къахыл слӕууын кӕндзынӕн», — афтӕ зӕгъын Ӕз — Дунедарӕг.

²⁰Ныр ӕнаккӕгтӕ та сты, ӕнӕнцой денджызы хуылфӕй сурмӕ лами ӕмӕ алы цъыф чи раппары, уыцы знӕт уылӕнтау.

²¹«Ӕнаккӕгтӕ ӕнцой нӕ фендзысты», — афтӕ зӕгъы мӕ Хуыцау.