Read Хуыцауы Дзырд иронау Исайа 7 Bible Online

Исайа 7 - Хуыцауы Дзырд иронау bible

Исайа 7

¹Иотамы фырт Ахаз, Озиайы фырты фырт, Иудейы паддзах куы уыди, уыцы заман Арамы паддзах Рецин ӕмӕ Ремалийы фырт Феках, Израилы паддзах, Йерусалимы ныхмӕ хӕстмӕ рацыдысты, фӕлӕ йӕ сӕ бон бацахсын не сси.

²Давиды хӕдзармӕ фӕхӕццӕ чындӕуыд, Арамы ӕфсад Ефремы зӕххыл рӕсӕнуат скодтой, зӕгъгӕ, ӕмӕ паддзах ӕмӕ йӕ адӕмы зӕрдӕтӕ барызтысты, хъӕды бӕлӕстӕ дымгӕмӕ куыд баризынц, уыйау.

³Дунедарӕг Исайайӕн бафӕдзӕхста: «Дӕ фырт Шеар-Йашувимӕ[1] Ахазы размӕ ацу, Чъырӕйцӕгъдӕджы быдырмӕ фӕндагыл Уӕллаг цадӕй цы дондзӕуӕн цӕуы, уымӕн йӕ ратӕдзӕнмӕ.

⁴Зӕгъ Ахазӕн: „Лӕмбынӕг кӕс, ӕрсабыр у ӕмӕ мацӕмӕй тӕрс. Дӕ ныфс ма асӕттӕд Рецин ӕмӕ арамейӕгты, стӕй Ремалийы фырты пиллонкалгӕ мастӕй — дыууӕ фӕздӕгкалгӕ ӕхсидавӕй уӕлдай ницы сты уыдон.

⁵Арамейӕгтӕ дын ефремонтӕ ӕмӕ Ремалийы фыртимӕ фыдвӕнд аразынц дӕ ныхмӕ. Уыдон зӕгъынц,

⁶цом ӕмӕ, дам, Иудеймӕ ссӕуӕм, фыд тас ын бафтауӕм йӕ адӕмыл, бацахсӕм ӕй ӕмӕ йын Тавалы фырты паддзахӕй сӕвӕрӕм.

⁷Фӕлӕ Дунедарӕг Хуыцау афтӕ зӕгъы: нӕ уыдзӕн уый, ницы дзы рауайдзӕн.

⁸Дамаск Арамы сӕйраг сахар у, Дамаскы сӕр та — Рецин. Фондз ӕмӕ ӕртиссӕдз азы куы рацӕуа, уӕд ефремонтӕ адӕмты хыгъды дӕр нал уыдзысты.

⁹Ефремонты сӕйраг сахар — Самари, Самарийы сӕргъы — Ремалийы фырт. Сӕ уырнындзинад фидар куы нӕ уа, уӕд сӕ быныхъӕр айхъуысдзӕн“».

¹⁰Дунедарӕг ма Ахазӕн ноджы загъта:

¹¹«Дунедарӕгӕй, дӕ Хуыцауӕй, ӕвдисӕйнаг ракур, фӕнды дӕлдзӕхӕй, фӕнды уӕларвӕй — уӕлдай нӕу».

¹²Ахаз загъта: «Нӕ ракурдзынӕн, Дунедарӕджы фӕлварын мӕ нӕ фӕнды».

¹³Уӕд Исайа загъта: «Ӕрбайхъусут-ма ардӕм, Давиды байзӕддаг! Адӕмы фыдӕбоны хай фӕкодтат, уый уын ӕгъгъӕд нӕу, ӕмӕ ма мын мӕ Хуыцауы дӕр фыдӕбоныл бафтауинаг стут?

¹⁴Уӕдӕ уын Бардарӕг Йӕхӕдӕг фенын кӕндзӕн ӕвдисӕйнаг: Чызг банхъӕлцау уыдзӕн ӕмӕ Фырт ныййардзӕн, схондзӕн Ӕй Эммануил[2].

¹⁵Уый хӕрдзӕни нӕлхӕ ӕмӕ мыд, цалынмӕ ӕвзӕр ӕмӕ хорз кӕрӕдзийӕ иртасын райдайа, уӕдмӕ.

¹⁶Ӕвзӕр ӕмӕ хорз кӕрӕдзийӕ иртасын нӕма райдайдзӕн, афтӕ, цы дыууӕ паддзахӕй тӕрсыс, уыдоны бӕстӕтӕ федзӕрӕг уыдзысты.

¹⁷Ӕцӕг, Дунедарӕг дӕуыл дӕр ӕмӕ дӕ адӕмыл дӕр ныххуырсдзӕн, ефремонтӕ иудейӕгтимӕ куы байуӕрстой, уӕдӕй фӕстӕмӕ чи нӕма уыд, ахӕм фыд заман. Ассирийы паддзахы амӕттаг фӕуыдзыстут.

¹⁸Уӕд Дунедарӕг фехситт кӕндзӕн бындзытӕм — Нилы донгуырӕнты цӕрджытӕм ӕмӕ Ассирийы мыдыбындзытӕм.

¹⁹Уыдон ӕрбатӕхдзысты ӕмӕ иууылдӕр ӕрбаддзысты ӕдзӕрӕг тӕрфыты, къӕдзӕхты скъуыдты, сындзкъутӕртыл, дондарӕнты цур.

²⁰Бардарӕг Евфраты фале баххуырсдзӕн Ассирийы паддзахы, ӕмӕ уын уый адасдзӕни уӕ сӕртӕ ӕмӕ уӕ къӕхтӕ, суанг ма уын уӕ боцъотӕ дӕр алвындзӕн.

²¹Уыцы заман алкӕмӕ дӕр уыдзӕн ӕрмӕстдӕр иу хъуг ӕмӕ дыууӕ фысы.

²²Уыдон уый бӕрц ӕхсыр дӕтдзысты, ӕмӕ ӕппӕт бинонтӕ дӕр царвӕй ӕфсӕст уыдзысты. Ацы зӕххыл ма чи баззайа, уыдон иууылдӕр царв ӕмӕ мыд хӕрдзысты.

²³Фӕлӕ мингай сӕнӕфсиры талатӕ цы бынӕтты рӕзыд — алы тала дӕр — ӕвзисты къӕртты аргъ — уым уыцы заман ӕрзайдзӕни какон сындзытӕ ӕмӕ бӕхгӕрдӕг.

²⁴Зӕхх каконсындз ӕмӕ бӕхгӕрдӕджы бын фӕуыдзӕн, ӕмӕ дзы адӕм цуан кӕндзысты фат ӕмӕ ӕрдынимӕ.

²⁵Раздӕр-иу къӕпийӕ кӕмӕ базалдысты, уыцы къуылдымтӕм нал ссӕудзынӕ ды, каконтӕ ӕмӕ сындзытӕй тӕрсгӕйӕ. Уыцы рӕтты хиздзысты галтӕ, лыстӕг фос сӕ ссӕнддзысты сӕ къӕхтӕй».